Su Kinapugi ni Hana kanu Kadenan
2
Na nangeni-ngeni si Hana sa nia nin pidtalu na“Pakadsisigalaw su pamusungan ku kanu Kadenan a Mapulu,
na sabap sa lekanin na nakapulu aku. Na saguna na pedtatawan ku su manga kuntela ku,
pakadsisigalaw aku kanu kinalipuas'in sa laki.
2 Dala pagidsan na kasuti nu Kadenan a Mapulu,
dala pagidsan nin.
Dala pagidsan nengka a Kadenan nami a 'bpangelung a mana su mabagel a kuta a watu.
3 Da kanu edtalu sa mapulu, di dait a lemiu kanu ngali nu su kamamasela,
ka katawan man nu Kadenan a Mapulu su langun-langun,
sekanin i pegkukum kanu apia ngin a galebekan nu taw.
4 Pembinasan su manga mabagel,
papegkabagelen menem su manga malubay.
5 Su manga taw a madakel i 'gkakan nin paganay na saguna na mapaulipen asal'a makakan.
Ugaid'a su manga taw a dala 'gkakan nin paganay na saguna na 'gkangausug den a benal.
Su di embata paganay na saguna na embata sa pitu kataw.
Ugaid'a su madakel i wata nin paganay na saguna na kadalan na wata.
6 Su Kadenan a Mapulu i 'bpangimatay enggu 'bpanguyag,
sekanin i 'bpananggit lu kanu dalepa nu namamatay enggu sekanin bun i 'bpanguyag lun 'bpaluman.
7 Su Kadenan a Mapulu i papegkawasa enggu papegkamiskin.
Sekanin i pebpulu kanu taw enggu sekanin bun i pembaba lun.
8 Pambangunen nin su miskinan kanu kamiskin nin.
Paayanen nin kanu kulesi a kaped'u 'gkangaunutan
ka enggu malusud kanu 'bpangkatan a mapulu.
Sekanin i minetad kanu palaus'u dunia.
9 Sekanin i pedtapid kanu manga taw nin a matidtu,
ugaid'a su manga taw a dupang na mabinasa kanu kalibutengan
ka dala isa a embantas kanu lekanin demun a kapegkagaga.
10 Su Kadenan a Mapulu a pendatu kanu langun na lupet-lupeten nin su manga kuntela nin,
ipailay nin su lipunget'in a mana kilat,
sekanin i kemukum kanu dunia,
pagkabagelen nin enggu ipulu nin su datu a pinamili nin.”
11 Na guna su maitu na minuli den si Ilkana enggu su sakambinabatan nin lu sa Rama. Ugaid'a initabun nilan lu su Samuil ka enggu makapananabangan kanu 'bpangurban a si Ili sa kanu galebekan kanu Kadenan a Mapulu.
Su Samuil enggu su manga Wata a Mama ni Ili
12 Na su manga wata ni Ili na manga sungkang enggu dala gilek'ilan kanu Kadenan a Mapulu. 13-14 Nia nilan penggulan na uman aden pegkurban na pedsugun nilan su panunugun nilan a pabpananggiten nilan sa mana tinidur a masela a telu timan i madidis'in ka ipapedtumbuk'ilan su manga sapu nu inigkurban gagalu na kabpelabuan lun lu kanu masela a kawa atawa ka kanu masela a kuden. Na langun nu 'gkakua nin pedtumbuk na ipedtimbang'ilan sa umun nu 'bpangurban. Na maitu bun ba i penggulan nilan kanu langun nu taw a Israil a pegkurban lu sa Silu. 15 Na liu pan sa entu, na amaika aden pedtutung sa kasebudan lu kanu pegkurbanan na su panunugun nu 'bpangurban na nia nin pedtalun kanu taw a pegkurban na “Nia nengka inggay kanu 'bpangurban na mailaw a sapu ka enggu nin mapagiaw, di nin pedtaliman i nalabuanan ka mailaw bu.” 16 Na amaika edtalun nu taw a pegkurban i “Tutungen nami muna su manga kasebudan, entu pan ka kua nu u endaw i 'gkalinian nu,” na nia nin menem isumpat na “Di mapakay, nia dait na saguna nengka den inggay ka amaika di nengka inggay na kuan nami sa peges.”
17 Na kagina ka maitu na masela a kabaladusan nu manga wata ni Ili kanu Kadenan a Mapulu kagina da nilan enggi sa alaga su manga inigkurban kanu Kadenan a Mapulu.
18 Saleta mambu na su wata a entu a su Samuil na 'bpananabangan bun kanu galebekan kanu Kadenan a Mapulu a nakambalegkas sa pagidsan kanu balegkas'u 'bpangurban a ebpun sa mapia a ginis. 19 Na uman lagun a kabpelu nu manga lukes'in sa Silu asal'a makagkurban na 'bpagumbalan sekanin nu ina nin sa lambung a mapananggit'in sa lekanin. 20 Na pebpalihalan ni Ili si Ilkana enggu su kaluma nin a si Hana sa nia nin pedtalun kani Ilkana na “Pangenin ta kanu Kadenan a Mapulu i enggan kanu nin pan sa manga muliataw a makasambi kanu iniumun nu kanu Kadenan.” Daka entu pan a mamanguli silan. 21 Na natuman mambu su entu ka pinalihalan nu Kadenan a Mapulu si Hana ka nakambata pamun sekanin sa telu kataw a wata a mama enggu dua kataw a wata a babay. Saleta mambu na su Samuil na pegkasela-pegkasela bun sekanin kanu kabpananabangan nin kanu galebekan kanu Kadenan a Mapulu.
22 Na kanu entu ba a timpu na matua den a benal si Ili. Na nakineg'in su manga mawag a penggulan nu manga wata nin kanu manga taw a Israil enggu su kapendulug'ilan kanu manga babay a 'bpananabangan kanu bengawan nu Balung-balung a Tuleda a 'Bpangadapan kanu Kadenan a Mapulu. 23 Na nia nin pidtalu kanilan na “Nginan ka penggulan nu i nan? Nakineg ku kanu manga taw a nia su manga kadupangan a penggulan nu. 24 Manga wata ku, teleni nu i nan a penggulan nu ka dikena a benal mapia su manga katigan a pedtalu-talun nu manga taw nu Kadenan a Mapulu pantag sa lekanu. 25 Ka amaika su taw ka mindusa kanu ped'in na su Kadenan i 'bpamagelet sa kanilan ugaid'a panun u lu mindusa kanu Kadenan a Mapulu na entain i mamagelet lun?” Ugaid'a da nilan pakikinega su ama nilan ka pigkahanda den man nu Kadenan i imatayan nin silan. 26 Saleta mambu na su Samuil na pegkasela-pegkasela bun a 'gkasuatan nu Kadenan a Mapulu enggu su manga taw.
Su Manggula nu manga Muliataw ni Ili
27 Na aden isa a taw a sinugu nu Kadenan a sinemupeg kani Ili sa nia nin pidtalu na “Nia ba i katigan nu Kadenan a Mapulu, ‘Inipayag ku su ginawa ku kanu manga kaapuan nengka a pinangungulipen nu Piraun kanu lu pan silan sa dalepa a Egypt. 28 Ka sia kanu langun nu tupu nu manga taw a Israil na silan i pinamili ku a mangurban. Silan i mangurban lu kanu pegkurbanan sa laki, silan i temutung kanu manga mamut a tutungen enggu silan i embalegkas kanu pidsugan a balegkas'u 'bpangurban sia kanu adapan ku. Na silan i inenggan kanu laki a umun kanu kurban nu manga taw a Israil. 29 Na ngintu ka inawan nu sa katagan su manga inigkurban sa laki a inisugu ku sa lekanu kanu walay a pedsimban nu sa laki? Ngintu ka nia nengka pan inipulu na su manga wata nengka kumin sa laki ka inigkasebud'u su mapia sa langun a kurban nu manga taw ku a Israil?’
30 “Tembu nia ba i katigan nu Kadenan a Mapulu a Kadenan nu manga taw a Israil, ‘Inibpasad ku i nia bu mabaluy a mangurban sia sa laki taman sa taman na su tupu nu bu a ebpun kanu tupu nu Libi ugaid'a su entu na di den manggula. Ka apia entain i ipulu aku nin na ipulu ku bun ugaid'a apia entain menem i mawa sa laki sa katagan na awan ku bun sa katagan. 31 Ilay ka, mauma i timpu a binasan ku su langun nu tupu a ebpun kanu Libi a tupu nu ka enggu di kanu den makapangurban sia sa laki taman sa dala 'gkatua kanu temundug a muliataw nu. 32 Na magedam'u su kalusak'u sia kanu walay a pedsimban sa laki enggu di nu magedam su kapianan a uyag-uyag a inggay ku kanu manga taw ku a Israil. Na dala man 'gkatua kanu tupu nu taman sa taman. 33 Na aden bun isama ku sa lekanu sa kabpangurban ugaid'a temala sekanin sa sangat i kapasang'in enggu tatap migis i lu nin. Na dala man 'gkatua kanu langun nu tupu nengka ka matay. 34 Na nia tanda sa entu na makadsalengan matay su wata nengka a si Hupni enggu si Pinihas. 35 Na mamili aku sa kasaligan a mangurban sa laki a enggula kanu ngin i kahanda ku. Na su manga tupu nin na baluyn ku a mangurban kanu adapan nu pamilin ku a datu taman sa taman. 36 Na su masama kanu tupu nengka na semupeg sa lekanin ka mapalat-lat sa nanam sa kapangeni nin sa satiman a pilak enggu pan sa nia nin madtalu na “'Bpangenin ku sa leka i baluy aku nengka a panunugun nu 'bpangurban asal'a makakan aku bu.” ’ ”