Su Kinaimatay kani Isbaal
4
Na guna makineg'i Isbaal a wata a mama nu Saul i minatay den si Abnir lu sa dalepa a Hibrun na inetuan sekanin na gilek taman den kanu manga taw a Israil. 2 Na aden dua kataw a 'gkaunutan nu sundalu ni Isbaal a si Baana enggu Rikab a manga wata a mama ni Rimun a taw sa Birut a ebpun kanu tupu nu Buniamin. Na silan i 'bpangunanan kanu kabpamelusud kanu manga dalepa nu manga kuntela nilan. Na su dalepa a nia a Birut, na saguna na sakup'u manga taw a Buniamin. 3 Na su manga taw sia ba paganay na nakapalalaguy silan kanu dalepa a Gitaima enggu sampay saguna na lu bun silan mindilapu 'gkaleben.4 Na su wata a mama nu Saul a si Jonatan na aden wata nin a mama a di pakalakaw a bedtuan sa Mirib-Baal. Na nakalima lagun i umul'in kanu timpu nu kinapatay nu ama nin a si Jonatan enggu su tuwa nin a su Saul sa kanu kinambunua lu sa dalepa a Yisril. Nia sabapan nu di nin kabpelakaw na napitasan sekanin nu pedtuludu lun sa kinasapuat lun kanu kinapalalaguy nilan sa kinakineg'ilan kanu entu a nanggula.
5 Na saleta mambu na su manga wata a mama ni Rimun a si Baana enggu Rikab na pibpawangan nilan si Isbaal lu kanu walay nin, na nia nilan kinauma lu na kanu timpu na kabpangintelenen nin sa maudtu. 6-7 Na linemudep silan kanu walay sa matatig sa pegkua sa bantad. Na lu silan tinemalus kanu bilik'i Isbaal na nauman nilan a 'bpagiga sekanin. Daka sinandak'ilan sia sa tian enggu pinutukan nilan sa ulu ka inanggit'ilan kanu kinaawa nilan lu. Na kanu nalalamagan na linemalag bu silan a sia minukit kanu kadatalan a bedtuan sa Araba.b 8 Na nia nilan kinauma lu sa Hibrun na pidtapik'ilan kanu Daud su ulu ni Isbaal enggu nia nilan pidtalu na “Hu datu a mapulu, nia su ulu ni Isbaal a wata a mama ni Saul a kuntela nengka a 'bpagimatay sa leka. Na kanu nia a gay na inisuli ka nu Kadenan a Mapulu kani Saul taman kanu tupu nin.” 9 Na nia inisumpat'u Daud kanilan na “Edtalun ku sa lekanu su bantang sia kanu adapan nu Kadenan a Mapulu a linemipuas sa laki kanu langun nu pakagkaid, 10 na paganay na aden nakauma sa laki a taw lu sa Siklag. Na nia nin pidtalu sa laki na minatay den si Saul, na nia nin kataw ka mapia su katigan nin a entu sa laki. Ugaid'a nia ku pinggula na inipasigkem ku sekanin enggu pinaimatayan ku. Ka entu ba i balas a inenggay ku lun kanu katigan nin a entu sa laki. 11 Na labi den guna i pakaidan ku kanu manga dupang a taw a minimatay kanu taw a dala kadusan nin kanu 'bpagigan nin demun. Tembu nia dait na imatayan ku bun sekanu sabap kanu kinaimatay nu a entu ka enggu kanu madala sa dunia.” 12 Daka inisugu nu Daud kanu manga taw nin i imatayan si Rikab enggu si Baana. Na inimatayan nilan mambu enggu pinanebped'ilan su lima enggu su ay nu edsuled a entu ka binitin nilan su lawas'ilan lu kanu ubay nu 'bpamelimudan sa ig sa Hibrun. Na guna mapasad su entu na kinua nilan su ulu ni Isbaal ka inilebeng'ilan kanu ubay nu linebengan kani Abnir lu sa Hibrun.