Ika-isa a Kitab'u Nabi Samuil
sia kanu Kitab Taurat
Su Kinambata kanu Samuil enggu su Kinaumun lun kanu Kadenan a Mapulu
1
Na aden isa a mama a ebpun sa tupu ni Sup a nia nin ngala na Ilkana a wata ni Yiruham, si Yiruham na wata ni Ilihu, si Ilihu menem na wata ni Tuhu, si Tuhu menem na wata ni Sup a ebpun kanu tupu nu Ipraim.a Na lu pegkaleben si Ilkana sa dalepa a Rama kanu manga bakulud'u kalupan sa Ipraim. 2 Na aden dua kataw a kaluma nin a si Hana enggu si Pinina. Na si Pinina na aden manga wata nin ugaid'a si Hana na dala.3 Na uman lagun na si Ilkana na 'bpelu sa Silu ebpun sa Rama ka enggu makasimba enggu makagkurban kanu Kadenan a Mapulu a Barakat sa Langun. Na nia 'bpangurban kanu entu a timpu na su dua kataw a wata ni Ilib a si Hupni enggu si Pinihas. 4 Na uman 'gkurban si Ilkana, na 'bpagenggan nin sa umun si Pinina enggu su manga wata nin. 5 Ugaid'a takep i ibpagenggay nin a umun kani Hana kagina pinadtaya nin a benal sekanin apia binaluy sekanin nu Kadenan a Mapulu sa di makambata. 6 Na kagina ka di pembata si Hana, na tatap papegkayan ni Pinina enggu pedsakiten nin i ginawa nin. 7 Na uman lagun a kabpelu ni Hana kanu walay a pedsimban kanu Kadenan a Mapulu, na maitu bun ba i penggulan ni Pinina na papegkayan nin si Hana taman sa pakapaguguliang sekanin enggu di den pegkan. 8 Na nia kadtalu nu kaluma nin a si Ilkana na “Nginan ka 'bpaguguliang ka enggu di ka den pegkan? Nginan ka 'gkalidu a benal i ginawa nengka? Dikena ba saki pan i labi a balapantag kumin kanu sapulu kataw a wata?”
9-11 Na kanu lu silan sa Silu kanu kinapasad'ilan keman na midtindeg si Hana ka nangadap sekanin kanu Kadenan a Mapulu a 'bpaguguliang kanu kabpangeni-ngeni nin sabap kanu lidu nu ginawa nin. Na inibpasad'in kanu Kadenan i “Hu Kadenan a Mapulu a Barakat sa Langun, na ilay ka su kapegkapasang'u ginawa ku. Tademi ka su panunugun nengka enggu di ka 'bpelipatani. Na amaika enggan aku nengka sa wata a mama na iumun ku sa leka taman a bibiag pan sekanin. Na nia tanda sa iumun ku sekanin sa leka na di tebpedan i buk'in.”c Na saleta mambu na su 'bpangurban a si Ili na 'bpagagayan lu kanu ligid'u bengawan nu walay a pedsimban kanu Kadenan a Mapulu. 12-13 Na su kabpangeni-ngeni mambu ni Hana na pegkebut-kebut bu i ngali nin ka sia bu kanu ginawa nin i kabpangeni-ngeni nin tembu nia kataw ni Ili na 'gkalangut sekanin. 14 Na nia pidtalu ni Ili sa lekanin na “Nginan di nengka den 'gkatelenan i kapendalangutan? Endai ka den i nan.” 15 Ugaid'a nia nin inisumpat na “Dikena aku 'gkalangut enggu dala aku makainem sa apia ngin a makalangut. Ka ipebpayag ku bu kanu Kadenan a Mapulu su kapegkapasang'u manggiginawa ku. 16 Na di ka 'bpagitunga i mawag aku a babay ka 'bpangeni-ngeni aku sia sabap kanu tidtu a kapegkalidu na ginawa ku.”
17 Daka nia inisumpat'i Ili sa lekanin na “Ganat ka den a aden kalilintad'in. Na pangeni-ngenin ta i inggay nu Kadenan tanu a manga taw a Israil su 'bpangenin nengka a entu.” 18 Na nia inisumpat'i Hana na “Sukul-sukul aku kanu kapianan nengka a nan sa laki a panunugun nengka.” Na entu pan ka ginemanat si Hana a di den 'gkalidu i ginawa nin enggu pegkan den sekanin.
19 Na kanu temundug a gay na mibpanay gemedam si Ilkana enggu su sakambinabatan nin ka sinemimba silan kanu Kadenan a Mapulu. Na entu pan ka minuli silan kanu walay nilan lu sa Rama. Na dinulug'i Ilkana su kaluma nin a si Hana, na sinawal mambu nu Kadenan a Mapulu su pangeni-ngeni ni Hana 20 ka migkagingay sekanin. Na guna mauma su timpu a kinambata nin sa wata a mama na nia nin lun inibedtu na Samuild kagina nia nin pidtalu na “Pinangeni ku sekanin kanu Kadenan a Mapulu.”
21 Na nauma menem su timpu a kapegkurban ni Ilkana apeg'u sakambinabatan nin a mana bun su katatapan a penggulan nilan kanu uman lagun enggu su kapegkurban nin sa kanggulalan nin kanu pasad'in kanu Kadenan a Mapulu. 22 Ugaid'a da unut si Hana ka nia nin pidtalu kanu kaluma nin na “Amaika temelen den sa laki semusu su wata na edtapiken ku sekanin kanu adapan nu Kadenan a Mapulu ka iumun ku lun enggu lu ba sekanin 'gkaleben taman sa bibiag pan sekanin.” 23 Na nia inisumpat'u kaluma nin a si Ilkana na “Enggula ka u ngin i kapegkailay nengka lun a makagkapia sa leka. Na sia ka demun taman sa temelen den semusu su wata. Na nia balapantag na matuman su kahanda nu Kadenan a Mapulu.”
24 Na guna su di den pedsusu su wata na init'in lu sa Silu lu kanu walay a pedsimban kanu Kadenan a Mapulu enggu nananggit sekanin sa mama a sapi a telu lagun i umul'in enggu tenga sa saku a arina enggu ig'a ubas a initagu sa taguan a upis'a binatang. 25 Na daka sinumbali nilan su sapi enggu inanggit'ilan su wata lu kani Ili. 26 Na nia pidtalu ni Hana kani Ili na “Hu mapulu, saben-sabenal a saki su babay a tinemindeg paganay sia kanu adapan nengka a nangeni-ngeni kanu Kadenan a Mapulu. 27 Na su wata a nia na pinangeni ku sekanin kanu Kadenan a Mapulu enggu inenggay nin mambu sekanin sa laki. 28 Tembu ibpagumun ku sekanin kanu Kadenan a Mapulu taman sa bibiag pan sekanin.” Na guna su maitu, na lu den ba su wata taman sa pedsimba kanu Kadenan a Mapulu.