Su Kinapananggit kanu Kaun nu Kapasadan lu sa Awrusalim
6
Na linimud menem'u Daud su langun nu mategel a sundalu nu Israil a telupulu ngibu i kadakel'in. 2 Na linemu silan sa dalepa a Baali a sakup'u dalepa a Yahudaa ka enggu nilan makua su Kaun nu Kapasadan nu Kadenan, su kaun a bedtuan bun sa “Su Kaun nu Kadenan a Mapulu a Barakat sa Langun na lu kanu Untul'in na su Kadenan a lu kanu Pageletan nu Dua Timan a Malaikat a Bulawan.b” 3-4 Na lu nilan kinua su Kaun nu Kapasadan a entu kanu walay ni Abinadab a lu kanu bakulud ka inipageda nilan kanu bagu a guyudan. Na si Uza enggu si Ahiyu a manga wata a mama ni Abinadab i papedtalaguy kanu pengguyud kanu guyudan a entu. Na nia 'bpangunanan pedtundan na si Ahiyu. 5 Na su Daud mambu enggu su langun nu manga taw a Israil na sangat a midsisigalaw silan sa endaw taman i bagel'ilan kanu adapan nu Kadenan a Mapulu. Midsesengal silan enggu napauni silan sa manga tambul, manga kutiapi, manga tungkaling a pegkibun, manga gandingan enggu palabuni-bunian a bedtuan sa alpa.6 Na guna silan makauma kanu tagikan ni Nakun na nakagebpa su manga sapi tembu inami ni Uza su Kaun nu Kapasadan nu Kadenan. 7 Daka sangat a nalipungetan nu Kadenan a Mapulu si Uza sabap kanu pinggula nin a entu tembu inimatayan sekanin nu Kadenan lu kanu ubay nu Kaun nu Kapasadan. 8 Na sangat a nalipunget su Daud sabap kanu natekaw demun a entu a kinaimatay nu Kadenan kani Uza. Na sabap sa entu na binedtuan sa Piris-Uza su entu a dalepa sampay den saguna. 9 Na kanu entu bun ba a gay na inikagilek'u Daud su Kadenan a Mapulu taman sa nia nin nadtalu na “Panun guna i kadtapik ku kanu Kaun nu Kapasadan nu Kadenan a Mapulu lu kanu dalepa ku?” 10 Na guna su maitu na dala den edtapika nu Daud su Kaun nu Kapasadan nu Kadenan ka initabun nin lu kanu walay ni Ubid-Idum a taw a Gat. 11 Na su Kaun nu Kapasadan nu Kadenan na lu bu kanu walay ni Ubid-Idum kanu dalem'u telu ulan. Na pinalihalan nu Kadenan a Mapulu si Ubid-Idum taman kanu sakambinabatan nin.
12 Na nakauma kanu pakinegan nu Daud i pinalihalan nu Kadenan su sakambinabatan ni Ubid-Idum taman kanu langun nu kaaden nin sabap kanu Kaun nu Kapasadan nu Kadenan a Mapulu. Daka linemu su Daud kanu walay ni Ubid-Idum ka kinua nin su Kaun nu Kapasadan nu Kadenan ka pidtapik'in lu sa Awrusalim a 'gkagalaw a benal. 13 Na guna makasangkad sa nem sangkad su manga 'bpananggit kanu Kaun nu Kapasadan na pinatelen silan nu Daud ka migkurban muna sekanin sa pinagkasebud a sapi enggu tudu a sapi. 14 Na midtantu a benal sa kinadsagayan nin su Daud kanu adapan nu Kadenan a Mapulu a mimbalegkas sa pidsugan a balegkas'u 'bpangurban. 15 Na gagalu nu kabpananggit'u Daud enggu su manga taw a Israil kanu Kaun nu Kapasadan nu Kadenan a Mapulu na 'bpamelalis silan sa kapia na ginawa enggu pebpaguni silan sa tambuli. 16 Na guna makauma su Kaun nu Kapasadan nu Kadenan kanu siudad'u Daud na sinemiling si Mikal a wata nu Saul kanu paliungan, na nia nin nailay na su Daud a pebpapaudtu enggu pedsasagayan kanu adapan nu Kadenan a Mapulu, na dala a benal kalini i entu ni Mikal a pinggula nu Daud. 17 Na inibetad'ilan su Kaun nu Kapasadan kanu balung-balung a tuleda a pinatindeg'u Daud a inadil a pembetadan lun. Entu pan ka migkurban sekanin kanu Kadenan sa kurban a pedtutungen langun enggu kurban a tanda kanu kinaisa kanu Kadenan. 18 Na guna sekanin makapasad 'gkurban na pinalihalan nin su manga taw kanu ingala nu Kadenan a Barakat sa Langun. 19 Entu pan ka pinangenggan nin su madakel a manga taw magidsan i babay-mama sa pegken, inilutu a sapu na binatang enggu ginangu a unga na ubas. Na guna mapasad su entu na namanguli den silan kanu manga walay nilan.
20 Na minuli bun mambu su Daud ka enggu nin kapalihalan su sakambinabatan nin. Na sinumbak sekanin ni Mikal a wata nu Saul ka pidsudian nin sa nia nin pidtalu na “Sangat i kapia nin i nia a gay kanu badtug a datu nu Israil ka midsagayan a sama bu da makagkadaw kanu adapan nu manga babay a ulipen nu 'gkangaunutan, makamamala gaid i entu a pinggula nengka, na dala ka demun a benal kayai.” 21 Na nia inisumpat'u Daud kani Mikal na “Pinggula ku i entu kanu adapan nu Kadenan a Mapulu a namili sa laki a sambi kanu ama nengka taman den kanu langun nu sakambinabatan nin. Pinamili aku nin ka enggu ku kapangunanan su manga taw nin a Israil tembu penggalaw-galaw aku kanu adapan nu Kadenan a Mapulu. 22 Na apia man pakaya su pinggula ku a nia na enggulan ku bun. Na sia kanu kapegkailay nengka lun na pakagkayaya aku ugaid'a sia kanu kapegkailay nu manga babay a ulipen a pedtalun nengka na badtug aku.”
23 Na sabap sa entu na si Mikal a wata nu Saul na dala makambata taman kanu kinapatay nin.