Su Kinambalingan ni Absalum sa Awrusalim
14
Na guna katawi ni Yuab a wata a mama ni Siruya i 'gkatademan den a benal'u Daud si Absalum, 2 na inipatawag'in su balaitungan a babay a taw sa dalepa a Tikua. Na nia kinauma nu babay a entu na nia pidtalu ni Yuab sa lekanin na “Pamagigiling ka sa 'gkagagawan enggu embalegkas ka sa balegkas'u 'gkagagawan. Da ka bun 'gkamutan enggu pamagigiling ka sa nauget den 'gkagagawan sabap sa pinatayan ka. 3 Na lu ka kanu datu ka edtalu ka su pedtalun ku a nia sa leka.” Daka pidtalu den mambu ni Yuab su ipapedtalu nin kanu babay lu kanu Daud.4 Na guna makauma su babay kanu datu na sinemugiud sekanin kanu adapan nin ka pidtalu nin lun i “Hu datu, tabangi aku nengka pan kanu kamutuan ku.” 5 Na nia inisumpat'u datu na “Ngin i entu ba a kamutuan nengka?” Na nia inisumpat'u babay na “Balu aku kagina minatay den i kaluma ku. 6 Na aden dua kataw a wata ku a mama, na aden gay a nalimbul silan lu kanu 'bpangangawidan, na sabap sa dala nakasapal kanilan na minatay nu sakataw su suled'in. 7 Na sabap sa entu na pibpawangan aku nu manga pagali ku ka pebpegesen aku nilan sa nia nilan pidtalu na ‘Ipalad'engka sa lekami su wata nengka a minimatay kanu suled'in ka enggu nami sekanin kaimatayan sabap kanu kinaimatay nin a entu kanu suled'in. Na di dait a makapangiwalis sekanin kanu kaaden nu ama nin.’ Na amaika enggulan nilan su entu na nia nin maena na 'gkalinian nilan a benal i da den masama sa laki a wata taman sa mapunas den su ngala nu kaluma ku sia sa dunia.” 8 Daka nia pidtalu nu datu kanu babay na “Uli ka den, ka saki bu i mataw sa entu. Semugu aku sa di nilan den pakasakitan su wata nengka.” 9 Na nia inisumpat'u babay na “Hu datu a mapulu ku, amaika kapanila-tilan ka nu manga taw sabap kanu kinapaninindeg'engka a nia sa laki, na saki taman kanu sakambinabatan ku i dait a makagkulub sa entu.” 10 Na nia pidtalu nu datu na “Apia entain i semamuk sa leka pantag sa nia ba na anggit'u sia sa laki ka enggu di ka nilan den masamuk.” 11 Na pidtalu pan nu babay i “Hu datu, na 'bpangenin ku sa leka i idsapa nengka sa laki sia kanu adapan nu Kadenan a Mapulu a Kadenan nengka i su manga pegkiug pedsuli kanu wata ku na di den makatalus asal'a di den matay su nasama a wata ku.” Na nia inisumpat'u Daud na “Idsapa ku sia kanu adapan nu Kadenan a Mapulu i dala mawag a manggula nu wata nengka.”
12 Na nia pidtalu nu babay na “Hu datu a mapulu ku, aden pamun 'bpangenin nu panunugun nengka sa leka.” Nia inisumpat'u datu na “Edtalu ka u ngin i entu ba.” 13 Na nia menem pidtalu nu babay na “Ngintu ka di nengka penggulan kanu manga taw nu Kadenan su inidsapa nengka a nan sa laki a enggulan nengka? Ka timbang man a sinugat'engka sa kawagib su ginawa nengka kanu manga pidtalu nengka a entu sa laki kagina su wata nengka mismu a minawa na dala nengka pambalingana sia. 14 Na langun tanu bun na matay a mana ig a 'gkaudud kanu lupa a di den makua 'bpaluman. Ugaid'a su Kadenan na di nin matag kuan su umul'u taw ka 'bpaginapasen nin pan muna su kambalingan nu taw a pedtaligkud sa lekanin. 15 Hu datu, sinemia aku sa leka asal'a madtalu ku su kamutuan ku kagina 'gkagilekan aku kanu manga pagali ku a entu. Na napagitung'u panunugun nengka i kadtalu nin sa leka sa entu, ka aden a entu na sawalen nengka su 'bpangenin nin. 16 Na amaika maitu na makalipuas'engka su panunugun nengka taman kanu wata nin kanu taw a pegkiug pegkua kanu kalupan a inibpusaka nu Kadenan kanilan. 17 Na nia napagitung'u panunugun nengka na su kadtalu nengka na makaenggay sa kalilintad kanu panunugun nin kagina mana ka malaikat'u Kadenan a 'gkatawan nengka u ngin i mapia atawa ka mawag. Na tapiden ka nu Kadenan a Mapulu a Kadenan nengka.”
18 Na nia pidtalu nu datu kanu babay na “Aden makaidsa ku sa leka, na sawal aku nengka sa bantang.” Na nia inisumpat'u babay na “Hu datu, uway! Ngin i idsa nengka?” 19 Na nia inidsa nu datu na “Ngintu, si Yuab ba i namandu sa leka sa nia?” Na nia inisumpat'u babay na “Hu datu a mapulu ku, saben-sabenal a da makapagena sa leka. Uway, si Yuab a 'gkaunutan nu manga sundalu nengka i sinemugu sa laki sa kanggula ku sa nia enggu sekanin bun i namandu sa laki u ngin i dait a edtalun ku sa leka. 20 Na pinggula nin i nia asal'a makapagayun kanu kanu wata nengka a si Absalum. Ugaid'a aden ilemu nu datu a mana su ilemu nu malaikat'u Kadenan sa kataw nin kanu langun nu 'gkanganggula nu dalepa nin.” 21 Na guna su maitu na inipatawag'u datu si Yuab ka nia nin lun pidtalu na “Ipedsugut ku den i kambalingan sia nu wata ku a si Absalum. Na lapit ka den sekanin.” 22 Daka sinemugiud si Yuab kanu adapan nu datu enggu nia nin lun pidtalu na “Hu datu a mapulu ku, palihalan ka nu Kadenan. Na saguna na natawan ku i 'gkasuatan aku nengka sabap kanu kinasugut'engka kanu 'bpangenin ku sa leka.” 23 Na linemu den mambu si Yuab sa Gisur ka linapit'in den si Absalum embalingan sa Awrusalim. 24 Na nia pidtalu nu datu na “Lu nu pauli kanu walay nin, ka di ku sekanin 'gkalinian 'bpagilaya.” Na minuli den mambu si Absalum kanu walay nin taman sa da den mambu sekanin pailay kanu datu.
Su Kinaampun nu Daud kani Absalum
25 Na dala makalawan kanu kapia na buntal'i Absalum kanu lusud'u Israil ka dala makatila nengka kanu buntal'in. 26 Na makaisa bu sa uman lagun i kapapedtabungaw nin amaika 'gkaugatan den sekanin kanu buk'in. Na amaika timbangen su buk'in a natebped na pakasaut sa subela dua kakilu sia luyud kanu timbangan nu datu. 27 Na aden telu kataw a wata a mama ni Absalum enggu sakataw a babay a bedtuan sa Tamar a sangat i kanisan nin. 28 Na nakadua lagun i kinagkaleben ni Absalum sa Awrusalim a dala pailay kanu datu. 29 Daka inipatawag'i Absalum si Yuab ka pedsugun nin lu kanu datu, ugaid'a da sekanin lu. Na inipatawag'in menem 'bpaluman ugaid'a dala bun sekanin lu. 30 Na guna su maitu na nia nin pidtalu kanu manga panunugun nin na “Tutung'u su pamumulanen ni Yuab a bantad a barli lu kanu 'bpangangawidan nin a masupeg kanu 'bpangangawidan ku.” Daka tinutung'ilan den mambu su entu. 31 Na guna katawi ni Yuab su entu na pibpawangan nin si Absalum lu kanu walay nin ka inidsa nin lun i “Ngintu ka tinutung'u manga panunugun nengka su 'bpangangawidan ku?” 32 Na nia inisumpat'i Absalum na “Kagina inipatawag ku seka na dala aku nengka ipamamantag. Ka nia ku man kapapedtawag sa leka na pedsugun ku seka lu kanu datu ka ipebpagidsa ku lun sa leka u ngintu ka inipalapit aku nin pan lu sa Gisur? Ka nia paman tinemu i dala aku nin den ipalapit lu! Na saguna na anggit aku nengka lu kanu datu, ka amaika aden kadupangan ku na imatayan aku nin den.” 33 Na linemu den mambu si Yuab kanu datu ka inisampay nin su katigan ni Absalum. Daka inipatawag'u datu si Absalum, na endaw i kinauma nin na sinemugiud sekanin kanu adapan nu datu, entu pan ka sinium mambu sekanin nu datu.