Su Daud enggu si Batsiba
11
Na kanu timpu nu kapembubul a timpu nu kapembubunua nu manga datu na nia pinambunua nu Daud kanu pembubunuan na si Yuab enggu su manga taw nin apeg'u langun nu sundalu nu Israil ka migkalidtabun demun sekanin lu sa Awrusalim. Na tinabanan ni Yuab su manga taw a Amun taman sa nalibet'ilan su siudad a Rabba.2 Na kanu isa a gay sa timpu na malulem na mimbangun su Daud ka pendadalakaw lu kanu lama-lama nu untul'u tulugan nin, daka aden nailay nin a babay a pebpaigu a manisan. 3 Daka aden sinugu nin asal'a katawan u entain i babay a entu a pebpaigu. Na natawan nin i su babay a entu na si Batsiba a wata ni Iliam a kaluma ni Uriya a taw a Hit. 4 Na inipakua nu Daud si Batsiba, na guna makauma lu na dinulug'u Daud si Batsiba. (Na saleta mambu na si Batsiba na bagu pamun i kinapasad'in mamelimpiu kanu lawas'ina kagina bagu pamun i kinapasad'a kinauma lun nu gay nin.) Na nia nin lun kinapasad demulug na minuli si Batsiba. 5 Na sabap sa entu na migkagingay sekanin enggu inipadtalu nin i entu kanu Daud. 6 Daka napapait sa katigan su Daud lu kani Yuab sa palun nin pan sa lekanin si Uriya a taw a Hit. Na pinalu mambu ni Yuab si Uriya kanu Daud. 7 Na nia kinauma ni Uriya na inidsan sekanin nu Daud u ngin den i betad'i Yuab enggu su manga sundalu nin enggu su kapembunua nilan. 8 Pidtalu nin bun kani Uriya i “Uli ka pan muna ka enggu ka makapangintelenen.” Na linemiu den si Uriya kanu tulugan nu datu. Saleta mambu na pinasigkilan sekanin nu Daud sa manga makan enggu ped pan a inenggay nin lun lu kanu walay nin. 9 Ugaid'a dala uli si Uriya ka lu sekanin tinemulug kanu bengawan nu tulugan nu datu a kaped'in su manga tameng'u datu a mapulu nin. 10 Na guna katawi nu Daud i dala uli si Uriya na inipatawag'in sekanin ka inidsan nin sa “Ngintu ka da ka uli? Inunta na nauget ka den dala makauli.” 11 Na nia inisumpat'i Uriya na “Di ku man matika i muli aku sa walay ka 'gkan-kan aku, minem aku taman sa dulugen ku su kaluma ku inunta na su Kaun nu Kapasadan nu Kadenan enggu su manga sundalu nu Israil apeg'u tupu nu manga taw a Yahuda taman kanu mapulu nami a si Yuab enggu su 'gkangaunutan na lu silan kanu pegkampuan kanu kadatalan. Na ibpasad ku i di ku i entu matika enggula.” 12 Na guna su maitu na nia pidtalu nu Daud kani Uriya na “Edtangen ka muna sia ka namag ku bu seka pambalinganen lu sa kampu.” Na midtangen pan mambu si Uriya kanu entu a gay lu sa Awrusalim. Na kanu tinemundug a gay 13 na inenggat'u Daud sekanin keman enggu minem taman sa linangut'in ugaid'a dala bun sekanin uli kanu entu ba a magabi ka lu bun sekanin tinemulug a kaped'in su manga tameng'u Daud a mapulu nin.
Su Kinapaimatay nu Daud kani Uriya
14 Na kanu mapita na pinambalingan den nu Daud si Uriya a pinadtapik'in sa sulat lu kani Yuab. 15 Na nia dalem'u sulat na “Papangunan ka si Uriya kanu kapembunua entu pan ka edsunud kanu amaika mayaw den su kapembunua ka enggu sekanin matay.” 16 Na gagalu nu kabpelibet'ilan sa kanu kabpelusud'ilan kanu siudad a Rabba na lu pinambetad'i Yuab si Uriya kanu nambetadan nu mangategel a kuntela nilan. 17 Na saleta mambu na nameliu su manga sundalu nu siudad ka inatuan nilan si Yuab enggu su manga sundalu nin taman sa minatay si Uriya a taw a Hit apeg'u ped pan a manga sundalu nu Daud. 18 Na guna su maitu na napapait sa katigan si Yuab lu kanu Daud makapantag kanu 'gkambebetad'u kapembunua nilan. 19 Na nia nin inipamapata kanu sinugu nin na “Amaika mapasad'engka den manudtul kanu datu makapantag kanu kinambunua, 20 na upama ka malipunget sekanin enggu nia nin edtalun sa leka na ‘Ngintu ka sinemupeg kanu a benal kanu siudad? Di nu 'gkapagitung i mapakay kanu a masugat'u busug ebpun kanu alad'ilan a watu? 21 Di nu 'gkagkalendem u panun i kinapatay ni Abimilik a wata ni Yirub-Baalb lu sa dalepa a Tibis? Dikena ba inulugan bu sekanin nu babay sa galingan a watu a sabapan na kinapatay nin? Na ngintu ka minubay kanu bun kanu alad?’ Na nia ka edtalu sa lekanin na ‘Minatay den si Uriya a taw a Hit.’ ”
22 Daka ginemanat den mambu su sinugu ka inisampay nin den kanu Daud su langun na pidtalu a entu ni Yuab sa lekanin. 23 Na nia nin pidtalu kanu Daud na “Napasangan kami nu manga kuntela nami ka linusudan kami nilan lu kanu kadatalan, ugaid'a napaneled'ami silan taman kanu bengawan nu siudad'ilan. 24 Daka pinamusug kami nu manga pabubusug'ilan a lu kanu alad, taman sa minatay su ped kanu manga sundalu nengka apeg den ni Uriya a taw a Hit.” 25 Daka nia pidtalu nu Daud kanu sinugu a entu na “Edtalu ka kani Yuab i di nin ikalidu sa ginawa su nanggula a entu kagina sia kanu kapembunua na di ta katawan u entain i matay. Edtalu ka bun sa lekanin i pagkabagelen nin su ginawa nin enggu makin mapakabagel silan sia kanu kabpamelusud'ilan kanu siudad ka enggu nilan masakup.”