17
Na nia pidtalu ni Ahitupil kani Absalum na “Papamili aku nengka sa sapulu enggu dua ngibu a taw ka seleden nami si Daud amay a entu sa magabi. 2 Ka lusudan nami sekanin gagalu nu 'gkalubayan i ginawa nin enggu 'gkalugat. Na amaika maitu na matiagka sekanin taman sa mamakadtatalaguy su manga taw nin. Na nia ku bu imatayan na su datu. 3 Ka su langun nu taw nin na pambalinganen ku sa leka a mana bun su kapembalingan nu babay kanu kaluma nin. Na amaika matay den si Daud na dili den kagkaidan su langun nu taw.” 4 Na mana nakasuat kani Absalum taman kanu 'gkangaunutan nu manga taw a Israil su papata a entu ni Ahitupil.5 Daka nia pidtalu ni Absalum na “Pasia nu si Husai a taw a Arki, ka pakikinegen tanu u ngin i madtalu nin.” 6 Na guna makauma si Husai lu kani Absalum na pidtalu nin lun su papata ni Ahitupil, entu pan ka inidsan nin sa “Ngin i madtalu nengka makapantag sa entu? Na amaika nia nengka lun kapegkailay i di mapia su entu na ngin i makapapata nengka a dait a enggulan?” 7 Daka nia inisumpat'i Husai kani Absalum na “Su kapegkailay ku lun na su papata a nia saguna ni Ahitupil na dikena mapia.” 8 Na pidtalu pan ni Husai i “Kilala nengka bun man su ama nengka enggu su manga taw nin a mangategel i kambunua nilan enggu mangawalaw a mana masela a asua a 'bpagagawan sa pipis. Na liu pan sa entu na su ama nengka na batalu den sa kambunua. Na dili i entu temulug a kaped'u manga taw nin. 9 Na aden a entu na saguna na 'bpamagena den sekanin kanu manga takub atawa ka kanu ped a dalepa. Na amaika patayan tanu a benal sa kalusud tanu kanilan, na apia entain i makakineg sa entu na nia nilan edtalun na pinatayan a benal su manga sundalu ni Absalum. 10 Na apia su mangawalaw a sundalu nengka a mana kawalaw nu alimaw na kukuken na gilek. Ka 'gkatawan man nu langun nu taw a Israil i su ama nengka na mategel i kambunua nin enggu su manga taw nin na mangawalaw a benal. 11 Tembu nia ku makapapata na limud ka su langun nu taw a Israil iganat sa dalepa a Dan taman sa dalepa a Birsiba a mana kadakel'u pedtad sa lagat enggu seka demun i dait a mangunanan kanilan sa kambunua. 12 Na pangilayn tanu su ama nengka apia endaw sekanin nakambetad ka bunun tanu sekanin apia endaw tanu sekanin kauman a mana su lenus a pakatanggub kanu lupa. Na di den sekanin makapalaguy enggu apia sakataw kanu manga taw nin na dala makalipuas kanilan. 13 Na amaika edsunud sekanin lu kanu isa a siudad na su langun nu manga taw a Israil na mananggit sa tali ka iket'ilan kanu alad a watu nu entu a siudad ka udtangen nilan kanu baugan taman sa malupet-lupet.” 14 Daka nia pidtalu ni Absalum enggu su 'gkangasaligan nu manga taw a Israil na “Nia mapia i papata ni Husai a taw a Arki kumin kanu papata ni Ahitupil.” Na saleta mambu na pigkahanda nu Kadenan a Mapulu su entu sa di kapaginugutan su mapia a entu a papata ni Ahitupil ka enggu nin makapalusak si Absalum.
15 Na guna su maitu na pidtalu ni Husai kanu 'bpamangurban a si Saduk enggu Abiatar su papata nin enggu su papata a entu ni Ahitupil kani Absalum taman den kanu 'gkangaunutan nu manga taw a Israil. 16 Pidtalu nin pan kanilan i “Pamagayas kanu semugu lu kani Daud ka edtalu nu lun i di sekanin edtangen sa saguna a magabi lu kanu ligid'u lawas'a ig'u Jordan kanu tawan-tawan a dalepa. Na papamagayas'u silan mapalipag ka amaika di silan makalipag na matay silan langun.” 17 Saleta mambu na si Ahimas enggu si Jonatan na lu silan 'bpangangapa kanu dalepa a In-Rugil ka di nilan 'gkalinian i 'gkailay silan a lemiu lemudep kanu siudad tembu nia nilan bu 'bpanunugun na su panunugun a babay sa kataw nilan u ngin i 'gkanganggula, na u ngin i 'gkadtalu nu babay a entu kanilan na ipedsampay nilan menem kanu Daud. 18 Ugaid'a nailay silan nu bagu sukud a mama, na inipanudtul'in i entu kani Absalum. Daka namagayas silan mawa ka linemu silan kanu walay nu mama a lu kanu dalepa a Bahurim. Na aden kalut'u nia a mama a masiken kanu walay nin, na lu ba silan nagena kanu kalut. 19 Na saleta mambu na su kaluma nu entu a mama na kinemua sa dapeng ka inidapeng'in kanu kalut entu pan ka inagagan nin sa lagas a makan ka enggu dala makataw lun sa aden nagena lu. 20 Na guna makauma lu su manga taw ni Absalum na inidsan nilan su babay sa “Dala nengka mailay si Ahimas enggu Jonatan?” Na nia nin inisumpat kanilan na “Linemipag silan kanu lawas'a ig.” Na guna su maitu na pinangilay nilan lu ugaid'a dala nilan matun, tembu mimbalingan silan lu sa Awrusalim. 21 Na guna su dala den lu su manga taw ni Absalum na tinemepad kanu kalut si Ahimas enggu Jonatan ka linemu silan kanu Daud ka pidtalu nilan lun i mamagayas silan lemipag kanu lawas'a ig sabap kanu inipapata a entu ni Ahitupil. 22 Daka linemipag den mambu su Daud enggu su manga taw nin lu kanu lawas'a ig'u Jordan. Na nia nin kinagkatibuas na nakalipag den silan langun.
23 Na guna katawi ni Ahitupil i dala kapaginuguti su papata nin na migkuda kanu kimar'in ka minuli kanu dalepa nin. Na pinanutuman nin su sakambinabatan nin entu pan ka binitin nin i ginawa nin ka mibpatay. Na lu sekanin inilebeng kanu ubay nu linebengan kanu ama nin.
24 Na su Daud enggu su manga taw nin na nakauma den lu sa dalepa a Mahanaim. Na saleta mambu na si Absalum enggu su manga sundalu nin a manga taw a Israil na nakalipag den kanu lawas'a ig'u Jordan. 25 Na si Amasa i pinamili ni Absalum a mapulu nu manga sundalu nin a inisambi nin kani Yuab. Na si Amasa a nia na wata a mama ni Yatir a tupu nu Ismail.b Na nia nin menem ina na si Abigil a wata ni Nahas a suled'i Siruya a ina ni Yuab. 26 Na lu migkampu si Absalum enggu su manga taw a Israil kanu kalupan nu dalepa a Giliad.
27 Na kanu kinauma nu Daud enggu su manga taw nin kanu dalepa a Mahanaim na inalaw silan ni Subi, Makir enggu si Barsilai. Si Subi na wata a mama ni Nahas a taw a Amun a taw sa dalepa a Rabba enggu si Makir na wata a mama ni Amil a taw sa dalepa a Ludibar, enggu si Barsilai menem na taw a Giliad a taw sa dalepa a Rugilim. 28 Na nananggit silan sa manga 'bpagigan, manga palanggan, manga kuden a lupa, manga bantad, manga bantad a barli, manga arina, manga inilutu a bantad enggu ped pan a lagas a 'gkamun, 29 manga teneb, manga pinadtegas a gatas enggu manga bili-bili ka inenggay nilan kanu Daud enggu kanu manga taw nin, ka 'gkatawan nilan i su manga sundalu na 'gkangagutem enggu pakainem den a benal taman sa nangalubayan den a benal kanu kabpelalag'ilan kanu tawan-tawan a dalepa.