Su Kinandupang'i Amnun kani Tamar
13
Na su wata a mama nu Daud a si Absalum na aden suled'in a babay a bedtuan sa Tamar a sangat i kanisan nin. Na naipus su manga timpu na si Amnun a wata bun a mama nu Daud kanu ped a kaluma nin na 'gkalinian nin si Tamar. 2 Ugaid'a di nin 'gkanggula su pegkiugan nin penggula kani Tamar kagina laga pamun si Tamar na dala pamun pakasupeg lun a mama. Na sabap sa entu na nalidu a benal i ginawa ni Amnun taman sa dinemalu sekanin. 3 Na aden pakat'i Amnun a bedtuan sa Jonadab a mategel i akal'in sa dikena mapia a pakiwatan bun nu Daud ka wata nu suled'in a si Simia. 4 Na aden isa a gay a inidsan ni Jonadab si Amnun sa “Nginan ka uman gay na malugkug ka bu, inunta na wata ka nu datu? Edtalu ka kun sa laki u ngin i kamutuan nengka.” Na nia lun inisumpat'i Amnun na “'Gkalinian ku su suled ku a si Tamar a ali nu suled ku a si Absalum.” 5 Na guna su maitu na nia pidtalu sa lekanin ni Jonadab na “Iga ka kanu bilik'engka, ka pamagigiling ka sa di 'gkapia i ginawa nengka. Na amaika kakapen ka nu ama nengka na nia ka lun edtalu na ‘'Bpangenin ku sa leka i pasia ka pan su suled ku a si Tamar ka enggu aku nin 'gkaumbalan sa makan sia kanu kasangulan ku enggu mapanungit aku nin.’ ”6 Daka miniga den mambu si Amnun ka namagigiling sa pendalu. Na guna sekanin kakapa nu Datu Daud na nia nin pidtalu na “'Bpangenin ku sa leka i pasia ka pan su suled ku a si Tamar ka enggu aku nin 'gkaumbalan sa makan a pan sia kanu kasangulan ku enggu mapanungit aku nin.” 7 Na guna su maitu na inipalapit'u Daud si Tamar enggu nia nin lun pidtalu na “Sia ka saguna kanu walay nu suled'engka a si Amnun ka enggu nengka kapaginatulan sa makan.” 8 Daka linemu den mambu si Tamar kanu walay nu suled'in a si Amnun a nauman nin a 'bpagiga. Na nia nin kinauma lu na kinemua sekanin sa arina ka inadum'in a 'gkailay bun ni Amnun enggu inilutu nin. 9 Entu pan ka init'in lu kani Amnun ka enggu nin makapakan lun, ugaid'a dala kan si Amnun ka nia nin pidtalu kanu manga ped a taw lu na “Pameliu kanu pan langun.” Na linemiu mambu su langun nu taw lu. 10 Entu pan ka pidtalu nin menem kani Tamar i “Anggit ka su makan a nan sia sa bilik ku ka sia aku ba panungit.” Daka inanggit den mambu ni Tamar su entu. 11 Na gagalu nu kabpanungit'in lun na sinegedan sekanin ni Amnun enggu nia nin lun pidtalu na “Endulug ta, ali ku.” 12 Na nia inisumpat'i Tamar na “Kaka, di ka penggula i nan ka kadupangan i nan a galebek. Di a benal 'gkawagib a manggula i nia sa lusud'u Israil. 13 Ngin pan i beneng a isangul ku kanu manga taw amaika enggulan nengka i nan? Na seka menem na mabadtug ka sa kadupang kanu lusud'u Israil. Tembu 'bpangenin ku sa leka saguna i imbitiala nengka su datu makapantag sa nia ka 'gkasigulu ku i sugutan ka nin man sa kapangaluma nengka sa laki.” 14 Ugaid'a dala sekanin pakikinega ni Amnun. Na kagina ka mabagel sekanin kumin kani Tamar na nadupang'in sekanin.
15 Na guna mapasad su entu na di den 'gkalinian ni Amnun si Tamar. Na su kapegkalilini nin lun paganay na nasambian na sangat a kapegkabensi sa lekanin taman sa nia nin pidtalu kani Tamar na “Liu ka sia!” 16 Na nia inisumpat'i Tamar na “Di aku lemiu, kagina labi pan i kawag'a kabpamugaw nengka a nan sa laki kumin kanu pinggula nengka sa laki.” Ugaid'a dala sekanin pakikinega ni Amnun 17 ka makin nin tinawag su manguda a panunugun nin enggu nia nin lun pidtalu na “Paliu ka i babay a nia sia, entu pan ka alidi ka i pintuan a nan.” 18 Daka pinaliu si Tamar nu panunugun ni Amnun taman sa inalidan nin su pintuan. Na kanu entu ba na nakambalegkas sa mapia a lambung si Tamar kagina entu ba i balegkas'u manga laga a wata nu datu kanu entu a timpu. 19 Na sabap kanu nanggula a entu ni Tamar na kinisi nin su mapia a lambung'in enggu binetadan nin sa aw su ulu nin. Entu pan ka linemakaw sekanin a 'bpaguguliang sa matanug a pinangutu nin su lima nin a tanda a 'gkagagawan.
20 Na guna sekanin mailay nu suled'in a si Absalum na inidsan nin sa “Ngintu, aden pinggula ni Amnun sa leka a mawag? Na amaika aden na di ka den pedtalu-talua ka suled'engka bun sekanin. Di ka den gaid 'bpagitunga su entu a nanggula nengka.” Na lu migkaleben si Tamar kanu walay ni Absalum ugaid'a tatap sekanin malugkug. 21 Na guna katawi nu Daud su entu na sangat a nalipunget sekanin.a 22 Ugaid'a si Absalum na dala pidtalu nin kani Amnun ugaid'a sangat a nabensian nin sabap kanu pinggula nin kanu suled'in a si Tamar.
Su Kinasuli ni Absalum
23 Na guna maipus su nakadua lagun na papedtebpedan ni Absalum sa bumbul su manga bili-bili nin lu kanu dalepa a Baal Hasur a masupeg sa dalepa a Ipraim. Na inenggat'in su langun nu wata a mama nu datu. 24 Na linemu si Absalum kanu datu ka pidtalu nin lun i “Papedtebpedan ku sa bumbul su manga bili-bili ku, na 'bpangenin ku sa leka u mapakay bu na makatalabuk ka apeg'u 'gkangasaligan nengka.” 25 Ugaid'a nia inisumpat'u datu na “Di aku den temalabuk wata ku, ka kapasangan ka pan amaika temalabuk kami langun.” Na ipedtegel bun ni Absalum i katalabuk'in ugaid'a da bun sekanin kiug. Ka nia nin pinggula na pinalihalan nin sekanin. 26 Na guna su maitu na nia pidtalu ni Absalum na “Amaika maitu na 'bpangenin ku sa leka i nia ka den paunut na su suled ku a si Amnun.” Na nia inisumpat'u datu sa lekanin na “Enduken ka pegkiugan nengka pan pebpagunut sekanin?” 27 Ugaid'a tinegel bun sekanin ni Absalum sa entu tembu sinugutan nin den a makaunut si Amnun enggu su langun nu manga wata nin a mama.
Na migkanduli si Absalum sa masela a mana kinagkanduli na datu. 28 Na saleta mambu na sinugu ni Absalum su manga panunugun nin sa “Amaika malangut den si Amnun na enggulinganan ku sekanu ka imatayi nu. Na da kanu 'gkagilek ka saki i pedsugu sa lekanu. Pagkabagel'u i aki nu enggu da kanu endua-dua.” 29 Daka pinggula den mambu nu manga panunugun ni Absalum su inisugu nin kanilan ka inimatayan nilan si Amnun. Na guna su maitu na su langun nu manga wata a mama nu datu na namegkuda silan kanu manga pegkudan nilan a bedtuan sa mulab ka namangawa mamagayas ka nagilekan.
30 Na gagalu nu sia pan silan sa lalan na aden nakadtalu kanu Daud sa “Pinangimatayan ni Absalum su langun nu manga wata nengka a mama enggu apia sakataw na dala nasama kanilan.” 31 Daka nakadtindeg su Daud ka kinisi nin su balegkas'in enggu miniga kanu lupa. Na su 'gkangasaligan a nakabalibet sa lekanin na pinangisi nilan bun su manga balegkas'ilan. 32 Daka nia pidtalu ni Jonadab a wata a mama nu suled'u Daud a si Simia na “Hu datu, dala maibped matay su manga wata nengka, nia bu minatay na si Amnun. Nauget den man pegkahandan 'bpagimatay ni Absalum si Amnun sabap kanu kinandupang'in kanu suled'in a si Tamar. 33 Tembu da ka 'bpaginugut sa minatay langun su manga wata nengka a mama ka nia bu man minatay na si Amnun.”
34 Saleta mambu na si Absalum na minawa den.
Na kanu entu bun ba na aden nailay nu pedtameng kanu alad'u Awrusalim a pakauma a madakel a taw a pakabpun kanu sedepan kanu ligid'u bakulud tembu su pedtameng na linemu kanu datu ka pidtalu nin su nailay nin a entu. 35 Daka nia pidtalu ni Jonadab kanu datu na “Hu datu, ilay ka su manga wata nengka a mama, pakauma den silan a mana bun su pidtalu ku sa leka.” 36 Na endaw i kinapasad'in edtalu na nakauma su manga wata a mama nu Daud a 'bpamanguliang sa matanug. Na sangat a nakauliang bun su Daud apeg'u 'gkangasaligan nin. 37 Na nauget a gay na ginagawan bu su Daud kanu kinapatay nu wata nin a si Amnun. Na saleta mambu na su kinaawa ni Absalum na lu sekanin mibpawang kanu datu nu dalepa a Gisur a si Talmai a wata a mama ni Amihud. 38 Na namakatelu lagun i kinagkakaleben nin lu. 39 Na guna su naawa den su kinagagaw nu Datu Daud kani Amnun, na nia nin menem natademan na si Absalum.