Su Daud na Binaluy a Datu sa Yahuda
2
Na guna maipus su entu na nangadap su Daud kanu Kadenan a Mapulu enggu nia nin pidtalu na “Hu Kadenan, ngintu, lemu aku kanu isa kanu siudad'u dalepa a Yahuda?” Na nia inisumpat'u Kadenan a Mapulu sa lekanin na “Uway, lu ka.” Na nia menem inidsa nu Daud na “Endaw lu tampal?” Na nia menem inisumpat'u Kadenan a Mapulu na “Lu kanu dalepa a Hibrun.” 2 Daka linemu den mambu su Daud enggu su dua kataw a kaluma nin a si Ahinuam a taw sa Yisril enggu si Abigil a balu ni Nabal a taw sa Karmil. 3 Na pinaunut'in bun su manga taw nin apeg'u manga sakambinabatan nilan ka lu den ba silan migkaleben kanu siudad a Hibrun enggu kanu embala-bala nu entu.4 Daka su 'gkangaunutan nu manga taw a Yahuda na linemu sa Hibrun ka binubusan nilan sa lana su ulu nu Daud ka binaluy nilan a datu nilan. Na pidtalu nilan bun kanu Daud i su manga taw sa Yabis-Giliad i linemebeng kanu Saul 5 tembu napapait sa katigan su Daud kanu manga taw sa Yabis-Giliad sa nia nin katigan sa kanilan na “Palihalan kanu nu Kadenan a Mapulu sabap kanu kapianan a pinggula nu kanu mapulu nu a si Saul kanu kinalebeng'u lun. 6 Na saguna na ipagedam'u Kadenan a Mapulu sa lekanu su sangat a kakalimu nin enggu su katidtu nin. Na ipagedam ku bun sa lekanu su kapianan ku sabap kanu pinggula nu a entu. 7 Tembu saguna na pakabagel'u i manggiginawa nu enggu pakawalaw kanu apia minatay den si Saul a mapulu nu. Na saki menem na pinamili nu manga taw a Yahuda a mabaluy a datu nilan.”
Su Kinabaluy ni Isbaal a Datu nu Israil
8 Ugaid'a si Abnir a wata ni Nir a mapulu nu sundalu nu Saul na inanggit'in si Isbaal a wata a mama nu Saul lu sa dalepa a Mahanaim, 9 ka binaluy nin lu ba a datu nu manga dalepa a Giliad apeg'u dalepa a Asir, dalepa a Yisril, dalepa a Ipraim enggu kanu Buniamin taman kanu lusud'u Israil. 10 Si Isbaal a nia a wata nu Saul na nakapatpulu lagun i umul'in kanu kinabaluy lun a datu nu Israil. Na mindatu sekanin kanu dalem'u nakadua lagun. Ugaid'a su Daud i pendatun nu manga taw a Yahuda. 11 Na mindatu su Daud lu kanu dalepa a Hibrun kanu manga taw a Yahuda kanu dalem'u nakapitu lagun enggu nem ulan.
Su Kinambunua nu manga Taw ni Isbaal enggu su manga Taw nu Daud
12 Na si Abnir a wata a mama ni Nir apeg den nu manga taw ni Isbaal a wata a mama nu Saul na linemu sa dalepa a Gibiun ebpun sa Mahanaim. 13 Na inalaw silan ni Yuab a wata a mama ni Siruya apeg'u manga taw nu Daud lu kanu masela a kalut a 'gkalimudan na ig kanu dalepa a Gibiun. Na minayan si Abnir enggu su manga ped'in lu kanu ligid'u masela a entu a kalut. Na si Yuab menem enggu su manga ped'in na lu minayan kanu bala na ligid'u 'bpelimudan sa ig. 14 Na nia pidtalu ni Abnir kani Yuab na “Pambunuan ta kanu adapan ta su mangategel i kambunua nin a manga sundalu ta.” Na miniug mambu si Yuab sa entu. 15 Daka tinemindeg su sapulu enggu dua a taw ni Isbaal a ebpun kanu tupu nu Buniamin ka enggu nilan makambunua su sapulu enggu dua a taw nu Daud. 16 Na kinapetan nu uman i isa su ulu nu ped'in ka midsasandaka silan taman sa nakabpapataya silan. Tembu binedtuan su entu a dalepa sa Hilkat-Hasurim kanu dalepa a Gibiun. 17 Na sangat i kapasang'in a kinambunua i kanilan kanu entu ba a gay. Na tinabanan nu manga taw nu Daud si Abnir enggu su manga taw a Israil.
18 Na kaped bun kanu kinambunua a entu su telu kataw a manga wata a mama ni Siruya a si Yuab, Abisai enggu Asahil. Na si Asahil na malengkas a benal i kapalalaguy nin a mana kalengkas'u saladeng. 19 Na pinaneled'in si Abnir sa da den endedelengi. 20 Na guna lengi si Abnir na nia nin nalengian na si Asahil, daka inidsan nin sa “Seka i nan Asahil?” Nia nin inisumpat na “Uway, saki i nia.” 21 Na nia pidtalu ni Abnir sa lekanin na “Teleni aku nengka den 'bpaneled ka nia ka den seled na su isa kanu manga sundalu ku enggu kua ka den su manga igagama nin.” Ugaid'a dala telen si Asahil kanu kapedseled'in a entu sa lekanin. 22 Na pidtalu menem'i Abnir kani Asahil i “Teleni aku nengka den 'bpaneled! Di aku nengka pebpegesa sa kaimatay ku sa leka. Ka panun i kaadap ku kanu suled'engka a si Yuab amaika matay ku seka?” 23 Ugaid'a dala bun telen si Asahil kanu kabpaneled'in kani Abnir, tembu tinumbuk sekanin ni Abnir kanu sungan nu dilek'in taman sa nakalambas kanu bigkugung'in. Na naudtang sekanin taman sa minatay. Na su langun nu 'bpagukit lu kanu pinatayan ni Asahil na pakabpelen.
24 Ugaid'a guna katawi ni Yuab enggu Abisai su entu a nanggula na pinaneled'ilan si Abnir. Na edsukilep den i kinauma nilan kanu bakulud'u Amma a masupeg kanu dalepa a Gia kanu lalan a 'bpawang kanu tawan-tawan nu dalepa a Gibiun. 25 Saleta mambu na mindilimudan su manga sundalu ni Abnir lu kanu puntiuk'u bakulud a su manga taw a ebpun kanu tupu nu Buniamin asal'a makapagadil silan sa kambunua. 26 Daka linalisan ni Abnir si Yuab sa “Telenan tanu den i kabpagimataya tanu a nia! Dala i nia 'gkaunga nin a mapia. Patelen ka den su manga taw nengka sa kanu kabpaneled'ilan sa lekami a manga pagali nu bun.” 27 Na nia inisumpat'i Yuab na “Amaika da ka bu edtalu na pedsigulun ku sa leka sia kanu adapan nu Kadenan i di nami sekanu telenan maneled taman sa mapita.” 28 Daka pinauni ni Yuab su tambuli, na tinelenan mambu maneled'u manga taw ni Yuab su manga taw a Israil. Daka nakatelen su kapembunua nilan.
29 Na guna maipus su entu na si Abnir enggu su manga taw nin na linemalag kanu nalalamagan lu kanu kadatalan a bedtuan sa Araba enggu linemipag silan kanu lawas'a ig'u Jordan taman sa nakauma silan kanu dalepa a Mahanaim sa malamag den.a
30 Na guna telen si Yuab enggu su manga taw nin kanu kabpaneled'ilan kani Abnir na minuli silan. Na guna nin limuda su manga taw nin na natawan nin i sapulu enggu siyaw kataw i minatay kanilan liu pan kani Asahil. 31 Ugaid'a su manga sundalu nu Daud na nakapatay sa telu gatus enggu nempulu kataw a manga taw ni Abnir a ebpun sa tupu nu Buniamin. 32 Na kinua ni Yuab apeg'u manga taw nin su bangkay ni Asahil ka inilebeng'in kanu linebengan kanu ama nin lu sa Bitlihim. Na kanu nalalamagan na linemalakaw bu silan, na kanu kinagkapita pan i kinauma nilan sa dalepa a Hibrun.