Su Kinaagaw ni Absalum sa Kadatu kanu Daud
15
Na guna maipus su entu na nakakua si Absalum sa kalisa, manga kuda enggu limapulu kataw a taw nin a pedtatanggunut lun. 2 Na uman-uman gay na pebpanay sekanin penggedam ka 'bpelu kanu ligid'u bengawan nu siudad. Na amaika aden taw lu a pakauma a pebpanun kanu kamutuan nin lu kanu datu na 'bpagidsan sekanin ni Absalum u endaw sekanin nakaganat a siudad. Na amaika nia ipedsumpat'u taw a entu i “Su panunugun nengka na ebpun kanu nia a tupu nu manga taw a Israil,” 3 na nia pedtalun ni Absalum kanu taw a entu na “Masela i inam'engka sa makataban ka kanu kamutuan nengka a nan, ugaid'a dala nakabetad'u datu a kasaligan a makadtabang sa leka.” 4 Nia pan pedtalun ni Absalum na “Amaika saki bu i 'bpangukum kanu nia a dalepa, na su langun na pedsupeg a aden kamutuan nin na inggay ku lun su kawagib'in.” 5 Na amaika aden pedsupeg sa lekanin a 'bpeludsu pedsugiud na pegkawan nin 'bpamagayas su lima nu entu a taw ka pedsiumen nin a tanda na kapedsalam'in lun. 6 Na maitu ba i papegkaidan ni Absalum kanu langun nu taw a Israil a pebpanun kanu kamutuan nilan lu kanu datu. Na kanu maitu ba a ukit i kapegkua nin kanu salig'u manga taw a Israil.7 Na guna maipus su nakapat lagun na nia pidtalu ni Absalum kanu datu na “Hu datu, suguti aku sa makalu aku sa Hibrun asal'a matuman ku su inibpasad ku kanu Kadenan a Mapulu. 8 Kagina su panunugun nengka na mibpasad kanu Kadenan kanu timpu a lu pan sa dalepa a Gisur a sakup'u dalepa a Aram sa amaika pambalinganen aku pan nu Kadenan a Mapulu sia sa Awrusalim na simban ku sekanin lu sa Hibrun.” 9 Na nia pidtalu nu datu sa lekanin na “Ganat ka sa aden kalilintad'in.” Na ginemanat mambu si Absalum ka linemu sa Hibrun. 10 Ugaid'a guna makauma si Absalum lu sa Hibrun na aden sinugu nin sa dala nakataw lun lu kanu manga tribu nu manga taw a Israil sa nia nilan edtalun na “Amaika makineg'u su uni nu tambuli na ilalis'u edtalu i ‘Si Absalum den i datu lu sa Hibrun.’ ” 11 Na kanu kinalu ni Absalum sa Hibrun na pinaunut'in su dua gatus a manga taw ugaid'a dala sabut'u manga taw a entu kanu kahanda ni Absalum. 12 Na gagalu nu kapegkurban ni Absalum na inipalapit'in si Ahitupil a isa kanu manga 'bpamapata kanu Daud lu kanu siudad'in a Gilu. Na pegkadakel-pegkadakel bun i manga taw a pedtampil kani Absalum a sungkang kanu Daud.
Su Kinaawa nu Daud lu sa Awrusalim
13 Aden nakauma a katigan kanu Daud sa su manga taw a Israil na lu den tinemampil kani Absalum. 14 Daka nia pidtalu nu Daud kanu manga taw nin a 'gkangaunutan sa Awrusalim na “Nia dait na makaawa tanu den sia sa magan sa magan gagalu na di tanu pan 'bpelusudan ni Absalum ka kauman tanu nin sia na pangimatayan tanu nin langun taman sa makalalagit pan su manga taw sia sa lusud'u Awrusalim.” 15 Na nia inisumpat'u 'gkangaunutan nu datu na “Adil kami sa kanggula kanu ngin i edtalun nengka.” 16 Tembu minawa mamagayas su Daud a kaped'in su langun nu sakambinabatan nin ugaid'a initabun nin su sapulu kataw a kaluma nin a panunugun asal'a makatiakap kanu tulugan. 17 Minunut bun su langun nu manga taw nin. Na mibpelen silan lu kanu walay a lu kanu tedtaban nu siudad. 18 Na pinauna nu Daud su langun nu 'gkangasaligan nin apeg'u manga tameng'in a manga taw a Kirit, manga taw a Pilit enggu su nem gatus a manga taw a Git a minunut sa lekanin ebpun sa dalepa a Gat ka inilay nin silan.
19 Daka nia nin pidtalu kani Itai a taw a Git na “Nginan ka apeg'engka na 'bpagunut sa lekami? Embalingan ka lu sa Awrusalim ka lu ka demun kanu datu, kagina dikena kanu taw a Israil ka pinaawa kanu bu kanu dalepa nu 20 enggu bagu pamun i kinauma nu sia. Na da kanu den 'bpagunut sa lekami ka dili nami pamun katawan u endaw kami makabpawang. Embalingan ka den apeg'u manga taw nengka ka pangeni-ngenin ta i ipailay nu Kadenan a Mapulu sa lekanu su limu nin enggu su katidtu nin.” 21 Ugaid'a nia inisumpat'i Itai kanu datu na “Hu mapulu ku a datu, ipebpasad ku sa leka sia kanu adapan nu Kadenan a Mapulu i munut kami sa lekanu apia endaw pan sa apia ipatay nami pan su entu.” 22 Daka nia pidtalu nu Daud kani Itai na “Amaika maitu na unut kanu sa laki.” Na minunut den mambu si Itai a taw a Git apeg'u manga taw nin taman kanu manga sakambinabatan nilan.
23 Na namanguliang sa matanug su langun nu manga taw a 'gkangaukitan'ilan gagalu nu kabpagawa nu Datu apeg'u manga taw nin. Na linemipag su Daud enggu su manga taw nin lu kanu lepak a 'bpagukitan nu ig sa dalepa Kidrun ka linemu silan kanu tawan-tawan a dalepa.
24 Na lu bun si Saduk apeg'u manga tupu nu Libi a pedsapuat kanu Kaun nu Kapasadan kanu Kadenan. Na gagalu nu kapengganat'ilan na inibetad'ilan muna su Kaun nu Kapasadana taman sa nakaganat langun su manga taw kanu siudad. Na kaped'ilan bun si Abiatar a 'bpangurban. 25 Na guna su maitu na nia pidtalu nu Daud kani Saduk na “Imbalingan nu lu sa siudad su Kaun nu Kapasadan kanu Kadenan. Na amaika kasuatan aku nu Kadenan a Mapulu na pambalinganen aku nin bun enggu ipailay nin sa laki 'bpaluman su Kaun nu Kapasadan enggu su dalepa a pedsimban sa lekanin. 26 Ugaid'a amaika nia nin edtalun i ‘Di ku seka 'gkasuatan’ na taliman ku u ngin i pakaidan nin sa laki a makasuat sa lekanin.” 27 Pidtalu bun nu Daud kanu 'bpangurban a si Saduk i “Katawan ku i 'gkasabutan nengka na nia mapia a enggula ka na embalingan ka den sa aden kalilintad'in, paunut'u bun su wata nengka a mama a si Ahimas enggu si Jonatan a wata a mama ni Abiatar, 28 na mangangapa aku lu kanu ligid'u lawas a ig a 'bpelipagan kanu tawan-tawan a dalepa taman kanu kauma nu manga katigan nu.” 29 Daka inimbalingan den mambu ni Saduk enggu Abiatar su Kaun nu Kapasadan kanu Kadenan lu sa Awrusalim taman sa lu ba silan midtangen. 30 Ugaid'a su Daud na tinemakedeg lu kanu Palaw nu Ulibus a 'bpaguguliang a pinangutu nin su lima nin kanu ulu nin enggu dala ampis'u ay nin a tanda a 'gkagagawan. Na pinangutu bun nu manga taw nin su lima nilan kanu ulu nilan enggu 'bpaguguliang bun silan kanu kapedtakedeg'ilan. 31 Na saleta mambu na kanu entu ba na aden nakadtalu kanu Daud sa si Ahitupil na isa den kanu manga tinemampil kani Absalum. Daka nangadap su Daud kanu Kadenan sa nia nin pidtalu na “Hu Kadenan a Mapulu, baluy ka a dala katagan nu manga papata ni Ahitupil.”
32 Na guna makauma su Daud kanu untul'u Palaw nu Ulibus a pedsimban kanu Kadenan na inalaw sekanin ni Husai a taw a Arki a mimbalegkas sa kisi enggu binetadan nin sa lupa su ulu nin. 33 Na nia pidtalu nu Daud sa lekanin na “Dala makadtabang'engka amaika sia ka munut sa laki. 34 Ugaid'a amaika embalingan ka lu sa siudad enggu edtalun nengka kani Absalum i ‘Hu datu, enggalebek aku sa leka a mana su kinanggalebek ku kanu ama nengka,’ na kanu maitu ba a ukit na kadtabangan aku nengka kanu kasungkang'engka kanu manga papata ni Ahitupil. 35 Na madtagapeda nengka bun lu ba su 'bpamangurban a si Saduk enggu Abiatar. Na langun nu makineg'engka lu kanu tulugan nu datu na edtalu ka kanilan. 36 Na lu bun ba si Ahimas a wata a mama ni Saduk enggu si Jonatan a wata a mama ni Abiatar. Na silan i sugu ka kanu manga katigan nengka sia sa laki.” 37 Daka mimbalingan den mambu lu sa Awrusalim si Husai a pakat'u Daud a 'bpamapata sa lekanin. Na natabuan mambu i 'bpeludep si Absalum lu sa siudad.