Su Kinadaway nu Nabi Natan kanu Daud
12
Na sinugu nu Kadenan a Mapulu su Nabi Natan lu kanu Daud. Na nia nin pidtalu kanu Daud na “Aden dua kataw a mama a lu pegkaleben kanu isa a dalepa. Su sakataw na kawasa enggu su sakataw menem na miskinan. 2 Na su kawasa na madakel i bili-bili nin enggu manga sapi nin 3 ugaid'a su miskinan na dala ped a kaaden nin, nia tabia na su satiman bu a bili-bili a napamasa nin. Na tiniakapan nin taman sa pinagkasela nin a kaped'u manga wata nin. Na u ngin i pegken nilan na maitu bun ba i pegken nin, pebpaginemen nin kanu basu nin demun enggu pedsasapipin nin a mana bun wata nin a babay. 4 Na aden nakauma a ana nu kawasa a mama. Na dala sekanin sumbali kanu manga sapi nin atawa ka kanu manga bili-bili nin a makan nu ana nin ka nia nin sinumbali na su bili-bili nu miskinan a entu ka entu ba i inipakan nin kanu ana nin.” 5 Na sabap sa entu na sangat a nalipunget su Daud kanu kawasa a mama taman sa nia nin nadtalu kanu Natan na “Ipedsapa ku kanu Kadenan a Mapulu i dait a matay su entu a taw 6 enggu dait a kabayadan nin sa makapat takep su bili-bili nu miskinan a entu sabap kanu kinanggula nin sa entu enggu su kada na lat a nanam'in.”7 Daka nia pidtalu nu Nabi Natan kanu Daud na “Seka i taw a entu. Na nia ba su katigan nu Kadenan a Mapulu a Kadenan nu manga taw a Israil: ‘Pinamili ku seka a mabaluy a datu nu manga taw a Israil enggu inilipuas ku seka kani Saul 8 taman sa inenggay ku sa leka su pendatuan nin enggu su manga kaluma nin apeg den nu lusud'u Israil enggu Yahuda. Na amaika kulang pan su entu, na enggan ku pamun seka sa minuna pan i kadakel'in sa entu ba. 9 Ugaid'a ngintu ka sinungkang'engka su kasuguan ku? Ka makin nia nengka pinggula na su di ku a benal a entu 'gkasuatan. Na pinaimatayan nengka kanu manga taw a Amun si Uriya a taw a Hit ka inagaw nengka sa lekanin su kaluma nin. 10 Na sabap kanu nia a pinggula nengka na iganat saguna na di den maawa su kabpapataya nu manga sakambinabatan nengka kagina sinungkang aku nengka enggu kinua nengka su kaluma ni Uriya a taw a Hit ka pinangaluma nengka.’ 11 Na nia pan katigan nu Kadenan a Mapulu na ‘Mangaden aku sa dikena mapia kanu lusud'u sakambinabatan nengka a menggay sa leka sa masela a kasamukan. Inggay ku kanu ped a mama su manga kaluma nengka. Na dulugen nin silan sa apia kesi-kesi na malamag. 12 Ka pinggula nengka man su entu sa nakapagena ugaid'a su enggulan ku a nia na enggulan ku sa mapayag kanu langun na taw a Israil.’ ” 13 Na nia nadtalu nu Daud kanu Natan na “Nakandusa aku kanu Kadenan a Mapulu.” Na nia inisumpat'u Natan na “Inampun den nu Kadenan a Mapulu su kadusan nengka, di ka den matay nu entu a kadusan nengka. 14 Ugaid'a sabap sa sinungkang'engka su Kadenan a Mapulu na matay su embatan a wata nengka.” 15 Na guna su maitu na minuli den su Nabi Natan kanu walay nin.
Su Kinapatay nu Wata nu Daud enggu Batsiba
Saleta mambu na pigkahanda nu Kadenan a Mapulu i demalu sa mapasang su wata nu Daud enggu Batsiba.
16 Na guna su maitu na inipamagayuk mangeni nu Daud kanu Kadenan i pagkapian nin su wata. Na mibpuasa sekanin enggu kanu nalalamagan na miniga bu sekanin kanu lupa. 17 Na su 'gkangasaligan lu kanu tulugan na pibpawangan nilan sekanin ka enggu nilan makapambangun enggu makapakan a kaped'ilan ugaid'a dala sekanin kiug. 18 Na kanu ikapitu nin gay na minatay su wata. Na sangat a 'gkangagilekan su manga panunugun nu Daud kanu kadtalu nilan lun i minatay den su wata. Kagina nia 'gkadtalu na ginawa nilan na “Panun ba i kadtalu tanu lun i minatay den su wata? Kagina apia kanu timpu a bibiag pan su wata na di tanu nin ibpamamantag. Na aden a entu na pakasakitan nin i ginawa nin.” 19 Na guna madsima nu Daud i 'bpamagedunga su manga panunugun nin, na lu nin ba natawan i minatay den su wata. Daka inidsan nin su manga panunugun nin sa “Minatay den su wata?” Na nia nilan nakasumpat na “Uway, minatay den sekanin.” 20 Na guna su maitu na mimbangun su Daud ka mibpaigu enggu sinemidsing sa kamutan a lana taman sa midsambi sa balegkas entu pan ka linemu kanu walay a pedsimban kanu Kadenan a Mapulu ka sinemimba sekanin. Na guna sekanin makapasad semimba na minuli sekanin ka napatalagad ka kineman. 21 Na nia pidtalu nu manga panunugun nin na “Di nami seka 'gkasabutan. Ka kanu bibiag pan su wata na mibpuasa ka enggu naguguliang ka, ugaid'a guna matay su wata na mimbangun ka enggu kineman.” 22 Na nia inisumpat'u Daud na “Uway, mibpuasa aku enggu naguguliang aku kanu timpu a bibiag pan su wata kagina nia ku 'gkainam na aden a entu na latan aku nu Kadenan sa nanam enggu di nin isugut a matay su wata. 23 Ugaid'a saguna a minatay den sekanin na enduken ka pakabpuasa aku pan? Di ku den sekanin makapambibiag. Mauma bun i timpu a makalu aku kanu nabetadan nin ugaid'a sekanin na di den makambalingan sia sa laki.”
Su Kinambata kanu Sulaiman
24 Na linimpang'u Daud su kaluma nin a si Batsiba kanu kinalidu na ginawa nin taman sa dinulug'in. Na migkagingay si Batsiba taman sa nakambata sa wata a mama a binedtuan sa Sulaiman. Na inikalimu nu Kadenan a Mapulu su wata a entu. 25 Na napapait sekanin sa katigan kanu Nabi Natan sa nia ibedtu kanu wata na Yadidayaa kagina inikalimu sekanin nu Kadenan a Mapulu.
Su Kinasakup'u Nabi Daud kanu Dalepa a Rabba
26 Na linusudan ni Yuab su siudad a Rabba a dalepa nu manga taw a Amun taman sa nasakup'ilan su pegkalebenan nu datu. 27 Na napapait sa katigan si Yuab lu kanu Daud sa “Linusudan nami su dalepa a Rabba enggu nasakup'ami su 'bpamelimudan nilan sa ig. 28 Tembu saguna na limud ka su manga nasama a manga sundalu ka sia kanu ka seka i imasad kanu kapedsakup'ami a nia kanu siudad ka enggu seka i mabadtug, dikena saki.” 29 Daka linimud mambu nu Daud su langun nu manga sundalu ka linusudan nilan su siudad a Rabba taman sa nasakup'ilan su entu. 30 Na kinua nu Daud su sansangan a bulawan kanu ulu nu datu nu manga taw a Amun ka inidsansangan nin kanu ulu nin. Na nia kaugat'u sansangan na telupulu enggu lima kakilu enggu aden pan nakabetad lun a manga mapulu i alaga nin a palamata. Na madakel pan i pinangua nu Daud kanu entu a siudad. 31 Na su langun nu taw lu na binaluy nin a ulipen enggu pinanggalebek'in silan. Aden 'bpangeget, aden 'bpamiku, aden pendadu enggu aden bun 'bpangumbal sa pinadtegas a budta. Na maya ba i pinakaidan nu Daud kanu langun nu manga taw a Amun kanu manga dalepa nilan. Na guna mapasad su entu na minuli den su Daud apeg'u manga sundalu nin lu sa Awrusalim.