Su Daud, si Siba enggu si Simi
16
Na dala pamun gaid makatangka su Daud kanu untul'u Palaw nu Ulibus sa kanu kapembaba nin na sinumbak sekanin ni Siba a panunugun ni Mirib-Baal. Na aden pedtundanen nin a dua timan a kimar a linulanan nin sa dua gatus timan a pan, magatus kaakup a unga nu ginangu a ubas, magatus timan a malutu a unga na kayu enggu ig'a ubas a alak a nakabetad kanu taguan a upis'a binatang. 2 Daka nia nakaidsa nu datu kani Siba na “Nginan ka nananggit ka sa nia?” Nia inisumpat'i Siba na “Asal'a kapagedan nu sakambinabatan nengka su manga kimar a nia enggu su manga pan enggu su manga unga nu kayu na makan nu apeg'u manga panunugun nengka, su ig'a ubas a alak menem na mainem'u apia entain sa lekanu i malugat lu kanu tawan-tawan a dalepa.” 3 Na inidsa menem'u datu i “Endaw si Mirib-Baal a apu nu mapulu nengka a si Saul?” Nia inisumpat'i Siba sa lekanin na “Lu sekanin sa Awrusalim ka nia nin kataw ka kanu nia a gay na ipembalingan den sa lekanin nu manga taw a Israil su pendatuan nu tuwa nin a si Saul.” 4 Daka nia pidtalu nu datu kani Siba na “Saguna na su langun nu kaaden ni Mirib-Baal na leka den.” Na nia nakasumpat'i Siba na “Hu datu, enggulan ku u ngin i edtalun nengka, pangeni-ngenin ku i kasuatan aku nu mapulu ku a datu.”5 Na guna su pakauma den su Datu Daud kanu dalepa a Bahurim na aden sinemupeg a mama a pagali nu Saul a bedtuan sa Simi a wata a mama ni Gila ka inipaminta-minta nin su Daud. 6 Na pinamalantay nin sa watu su Daud apeg'u manga taw nin sa apia nabalibet pan su Daud'u manga sundalu nin. 7 Na nia nin ibpelalis pedtalu na “Awa ka sia! Awa ka sia tangimatayn enggu dupang a taw. 8 Na pedsulian ka den man nu Kadenan a Mapulu sabap kanu kinaimatay nengka kanu sakambinabatan ni Saul enggu kanu kinaagaw nengka kanu pendatuan nin. Inenggay den man nu Kadenan a Mapulu kanu wata nengka a mama a si Absalum su pendatuan nengka. Na mabinasa ka den kagina tangimatayn ka a taw.” 9 Daka nia pidtalu ni Abisai a wata a mama ni Siruya kanu datu na “Hu datu a mapulu ku, nginan ka papedtadayn nengka sa kapedsinta nin sa leka su taw a nia a mana asu? Suguti aku sa kaputuk ku lun sa ulu.” 10 Ugaid'a nia pidtalu nu datu kani Abisai enggu kani Yuab na “Sekanu a manga wata a mama ni Siruya na di aku nu den 'bpelusudi sa nia ka amaika sinugu sekanin nu Kadenan a Mapulu sa kasinta nin sa laki na entain aku a semapal sa lekanin?” 11 Pidtalu nin pan kani Abisai enggu kanu langun nu 'gkangasaligan nin i “Amaika apia su wata ku demun ka pegkiugan aku nin 'bpagimatay na labi lawan den guna i taw a nia a tupu nu Buniamin. Na padtaday nu den sekanin kanu kapedsinta nin a nia sa laki ka sinugu sekanin nu Kadenan a Mapulu sa entu. 12 Na aden a entu na 'gkailay nu Kadenan a Mapulu su kapapegkapasang a nia sa laki, na sambian nin sa kapianan su sinta a nia sa laki saguna.” 13 Na pedtalus bun kanu kabpelalakaw nin su Daud enggu su manga taw nin. Saleta mambu na si Simi na pedtundug-tundug bun sekanin a lu kanu ligid'u bakulud a ipedsinta nin bun su Daud enggu 'bpamalantayn nin sa watu enggu lupa. 14 Na guna silan makauma kanu lawas'u ig a Jordan na nangintelenen muna silan ka sangat a nangalugat a benal silan.
Su Papata ni Ahitupil kani Absalum
15 Saleta mambu na si Absalum enggu si Ahitupil apeg'u langun nu manga taw a Israil na nakauma lu sa Awrusalim. 16 Na nakauma bun mambu lu si Husai a taw a Arki a pakat'u Daud a 'bpamapata sa lekanin. Na guna silan makapagilaya kani Absalum na nia nin inilalis na “Palihalan su datu! Palihalan su datu!” 17 Daka nia nakaidsa ni Absalum kani Husai na “Endaw den su senep sa atay a kinadtampil'engka kanu pakat'engka a si Daud? Ngintu ka dala ka unut sa lekanin?” 18 Na nia inisumpat'i Husai na “Di manggula i entu ka nia ku pegkiugan pedtampil na su pinamili nu Kadenan a Mapulu enggu nu manga taw a nia taman den kanu langun nu manga taw a Israil. 19 Na liu pan sa entu na entain pan ba i dait a enggalebekan ku u dikena seka a wata nu mapulu ku? Na mana su kinanggalebek ku kanu ama nengka paganay na maitu bun ba i kanggalebek ku sa leka saguna.”
20 Daka nia pidtalu ni Absalum kani Ahitupil na “Ngin i madtalu nengka a dait a enggulan?” 21 Na nia inisumpat'i Ahitupil na “Dulug ka su manga kaluma nu ama nengka a initabun nin a makatuludu kanu tulugan. Na amaika maitu na katawan kanu lusud'u Israil i tidtu-tidtu a pegkuntelan nengka su ama nengka, na makin mangiseg su kadtampil'u manga taw sa leka.” 22 Na guna su maitu na pinatindegan nilan si Absalum sa balung-balung a tuleda lu kanu pulu nu tulugan. Na 'gkambamatan a benal'u manga taw a Israil su kapendulug'in kanu manga kaluma nu ama nin. 23 Na kanu entu a timpu na su papata ni Ahitupil na ipedtimbang'u manga taw sa kadtalu nu Kadenan. Na su langun nu papata nin na 'bpaginugutan nu Daud enggu Absalum.