Su Kinapanaban nu Daud
8
Na guna maipus su manga timpu na tinabanan embunua nu Daud su manga taw a Pilistin taman sa nasakup'in su dalepa a Mitig-Ama. 2 Tinabanan nin bun su manga taw a Muab. Na nia nin inipakaid kanilan na pinagkuyug-kuyug'in silan mapaiga kanu lupa ka tinembu nin silan sa tali sa nakatelu, na su langun na nalusud kanu ika-isa enggu ikadua a tinembu nin na pinangimatayan nin enggu su langun menem'u nalusud kanu ikatelu kanu kinatembu nin na dala nin pangimatayi. Na su langun nu dala nin pangimatayi a manga taw sa Muab na napaulipen silan enggu minayad silan sa buwis.3 Na tinabanan nin bun embunua su datu nu dalepa a Suba a si Datu Hadadisar a wata a mama ni Rihub kanu timpu a kabpelu nin kanu kalupan a masiken kanu lawas'a ig'u Yupratis sa kakua nin 'bpaluman kanu entu. 4 Na nakua nu Daud kanu Datu Hadadisar su sangibu enggu pitu gatus a pakakalisa apeg'u duapulu ngibu a manga sundalu. Na inipatiud'u Daud su manga kuda a pengguyud kanu kalisa ugaid'a sinemama sekanin sa manga kuda a makaguyud kanu magatus a kalisa. 5 Na guna makauma su manga taw a Aram a ebpun sa dalepa a Damaskus ka pedtabangan nilan su Datu Hadadisar ugaid'a duapulu enggu dua ngibu i minatay nu Daud kanu manga taw a entu a Aram. 6 Daka minumbal su Daud sa manga pegkampuan nilan lu sa Damaskus a dalepa nu manga taw a Aram. Na nabaluy a ulipen nu Daud su manga taw a Aram enggu minayad silan sa buwis sa lekanin. Na papembantasen nu Kadenan a Mapulu su Daud apia endaw sekanin pebpawang. 7 Na pinangua nu Daud su manga bulawan a kelung'u manga taw nu Datu Hadadisar ka inanggit'ilan lu sa Awrusalim. 8 Pinangua nin bun su madakel a benal a galang kanu dalepa ni Datu Hadadisar a su dalepa a Bita enggu Birutai.
9 Na guna katawi nu Tuy a datu nu dalepa a Hamat i tinabanan nu Daud su langun nu sundalu nu Datu Hadadisar 10 na pinalu nin kanu Daud su wata nin a mama a si Yuram ka enggu nin masalam enggu mapugi kanu kinapanaban nin kanu Datu Hadadisar. Na pinapananggit'in sa manga bulawan, manga pilak enggu manga galang kagina kanu paganay na si Datu Tuy enggu si Datu Hadadisar na tatap silan pembunua. 11 Na inigkurban i entu nu Daud kanu Kadenan a Mapulu a mana bun su pinakaidan nin kanu nangakua nin a bulawan enggu pilak kanu manga natabanan nin a manga bangsa 12 a Idum, Muab, Amun, Pilistin, Amalik enggu su nangakua nin kanu datu nu dalepa a Suba a si Hadadisar a wata a mama ni Rihub.
13 Na sangat a nabadtug su Daud labi den kanu kabpaguli nin kanu kinaimatay nin kanu sapulu enggu walu ngibu a manga taw a Idum lu kanu kadatalan nu dalepa a bedtuan sa Timus. 14 Na minumbal su Daud sa manga pegkampuan nilan kanu lusud'u dalepa a Idum enggu nabaluy a ulipen nin su manga taw a Idum. Na papembantasen nu Kadenan a Mapulu su Daud apia endaw sekanin pebpawang.
Su 'Gkangasaligan nu Daud
15 Na mindatu su Daud kanu lusud'u Israil. Na ininggulalan nin kanu langun nu taw su matidtu enggu wagib a kinandatu. 16 Na si Yuab a wata a mama ni Siruya i 'gkaunutan nu manga sundalu nu Daud. Na si Yusapat menem a wata a mama ni Ahilud i 'bpanulat kanu ngin i 'gkanganggula enggu papedsampay kanu manga taw kanu ngin i katigan nu datu. 17 Na si Saduk a wata a mama ni Ahitub enggu si Ahimilik a wata a mama ni Abiatar menem i 'bpangurban. Na si Siraya menem i 'bpanulat kanu ngin i katigan nu datu. 18 Na si Binaya menem a wata a mama ni Yihuyada i pegkakataw kanu manga taw a Kirit enggu kanu manga taw a Pilit a manga tameng'u datu. Su manga wata a mama menem'u Daud i pedtabanga sa lekanin.