3
Na nauget i kinambunua nu manga tupu nu Daud enggu su manga tupu nu Saul. Saleta mambu na pegkabagel-pegkabagel bun su manga tupu nu Daud enggu su manga tupu menem'u Saul na pegkalubay-pegkalubay den.2 Na nia ba i manga wata a mama nu Daud a pimbata lu sa dalepa a Hibrun, na nia kaka sa langun na si Amnun a nia nin ina na si Ahinuam a taw sa Yisril. 3 Na nia ikadua na si Kiliab a nia nin menem ina na si Abigil a balu ni Nabal a taw sa Karmil. Na si Absalum menem i ikatelu a wata nin a nia nin ina na si Maaka a wata ni Talmai a datu sa Gisur. 4 Na si Adunia menem i ikapat a wata nin a mama a nia nin ina na si Agit. Si Sipatia i ikalima a wata nin a mama a nia nin ina na si Abital. 5 Si Itrim menem i ikanem a wata nin a mama a nia nin ina na si Igla. Na silan ba a entu su manga wata nu Daud a pimbata sa dalepa a Hibrun.
Su Kinadtampil'i Abnir kanu Daud
6 Na gagalu nu kapembunua nu manga tupu nu Saul enggu tupu nu Daud na si Abnir mambu na pinagkabagel'in i ginawa nin asal'a mabaluy a mapulu sia kanu manga tupu nu Saul. 7 Na aden isa a gay a pidtaluan ni Isbaal si Abnir sa “Ngintu ka dinulug'engka su isa kanu manga kaluma nu ama ku a si Saul a si Rispa a wata ni Ayah?” 8 Na sangat a nalianget si Abnir sabap kanu pidtalu a entu ni Isbaal. Na nia nin inisawal kani Isbaal na “Nia nengka kataw ka matipu aku kanu ama nengka enggu tinemampil aku kanu tupu nu Yahuda? Iganat pan sa ganatan sampay saguna na matidtu aku kanu tupu nu ama nengka enggu kanu manga pakat'in taman sa dala ku seka ipalad kani Daud, na ngintu ka saguna na pedsenditan aku nengka sa nakandusa aku pantag kanu babay a nia? 9 Na amaika maitu na makin ku pangenin kanu Kadenan a Mapulu i siksan aku nin amaika di ku tabangan si Daud kanu katuman kanu ngin i inibpasad'u Kadenan a Mapulu sa lekanin. 10 Na inibpasad den man nu Kadenan a Mapulu i iawa nin den su kadatu kanu tupu ni Saul ka nia nin den pandatun na si Daud kanu lusud'u Israil enggu Yahuda, iganat sa dalepa a Dan taman sa dalepa a Birsiba.” 11 Na dala den makasumpat si Isbaal kagina 'gkagilekan sekanin kani Abnir.
12 Daka napapait si Abnir sa katigan lu kanu Daud sa nia nin katigan na “Entain ba man i dait a endatu kanu lusud'u Israil? Na mumbal ta sa kapasadan ka enggu ku seka katabangan sa kasakup'engka kanu lusud'u Israil.” 13 Na nia inisumpat'u Daud na “Uway, miug aku sa mumbal ta sa kapasadan amaika kanu kasia nengka na anggiten nengka su kaluma ku a si Mikal a wata ni Saul.” 14 Daka napapait sa katigan su Daud kani Isbaal a wata a mama nu Saul sa nia nin katigan na “Imbalingan nengka sa laki su kaluma ku a si Mikal ka su kinapangaluma ku sa lekanin na nia ku nakasunggud lun na magatus a pundu nu lanitan'u sangulan nu manga taw a Pilistin.” 15 Tembu inisugu ni Isbaal i kuan si Mikal kanu kaluma nin a si Paltil a wata a mama ni Lais. 16 Saleta mambu na si Paltil na pakapaguguliang kanu kapedtundug-tundug'in kanu kaluma nin a si Mikal taman kanu lu sa dalepa a Bahurim. Na pidtaluan sekanin ni Abnir sa “Uli ka den!” Na minuli mambu sekanin.
17 Na inimbitiala ni Abnir su 'gkangaunutan nu manga taw a Israil sa nia nin pidtalu kanilan na “Nauget'u den pegkiugan a mabaluy a datu nu si Daud. 18 Na saguna na manggula nu den su entu kagina inibpasad'u Kadenan a Mapulu sa lekanin i sia makanggulalan kanu panunugun nin a si Daud na ilipuas'in su manga taw nin a Israil kanu kapegkagaga nu manga taw a Pilistin taman kanu langun nu kuntela nilan.” 19 Na inimbitiala ni Abnir su manga taw a ebpun kanu tupu nu Buniamin, entu pan ka pibpawangan nin su Daud lu sa Hibrun ka pidtalu nin lun i su manga taw a ebpun kanu tupu nu Buniamin taman den kanu langun nu taw a Israil na tabangan nilan sekanin sa kabaluy nin a datu.
20 Na guna makauma si Abnir apeg'u duapulu kataw a manga taw nin lu sa Hibrun na inidsela-sela nu Daud su kinauma nilan. 21 Na nia pidtalu ni Abnir kanu Daud na “Hu datu a mapulu suguti aku sa mapangenggat ku su langun nu taw a Israil asal'a kaayunan nilan su kapendatu nengka. Na amaika maitu na makandatu ka den ba a entu kanu lusud'u Israil a mana bun su 'gkapaginagkay nengka.” Daka pinaganat den mambu nu Daud si Abnir sa aden kalilintad'in.
Su Kinaimatay ni Yuab kani Abnir
22 Na da matana-tana na nakauma si Yuab enggu su manga taw nu Daud lu sa Hibrun ebpun kanu kinapamelusud'ilan. Na madakel i nakua nilan kanu kinambunua nilan a entu. Saleta mambu na da den lu si Abnir ka pinaganat den sekanin nu Daud sa malilintad. 23 Na endaw i kinauma ni Yuab enggu su manga taw nin na pidtalu sa lekanin nu manga taw lu i pibpawangan ni Abnir su datu taman sa pinaganat'in sa malilintad. 24 Daka minubay si Yuab kanu Daud ka nia nin lun pidtalu na “Ngin i pinggula nengka a nia? Pibpawangan ka besen ni Abnir na ngintu ka pinaganat'engka pan sekanin? 25 Na kilala nengka bun man si Abnir a wata a mama ni Nir, sinemia sekanin sa leka ka enggu makapanininting kanu langun nu penggulan nengka.” 26 Daka tinagak'i Yuab su Daud ka inisugu nin i seleden si Abnir. Na nasaut'ilan si Abnir lu kanu kalut sa Sira enggu inimbalingan nilan lu sa Hibrun. Ugaid'a dala i entu katawi nu Daud. 27 Na guna su lu den si Abnir sa Hibrun na inanggit sekanin ni Yuab kanu pintuan nu alad'u dalepa sa maya ta kun sa ipedtalipulu nin pembitiala. Daka sinandak'i Yuab si Abnir sia sa tian taman sa minatay a suli nin kanu kinaimatay kanu suled'in a si Asahil. 28 Na guna i entu katawi nu Daud na nia nin nadtalu na “Katawan nu Kadenan a Mapulu i dala lakit lambay ku enggu su manga taw ku kanu kinapatay ni Abnir a wata a mama ni Nir. 29 Na si Yuab enggu su langun nu pamilia nin i kadtempuan sa entu. Na idsinta silan sa di madala sa kanilan su sakit sa katiti sa dana, debpig, di mamakalakaw, kapatay sa ukit a galangan na sundang taman sa mamangeni bu silan asal'a makakan.” 30 Na nia sabap a kinaimatay ni Yuab enggu Abisai kani Abnir na kagina inimatayan nin su suled'ilan a si Asahil kanu kinambunua nilan lu sa dalepa a Gibiun.
31 Daka nia pidtalu nu Daud kani Yuab taman kanu langun nu taw nin na “Pangisi nu su manga balegkas'u ka embalegkas kanu sa saku ka ipailay nu i 'gkagagawan kanu sa kanu kabpelalakaw nu kanu kabpelebeng kani Abnir.” Na minunut bun su Daud kanu kinalebeng a entu kani Abnir. 32 Na lu nilan inilebeng si Abnir sa Hibrun. Na nakauliang su Daud sa matanug kanu linebengan kani Abnir apeg'u langun nu minunut kanu kinalebeng. 33 Na midsengal su Daud sa sengal a kapedsegad'a ginawa nin kani Abnir sa
“Ngintu ka minatay si Abnir a mana den buneg?
34 Na dikena menem napawik i ay nin enggu lima nin.
Na minatay man sekanin
kanu adapan nu manga taw a dupang.”
Na inuliangan menem'u manga taw si Abnir. 35 Na saleta mambu su Daud na dala kan, tembu pinamitialan sekanin nu manga taw sa keman sekanin gagalu na di pan pedsedep su senang ugaid'a nia nin pidtalu kanilan na “Siksan aku nu Kadenan sa mapasang amaika keman aku sa di pan semedep su senang.” 36 Na nasuatan nu manga taw su pidtalu a entu nu Daud enggu nasuatan nilan bun su langun nu pinggula nin. 37 Na sabap sa entu na natawan nu langun nu taw a Israil i dala a benal lakit lambay nu Daud kanu kinapatay a entu ni Abnir a wata a mama ni Nir. 38 Na nia pidtalu nu Daud kanu manga taw nin na “Ngintu, di nu 'gkapamikil i kanu nia a gay na minatay su badtug a 'gkaunutan nu manga taw a Israil? 39 Na apia saki a pinamili a mabaluy a datu na da ku magaga kemumpen si Yuab enggu si Abisai a manga wata a mama ni Siruya. Tembu su Kadenan den a Mapulu i semuli kanu pinggula nu manga mawag a entu a manga taw.”