Nabaluy a Datu su Daud kanu Lusud'u Israil
5
Na su manga taw a ebpun kanu langun nu tupu nu Israil na linemu kanu Daud lu sa Hibrun ka pidtalu nilan lun i “Sakalugu tanu bu. 2 Na iganat pan kanu timpu a si Saul i datu nami na seka bun i 'bpangunanan kanu manga taw a Israil kanu kapembunua. Na pidtalu nu Kadenan a Mapulu sa leka i ‘Seka i mabaluy a temuganul kanu manga taw ku a Israil enggu seka i mabaluy a endatu kanilan.’ ” 3 Na minumbal su Daud sa kapasadan kanu 'gkangaunutan a entu nu manga taw a Israil sia kanu adapan nu Kadenan a Mapulu. Daka binubusan nilan sa lana su ulu nu Daud a tanda a binaluy sekanin a datu nu Israil. 4 Na telupulu lagun i umul'u Daud kanu kinabaluy lun a datu nu manga taw a Israil. Na mindatu sekanin kanu manga taw a Israil kanu dalem'u patpulu lagun. 5 Nakapitu lagun enggu tenga i kinandatu nin kanu manga taw a Yahuda kanu timpu a lu sekanin sa dalepa a Hibrun enggu nakatelupulu enggu telu lagun menem i kinandatu nin kanu lusud'u Israil apeg'u manga taw a Yahuda kanu timpu a lu sekanin sa dalepa a Awrusalim.6 Na aden isa a gay a linemu su Daud enggu su manga taw nin sa Awrusalim ka enggu nilan kalusudan su manga taw a Hibus a pegkaleben lu ba. Na nia pidtalu nu manga taw a Hibus kanu Daud na “Di kanu man makaludep sia sa Awrusalim ka apia su manga pisek bu atawa ka manga tiud na magaga kanu nilan den melen asal'a di kanu makaludep.” Nadtalu nilan i entu ka sia kanu itungan nilan na di makagaga lemudep su Daud enggu su manga taw nin lu. 7 Ugaid'a apia ka maitu na nasakup'u Daud su kuta nu Ziona a pembedtuan saguna sa siudad'u Daud. 8 Na kanu dala pan makaludep su Daud sa Awrusalim na nia nin pidtalu kanu manga taw nin na “Apia entain i lemusud kanu manga taw a Hibus na lu mukit kanu 'bpagukitan nu ig ka enggu kapangimatayan su mana manga tiud a nan enggu mana manga pisek a nan a manga taw a Hibus ka 'gkasakitan ku a benal silan sa ginawa.” Na lu ba linemudsu su palibasan a “Di makaludep kanu walay nu Kadenan su manga pisek enggu manga tiud.”
9 Na guna masakup'u Daud su kuta nu Zion na binedtuan nin su entu sa siudad'u Daud. Na binalibet'in sa alad su entu a lu nin iniludsu kanu lepak a tinambakan sa lupa. 10 Na pegkabagel-pegkabagel bun a benal su Daud kagina pedtapiden sekanin nu Kadenan a Mapulu a Barakat sa Langun.
11 Na su datu nu dalepa a Tair a si Datu Hiram na napasugu lu kanu Daud a pinaunut'in su manga panday a namananggit sa kayu a sidar ka enggu nilan kapatindegan sa tulugan su Daud. 12 Na naimamanan den ba a entu nu Daud i su Kadenan a Mapulu i minaluy sa lekanin a datu kanu manga taw a Israil enggu su Kadenan bun a Mapulu i napagkabagel kanu pendatuan nin sabap kanu manga taw nin a Israil.
13 Na guna su nakaalat den su Daud lu sa Awrusalim ebpun sa Hibrun na madakel pan i nagkaluma nin lu. Na kaped kanu entu ba a nagkaluma nin na su manga panunugun nin bun, taman sa madakel pan i namuliataw nu Daud. 14 Na nia nin manga wata a mama a pimbata lu sa Awrusalim na si Samua, Subab, Natan, Sulaiman, 15 Ibar, Ilisua, Nipig, Yapia, 16 Ilisama, Iliada enggu si Ilipilit.
Su Kinapanaban nu Daud kanu manga Taw a Pilistin
17 Na guna makineg'u manga taw a Pilistin i binaluy den a datu nu manga taw a Israil su Daud na linimud'ilan su manga sundalu nilan asal'a masigkem'ilan su Daud. Na nakauma sa pakinegan nu Daud su entu tembu linemu sekanin kanu isa a mabagel a kuta. 18 Na guna makauma su manga taw a Pilistin kanu kadatalan nu Ripaim na mibpalak-palak silan lu. 19 Daka nangadap su Daud kanu Kadenan a Mapulu sa nia nin pidtalu na “Ngintu, lusudan nami den su manga taw a Pilistin? Ipataban nengka den silan sa lekami?” Na nia inisumpat'u Kadenan a Mapulu na “Uway, ganat kanu den ka natatalanged a ipataban ku silan sa lekanu.” 20 Na guna su maitu na linemu su Daud sa Baal Pirasim taman sa tinabanan nilan lu su manga taw a Pilistin. Na nia nadtalu nu Daud na “Binungkasan nu Kadenan a Mapulu su 'bpagukitan kanu manga kuntela ku sia kanu adapan ku a mana su kinabungkas'u mabagel a degan.” Na entu ba i sabap a kinabedtu lun sa Baal Pirasim.b 21 Na tinagak lu ba nu manga taw a Pilistin su manga pegkakadenanen nilan. Na pinangua mambu nu Daud enggu manga taw nin su entu. 22 Na mimbalingan menem su manga taw a Pilistin lu kanu kadatalan nu Ripaim a mibpalak-palak bun silan. 23 Na nangadap menem su Daud kanu Kadenan a Mapulu. Na nia inisumpat'u Kadenan lun na “Di nu muna silan lemusudi ka libet'u muna silan, entu pan ka lusudi nu silan lu kanu bala nu kayu a balsamu. 24 Na amaika makineg'u den su mana sangkad'u pegkuyug-kuyug a sundalu kanu puntiuk'u kayu a balsamu na pamagayasi nu den silan lemusud kagina entu ba i tanda sa saki i 'bpangunanan sa lekanu kanu kabpelusud'u kanu manga taw a Pilistin.” 25 Na pinggula den mambu nu Daud su inisugu nu Kadenan a Mapulu sa lekanin. Na tinabanan nu Daud su manga taw a Pilistin iganat sa dalepa a Gibia taman sa dalepa a Gisir.