Su Kapasadan nu Kadenan kanu Nabi Daud
7
Na kanu timpu a lu pegkaleben su Datu Dauda kanu tulugan nin na pinapangintelenen pan sekanin nu Kadenan a Mapulu kanu kapembunu lun nu manga kuntela nin kanu embala-bala a dalepa. 2 Guna su maitu na nia pidtalu nu Datu Daud kanu Natan a isa a nabi i “Ilay ka ba, saki na nia ku pegkalebenan na mapia a benal a tulugan a pimbalay sa kayu a sidarb ugaid'a su Kaun nu Kapasadan nu Kadenanc na lu bu kanu balung-balung a tuleda.” 3 Na nia inisumpat'u Natan kanu Daud na “Enggula ka den u ngin i 'gkapagitung'engka ka pedtapiden ka man nu Kadenan a Mapulu.” 4 Ugaid'a kanu entu bun ba a magabi na pidtalu nu Kadenan a Mapulu kanu Natan i 5 “Lu ka kani Daud a panunugun ku ka edtalu ka lun su nia a katigan ku sa lekanin a ‘Ngintu, seka i papedtindeg sa walay a 'gkalebenan ku? 6 Ka iganat paman kanu kinapaawa ku kanu manga taw a Israil lu sa Egypt sampay den saguna na da aku pamun makagkaleben sa walay. Sia aku bu kanu balung-balung a tuleda a ibpagalat-alat bu. 7 Na kanu timpu na kabpagalat-alat a entu a kaped ku su manga taw a Israil na apia sakataw kanu 'gkangaunutan a sinugu ku a temiakap kanu manga taw ku na dala pidtaluan ku sa “Ngintu ka di aku pembalayan sa walay a ebpun kanu kayu a sidar?” ’8 “Kagina ka maitu na edtalu ka kani Daud a panunugun ku i ipapedtalu nu Kadenan a Mapulu a Barakat sa Langun i ‘Paganay na pedtuganul ka sa manga bili-bili ugaid'a saguna na pinamili ku seka a makapangunanan kanu manga taw ku a Israil. 9 Pedtapiden ku seka apia endaw ka pebpawang enggu inibped ku mimatay su langun nu kuntela nengka. Saguna na baluyn ku a badtug su ngala nengka a pagidsan kanu manga taw a badtug i ngala nin sia sa dunia. 10 Tanduan ku sa kalupan su manga taw ku a Israil taman sa lu ku ba silan pagkalebenen. Na su kagkaleben nilan lu na di den silan masamuk enggu di den silan pakapasangan nu manga taw a dupang a mana su paganay 11 iganat kanu timpu a kinabetad ku sa 'gkangaunutand kanu manga taw ku a Israil. Sia kanu kandatu nengka na makapangintelenen ka kanu kambunua nengka kanu manga kuntela nengka.’
“Na ipapedtalu bun nu Kadenan a Mapulu i ‘Saki su Kadenan a Mapulu a pebpayag sa leka sa su kandatu nengka na taman pan kanu manga muliataw nengka. 12 Ka amaika mapupus den su gay nengka sia sa dunia taman sa madtagapeda nengka den su manga kaapu-apuan nengka a namamatay den na isambi ku menem su isa kanu manga wata nengka enggu pagkabagelen ku su kandatu nin. 13 Na sekanin i mapatindeg kanu walay ku enggu talangeden ku i su kandatu nin na taman sa taman. 14 Na saki i mabaluy a ama nin enggu sekanin menem i mabaluy a wata ku. Na amaika enggula sekanin sa di mapia na patidtun ku sekanin sa mana su kapapedtidtu nu ama kanu wata nin. 15 Ugaid'a apia ka maitu na di masalin su kakalimu ku lun, dikena mana si Saul a iniawa ku lun su kakalimu ku lun ka inisambi ku seka sa lekanin a endatu. 16 Na di mapupus su kandatu nengka sia kanu kaadapan ku ka mayan su muliataw nengka kanu kulesi nengka taman sa taman.’ ”
17 Na inisampay nu Natan kanu Daud su langun nu pidtalu nu Kadenan a entu sa lekanin.
Su Pangeni-ngeni nu Daud
18 Na guna mapasad su entu na linemudep su Daud lu kanu tuleda a nambetadan nu Kaun nu Kapasadan nu Kadenan enggu pidtalu nin lun i “Hu Kadenan a Mapulu, entain aku ba enggu su sakambinabatan ku a pinalihalan nengka sa maya ba? 19 Hu Kadenan a Mapulu na liu pan sa entu na aden inibpasad'engka kanu manga tupu ku makapantag kanu manga temundug pan a manga gay. Pakagaip-gaip i kapegkalimu nengka a inipayag'engka a nia sa lekami!e 20 Na ngin pan i madtalu ku sa leka, Hu Kadenan a Mapulu? Ka kilala nengka a benal su panunugun nengka a nia. 21 Na sabap kanu pasad'engka enggu kanu kahanda nengka na pinggula nengka su langun nu entu a kabadtugan asal'a makapayag'engka sa laki a panunugun nengka. 22 Tembu badtug ka, Hu Kadenan a Mapulu, kagina dala pagidsan nengka enggu dala ped a Kadenan a liu pan sa leka a mana bun su nakineg'ami sa leka. 23 Na dala bun pagidsan nu manga taw nengka a Israil. Na nia bun ba i bangsa sia sa dunia a inilipuas'engka kanu kinapangungulipen asal'a mabaluy a manga taw nengka. Na nabaluy a badtug su ingala nengka sabap kanu badtug enggu kagaipan a pinggula nengka sa kapedtabang'engka kanilan. Na sia nakanggulalan kanu manga taw nengka a pinaliu nengka kanu dalepa a Egypt na pinaawa nengka su manga bangsa a 'gkauman nilan enggu su manga pegkakadenanen nilan. 24 Na binaluy nengka su manga taw a Israil a taw nengka taman sa taman enggu seka den i Kadenan nilan.
25 “Hu Kadenan a Kadenan a Mapulu na tuman ka su pasad'engka kanu panunugun nengka enggu kanu tupu ku ka enggu di den i entu embagu 26 ka enggu mabadtug su ingala nengka taman sa taman. Na madtalu nu manga taw i ‘Su Kadenan a Mapulu a Barakat sa Langun i pendatu kanu manga taw a Israil’ enggu su kandatu nu tupu ku na palalayunen nengka taman sa taman. 27 Kagina seka, Hu Kadenan a Barakat sa Langun a Kadenan nu manga taw a Israil i minayag kanu panunugun nengka sa ‘Su kandatu nengka na taman pan kanu manga muliataw nengka’ tembu su panunugun nengka na naadenan na kawalaw sa kapangeni-ngeni sa leka. 28 Hu Kadenan a Mapulu, seka su Kadenan enggu su kadtalu nengka na bantang enggu inibpasad'engka su manga mapia a nia kanu panunugun nengka. 29 Na saguna na pangenin ku i palihalai ka su kandatu nu tupu ku asal'a makandatu su muliataw ku sia kanu adapan nengka taman sa taman kagina nia ba i inibpasad'engka, Hu Kadenan a Mapulu. Na sia makanggulalan kanu kapebpalihala nengka a nia na kapalihalan su kandatu nu muliataw ku taman sa taman.”