Ikadua a Kitab'u Nabi Samuil
sia kanu Kitab Taurat
Su Kinalidu na Ginawa nu Daud sabap kanu Kinapatay nu Saul enggu Jonatan
1
Na kanu entu a timpu na minatay den su Saul, saleta mambu na su Daud enggu su manga taw nin na mimbalingan kanu dalepa a Siklag ulian nu kinapanaban nilan embunua kanu manga taw a Amalik enggu midtangen pan silan lu sa namakadua gay. 2 Na kanu ikatelu gay na aden mama a nakauma a ebpun lu kanu kampu nu Saul a kinisi nin i balegkas'in enggu binetadan nin sa lupa su ulu nin a tanda a 'gkagagawan a benal. Na sinemupeg sekanin kanu Daud enggu sinemugiud kanu adapan nin a tanda kanu kabpagadat'in lun. 3 Na inidsan sekanin nu Daud sa “Endaw ka nakabpun?” Na nia nin inisumpat na “Lu aku ebpun kanu kampu nu manga taw a Israil a nakapalalaguy aku bu.” 4 Na inidsan menem sekanin nu Daud sa “Enduken besen, ngin i nanggula lu?” Na nia nin menem inisumpat na “Namakadtatalaguy su manga sundalu a Israil kanu kinambunua nilan kanu manga kuntela nilan ka madakel i minatay kanilan. Na si Saul enggu su wata nin a si Jonatan na kaped kanu namamatay.” 5 Daka nia menem nakaidsa nu Daud kanu manguda a entu na “Panun i kinataw nengka lun sa minatay den si Saul enggu si Jonatan?” 6 Na nia nin inisumpat lun na “Nakadtabuay i lu aku kanu palaw sa Gilbua, na nailay ku si Saul a nakasukel'in su dilek'in gagalu nu kapedsupeg'u manga pakukuda enggu pakakalisa. 7 Na guna sekanin lengi na nailay aku nin taman sa tinawag aku nin, na nia ku lun nakasumpat na ‘Ngin i makadtabang ku sa leka?’ 8 Na nia nakaidsa ni Saul sa laki na ‘Entain ka?’ Nia ku lun nakasumpat na ‘Taw aku a Amalik.’ 9 Daka nia nin pidtalu sa laki na ‘Ubay ka sia ka 'bpangenin ku i imatayi aku nengka den kagina 'gkalasay aku den a benal kanu nia a 'gkatala ku.’ 10 Daka inubay ku sekanin ka inimatayan ku kagina 'gkasigulu ku i matay bun sekanin sabap kanu mapasang a entu a pali nin. Na kinua ku su sansangan kanu ulu nin enggu su bulusu kanu ngelay nin ka inanggit ku sa leka mapulu.”11 Na guna makineg'u Daud su entu na kinisi nin su balegkas'in enggu maitu bun ba i pinggula nu manga taw nin. 12 Na sangat a nagagawan silan taman sa namakapaguguliang silan enggu da silan kan kanu nagagabian sabap kanu kinapatay a entu nu Saul enggu su wata nin a si Jonatan taman kanu manga taw a Israil a manga taw nu Kadenan a Mapulu kagina madakel i minatay kanilan kanu entu a kinambunua. 13 Na inidsan menem'u Daud su manguda a entu a nanudtul sa “Ngin i tupu nengka?” Na nia nin inisumpat na “Isa aku a taw a Amalik a lapu kanu dalepa nu.” 14 Na nia pidtalu nu Daud sa lekanin na “Ngintu ka da ka kagileki kanu kinaimatay nengka kanu datu a pinamili nu Kadenan a Mapulu?” 15-16 Daka tinawag'u Daud su isa kanu manga taw nin ka sinugu nin sa “Imatayi ka sekanin,” sa nia pidtalu nu Daud kanu manguda a mama na “Seka demun i sinemugat sa kawagib sa kanu ginawa nengka kanu kinadtalu nengka sa inimatayan nengka su datu a pinamili nu Kadenan a Mapulu.” Na inimatayan mambu nu taw nu Daud su mama a entu.
17 Na inumbalan nu Daud sa sengal a kapedsegad'a ginawa nin kanu Saul enggu kani Jonatan 18 sa nia nin pidtalu na dait a ipamandu su entu a sengal kanu manga taw sa dalepa a Yahuda. Na binedtuan su entu sa sengal a pantag kanu busug a nakasulat kanu Libelu nu Manga Matidtu sa nia dalem'u sengal na
19 “Hu Israil, su manga badtug a pabubunua nengka na namamatay lu kanu palaw nengka.
Namamatay su mangabagel a sundalu nengka.
20 Di dait a edtalun kanu manga taw sa dalepa a Gat,
di dait a ipayag kanu manga lalan sa dalepa a Askalun,
ka basi ikagalaw nu manga babay nu manga taw a Pilistin
a di 'bpaginugut kanu Kadenan a Mapulu.a
21 Hu kapalawan nu Gilbua,
dala makatingguma sa leka a ulan atawa ka namug,
dala metu a pamumulan kanu 'bpangangawidan sa leka.
Kagina lu ba nabudsengan
su kelung'u mabagel a si Datu Saul. Na di den kasidsingan sa lana su entu asal'a malimpiu.
22 Na sabap kanu sundang'i Saul
enggu busug'i Jonatan
na madakel i minatay
a mangabagel a kuntela.
23 Na si Saul enggu si Jonatan na inikalimu enggu nasuatan nu manga taw a Israil.
Na iganat kanu bibiag pan silan taman sa kinapatay nilan na dala silan 'bpitas.
Na sia sa kambunua
na malengkas pan silan sa lumalagit enggu mabagel pan sa alimaw.
24 Hu sekanu a manga babay nu Israil na uliangi nu si Saul.
Sabap sa lekanin na nakambalegkas kanu sa mapulu i alaga nin,
namakaselub kanu sa bulawan.
25 Kanugun nin ka namamatay su mangawalaw
a mangabagel a sundalu nengka sa kanu kinambunua.
Minatay bun si Jonatan lu kanu kapalawan.
26 Na sangat a nalidu i ginawa ku sa leka Jonatan a suled ku.
Sangat man a inikalimu ku seka,
su limu nengka sa laki na minuna pan kanu limu nu babay.
27 Kanugun nin ka namamatay su mangawalaw a mangabagel a sundalu nengka.
Su manga matalem'ilan na naawan den na katagan.”