Su Daud enggu si Mirib-Baal
9
Aden isa a gay a minidsa su Daud sa “Aden pamun nasama kanu sakambinabatan ni Saul a kanggulan ku sa kapianan sabap kani Jonatan?” 2 Daka pinalu kanu Daud su bedtuan sa Siba a panunugun nu sakambinabatan nu Saul. Na guna sekanin makauma lu na inidsan sekanin nu Daud sa “Seka ba si Siba?” Na nia nin inisumpat na “Uway, saki su entu.” 3 Na inidsan menem sekanin nu Daud sa “Ngintu, aden pamun nasama kanu sakambinabatan ni Saul a kanggulan ku sa kapianan nu Kadenan?” Na nia inisumpat'i Siba sa lekanin na “Uway, aden pamun sakataw a wata a mama ni Jonatan a di pakalakaw.” 4 Na nia inidsa nu Daud na “Endaw sekanin saguna?” Nia inisumpat'i Siba na “Lu sekanin sa dalepa a Ludibar kanu walay ni Makir a wata a mama ni Amil.” 5 Daka inipalapit sekanin nu Daud. 6 Na endaw i kinauma ni Mirib-Baal a wata a mama ni Jonatan a wata nu Saul na sinemugiud sekanin a tanda nu kabpagadat'in lun. Na nia pidtalu nu Daud sa lekanin na “Seka si Mirib-Baal?” Na nia nin inisumpat na “Uway, saki ba su panunugun nengka.” 7 Na nia pidtalu nu Daud sa lekanin na “Da ka 'gkagilek ka pinasia ku seka asal'a kanggulan ku seka sa kapianan a mana su inibpasad ku kanu ama nengka a si Jonatan. Na imbalingan ku sa leka su langun nu kalupan nu tuwa nengka a si Saul. Na liu pan sa entu na tatap ku den seka kaped keman sia kanu tulugan ku.” 8 Na sinemugiud menem sekanin enggu nia nin pidtalu na “Entain aku a panunugun nengka a enggulan nengka sa maya ba? Na nia ku den man kalagidan na mana minatay a asu.”9 Na guna su maitu na inipatawag'u Daud si Siba a panunugun nu Saul ka nia nin lun pidtalu na “Ibpagenggay ku den kanu apu nu mapulu nengka a si Saul su langun nu kaaden nin taman kanu langun nu kaaden nu sakambinabatan nin. 10 Na seka enggu su manga wata nengka taman kanu manga panunugun nengka i mangangawid kanu entu. Na edtapik'u lu sa lekanin su langun nu masabpet'u ka enggu aden makan nu pamilia nu mapulu nengka. Ugaid'a si Mirib-Baal a apu nu mapulu nengka na sia demun kanu tulugan ku ka lalayun ku den sekanin kaped keman.” Na si Siba a nia na aden sapulu enggu lima kataw a wata nin a mama enggu duapulu kataw menem i kadakel'u manga panunugun nin. 11 Daka nia inisumpat'i Siba na “Hu datu, enggulan nu panunugun nengka su manga ipedsugu nengka a nan.” Na iganat sa entu na lalayun den kaped'u Daud pegkan si Mirib-Baal a mana bun isa kanu manga wata nin a mama. 12 Na si Mirib-Baal na aden wata nin a mama a manguda a bedtuan sa Mika. Na su langun nu sakatiwalayan ni Siba na nabaluy a panunugun ni Mirib-Baal. 13 Na lu migkaleben si Mirib-Baal sa Awrusalim kagina lu sekanin tatap pegkan a kaped'u datu. Na si Mirib-Baal a nia na di pakalakaw ka sadil i duakambala a ay nin.