Su Kinataban nu Daud kanu manga Taw a Amun enggu kanu manga Taw a Aram
10
Na ulian nu manga timpu na minatay si Nakas a datu nu manga taw a Amun. Na nia nakasambi kanu kapendatu nin na su wata nin a mama a si Hanun. 2 Na nia pidtalu nu Daud na “Mapailay aku sa kapianan kani Hanun a mana bun su pinggula sa laki nu ama nin a si Nakas.” Daka napasugu su Daud sa kanu manga taw nin lu kani Hanun asal'a malimpang'ilan si Hanun sabap kanu kinapatay a entu nu ama nin. Na guna makauma lu su manga sinugu nu Daud kanu kalupan nu manga taw a Amun 3 na nia pidtalu nu 'gkangaunutan nu manga taw a Amun kanu datu nilan a si Hanun na “Nia nengka lun kapegkailay na 'bpagenggan ni Daud sa alaga su ama nengka ka sinemugu sekanin kanu manga taw nin asal'a makapagkabagel ka nin? Dikena! Ka nia nin kinasugu kanu manga taw nin sia na asal'a kapaninintingan nilan su dalepa tanu ka enggu nilan masakup.” 4 Tembu inipasigkem'i Hanun su manga sinugu nu Daud enggu iniawa i sabad kanu manga bulungus'ilan enggu tinebped su kasadan nu manga balegkas'ilan entu pan ka pinambalingan nin silan. 5 Na guna katawi nu Daud su entu na sinemugu sekanin sa makaalaw kanilan kagina sangat a nakagkayaya su manga sinugu nin a entu. Na nia nin katigan kanilan na “Edtangen kanu demun sa Yariku taman sa kaetu nu manga bulungus'u entu pan ka embalingan kanu sia.”6 Na guna kaimamani nu manga taw a Amun i sangat a nalipunget su Daud na sinemukay silan sa duapulu ngibu a sundalu a manga taw a Aram a ebpun kanu dalepa a Bit Rihub enggu kanu dalepa a Suba. Na sinemukay bun silan sa sangibu a sundalu a ebpun kanu datu nu dalepa a Maaka enggu sapulu enggu dua ngibu menem a sundalu i ebpun sa dalepa a Tub. 7 Na guna makineg'u Daud su entu na sinugu nin si Yuab enggu su langun nu sundalu nin a pabubunua ka matu silan embunua. 8 Na saleta mambu na su manga sundalu a taw a Amun na linemiu den silan kanu siudad'ilan ka migkuyug-kuyug silan kanu liu nu bengawan nu siudad'ilan ka adil den silan sa kambunua. Na su manga sundalu menem a taw a Aram a ganat sa Rihub enggu Suba apeg den nu manga sundalu a ganat sa dalepa a Tub enggu su manga sundalu a ganat sa dalepa a Maaka na lu menem silan migkuyug-kuyug kanu kadatalan.
9 Na guna mailay ni Yuab i nadsalumpitan silan nu manga kuntela nilan na namili sekanin kanu manga sundalu nin a mangategel sa kambunua ka entu ba i pinapangunanan nin sa kambunua kanu manga taw a Aram. 10 Na si Abisai menem a suled'in i pinapangulu nin kanu ped a manga sundalu nilan sa kambunua kanu manga taw a Amun. 11 Na nia pidtalu ni Yuab kani Abisai na “Amaika mailay nengka i di kami pakagaga kanu manga taw a Aram na tabangi kami nu, ugaid'a amaika sekanu menem i di pakagaga kanu manga taw a Amun na sekanu menem i tabangan nami. 12 Pakabagelen tanu i tindeg tanu enggu mapakawalaw tanu sabap kanu manga taw tanu enggu kanu manga pagidsan tanu a Israil enggu kanu manga siudad'u Kadenan. Na enggulan man nu Kadenan a Mapulu u ngin i makasuat sa lekanin.” 13 Daka linusudan ni Yuab enggu su manga taw nin su manga sundalu nu manga taw a Aram taman sa namakadtatalaguy silan ka tinalaw. 14 Na guna mailay nu manga taw a Amun i namakadtatalaguy su manga sundalu nu manga taw a Aram na maitu bun ba i pinggula nilan na midtatalaguy bun silan ka mimbalingan silan kanu siudad'ilan ka nagilekan silan kani Abisai. Na ulian nu kinambunua nilan kanu manga taw a Amun na mimbalingan si Yuab sa Awrusalim.
15 Na guna mailay nu manga taw a Aram i tinabanan silan nu manga taw a Israil na mindidilimudan menem silan. 16 Na inipatawag'u Hadadisar su manga taw a Aram a lu kanu bala nu lawas'a ig'u Yupratis. Na lu silan migkampu sa dalepa a Hilam a nia nangunanan kanilan na si Subak a 'gkaunutan nu manga sundalu ni Hadadisar. 17 Na guna katawi nu Daud su entu, na linimud'in su langun nu sundalu nu Israil ka linemipag silan kanu lawas'a ig'u Jordan ka bunun nilan su manga kuntela nilan kanu dalepa a Hilam. Na saleta mambu na su manga taw a Aram na nagadil silan ka minatu silan embunua kanu Daud. 18 Na namakadtatalaguy menem su manga taw a Aram. Na pitu gatus a pakakalisa enggu patpulu ngibu a sundalua i minatay nu Daud kanu entu a kinambunua nilan. Na minatay nilan bun si Subak a mapulu nu manga sundalu ni Hadadisar. 19 Na guna mailay nu manga datu a manga tampil'i Hadadisar i tinabanan silan nu manga taw a Israil na initapenay nilan i ginawa nilan kanu manga taw a Israil taman sa napasakup silan kanilan. Tembu iganat sa entu na 'gkagilekan den pedtabang su manga taw a Aram kanu manga taw a Amun.