2 Samuil 18

Su Kinapatay ni Absalum

Na linimud'u Daud su manga taw nin ka linumpuk'in silan sa enggaga sangibu enggu enggaga magatus, na uman i sakalumpuk na binetadan nin sa makapangulu lun. 2 Na binad'in silan sa telu bad. Na su sabad na nia nangulu lun na si Yuab, su sabad menem na nia nangulu lun na si Abisai a suled'i Yuab, su sabad menem na nia nangulu lun na si Itai a taw a Git. Na nia pidtalu nu Datu Daud sa kanilan na “Saki demun i mangunanan sa lekanu kanu kambunua.” 3 Ugaid'a nia pidtalu nu manga taw nin na “Da ka den 'bpagunut sa lekami ka amaika makadtatalaguy kami na dala katagan nin sa kanilan enggu apia matay pan i sabad sa lekami na dala bun kapantag'in i entu kanilan. Ka nia balapantag kanilan na seka i matay kumin kanu sapulu ngibu sa lekami. Tembu nia mapia na sia ka demun kanu siudad ka nia ka enggula na papaiti kami bu sa tabang.” 4 Na nia inisumpat'u Datu Daud kanilan na “Uway enggulan ku u ngin i kapegkailay nu lun a mapia.” Daka midtindeg su datu kanu bengawan nu siudad ka inilay nin su kabpeliu nu manga sundalu nin a nangalumpuk sa enggaga sangibu enggu enggaga magatus. 5 Na nia nin inisugu kani Yuab, Abisai enggu Itai na “Di nu bu mimatayi sa laki su manguda a si Absalum.” Na nakineg'u langun nu manga taw nin su inisugu a entu nu datu makapantag kani Absalum.

6 Daka ginemanat den mambu su manga sundalu ka inimbunua nilan den su manga sundalu nu Israil lu kanu damakayu nu dalepa a Ipraim. 7 Na tinabanan nu manga sundalu nu Daud su manga sundalu nu Israil. Na kanu entu ba a gay na manga duapulu ngibu kataw i minatay. 8 Na nakalapat su entu a kinambunua kanu lusud'u damakayu nu dalepa a Ipraim. Na nia pan madakel i minatay lu kanu damakayu kumin kanu minatay na matalem.

9 Na gagalu nu kapembunua nilan na nadsumbak'i Absalum su manga sundalu nu Daud a nakagkuda sekanin kanu pegkudan nin a bedtuan sa mula. Na pinadtatalaguy nin su entu lu kanu atag'u kayu a bedtuan sa Insin, daka nakasangkangat sekanin kanu sapak'u entu a kayu. Na natagak si Absalum kanu nasangkangatan nin ka dinemilidsu edtalaguy su pigkudan nin a entu. 10 Na guna mailay i entu nu isa kanu manga taw nu Daud na inilakit'in su entu kani Yuab sa nia nin pidtalu na “Nailay ku si Absalum a nakasangkangat lu kanu kayu a insin.” 11 Na nia inisumpat'i Yuab sa lekanin na “Nailay nengka besen sekanin a nakasangkangat? Na ngintu ka dala nengka pan imatayi? Ka aden a entu na balasan ku pan seka sa sabitan na 'gkaunutan sa kambunua enggu sapulu timan a pilak.” 12 Ugaid'a nia inisumpat'u mama kani Yuab na “Apia sangibu pan i kadakel'in a pilak i inggay nengka sa laki na dili ku imatayan su wata nu datu. Ka nakineg'ami a benal su inisugu nu datu sa leka enggu kani Abisai apeg'i Itai sa di imatayan su manguda a si Absalum sabap kanu datu. 13 Na amaika bu ka inimatayan ku sekanin na sigulu a katawan bun nu datu enggu di aku nengka ipaninindeg sa lekanin.” 14 Na nia inisumpat'i Yuab sa lekanin na “Di ku seka ipagangga.” Daka kinemua sekanin sa telu timan a dilek ka inibped'in temumbuk kanu laleb'i Absalum a bibiag pamun a nakasangkangat kanu kayu. 15 Na linibet pamun nu sapulu kataw a 'bpamananggit kanu manga matalem'i Yuab si Absalum ka linunsanan nilan mimatay. 16 Daka pinauni ni Yuab su tambuli asal'a temelen den su manga taw nu Daud kanu kabpaneled'ilan kanu manga sundalu nu Israil. 17 Na kinua nilan su bangkay ni Absalum ka iniulug'ilan kanu madalem a kalut lu kanu damakayu enggu tinambakan nilan sa madakel a watu. Saleta mambu na su manga sundalu nu Israil na namakadtatalaguy embalingan kanu kawalayan nilan. 18 Na kanu timpu a bibiag pan si Absalum na napatindeg sekanin sa watu a mana palaus lu kanu kadatalan nu datu a tademan sa lekanin, ka nia nin kadtalu na “Dala wata ku a mama a makapatalus kanu ngala ku a tademan sa laki.” Na binedtuan i entu sa Watu a Palaus kani Absalum a tademan sa lekanin sampay saguna.

19 Daka nia pidtalu ni Ahimas a wata a mama ni Saduk na “Suguti aku a makalu kanu datu ka enggu ku madtalu sa lekanin su mapia a nia a nanggula ka inilipuas sekanin nu Kadenan a Mapulu kanu kapegkagaga nu manga kuntela nin.” 20 Na nia inisumpat'i Yuab sa lekanin na “Di ka pan mapakay a makapasampay sa katigan kanu datu kanu nia a gay kagina minatay su wata nin. Na kanu ped bun a gay i kasampay nengka sa katigan lun.” 21 Daka nia pidtalu ni Yuab kanu taw a Kus na “Lu ka kanu datu ka edtalu ka sa lekanin u ngin i nailay nengka.” Daka sinemugiud sekanin kanu adapan ni Yuab entu pan ka namagayas sekanin gemanat. 22 Ugaid'a initegel bun edtalu ni Ahimas a wata a mama ni Saduk kani Yuab i “Apia ngin i manggula na suguti aku nengka sa makatundug aku kanu taw a entu a Kus.” Na nia inisumpat'i Yuab na “Manga dua na wata, nginan ka 'gkalinian nengka a benal i makalu ka? Dala bun man makua nengka a balas kanu kanggula nengka sa nan.” 23 Na nia inisumpat'i Ahimas na “Apia ngin i manggula na lemu aku.” Na nia pidtalu ni Yuab na “Amaika maitu na ganat ka den!” Daka namagayas den mambu gemanat si Ahimas a lu minukit kanu kadatalan nu Jordan. Na sekanin pan i nauna makauma kumin kanu taw a Kus.

24 Na gagalu na kabpagagayan nu Daud kanu pageletan nu bengawan nu siudad sia sa liu enggu ludep na minanik lu kanu untul'u palaus'u bengawan su tameng'u siudad na guna sekanin panandeng na nasandeng'in su taw a pedtatalaguy a pakauma. 25 Daka inilalis'in edtalu kanu datu i aden pakauma a taw, na nia inisumpat'u datu sa lekanin na “Amaika sakataw nin bu na aden katigan nin a mapia.” Na gagalu nu kapedsupeg'u mama a entu 26 na aden menem nailay nu tameng a sakataw menem a mama a pedtatalaguy bun a pakauma. Daka inilalis'in menem edtalu kanu tameng'u bengawan nu alad i “Ilay ka, aden pamun pakauma a sakataw.” Na nia pidtalu nu datu na “Aden bun i nan mapia a katigan nin.” 27 Na nia pidtalu nu tameng a entu na “Mana si Ahimas a wata ni Saduk i nauna a nia a pakauma.” Na nia pidtalu nu datu na “Mapia i nan a taw enggu mapia i it'in a katigan.” 28 Na nia kinauma ni Ahimas na sinalam'in su datu enggu sinemugiud sekanin kanu adapan nin ka nia nin lun pidtalu na “Pugin su Kadenan a Mapulu a Kadenan nengka a napapanaban sa leka a mapulu ku a datu kanu manga sinemungkang sa leka.” 29 Na nia nakaidsa nu datu sa lekanin na “Ngin i betad'u manguda a mama a si Absalum? Dala bun nanggula nin a mawag?” Na nia inisumpat'i Ahimas na “Kanu kinapatawag'i Yuab sa laki a panunugun nengka na nailay ku i 'gkangaguligaw silan ugaid'a di ku katawan u ngin i entu ba a 'gkanggula a entu.” 30 Na nia pidtalu nu datu sa lekanin na “San ka demun pan sa ligid'a.” Na maitu den ba mambu i pinggula ni Ahimas na midtindeg kanu ligid. 31 Na saleta mambu na da matana-tana na nakauma su taw a Kus enggu nia nin pidtalu na “Hu datu a mapulu ku, aden katigan ku sa leka a mapia, na kanu nia a gay na su Kadenan a Mapulu i linemipuas sa leka kanu langun nu pedsungkang sa leka.” 32 Na nia nakaidsa nu datu sa lekanin na “Ngin i betad'u manguda a si Absalum? Dala bun nanggula nin a mawag?” Na nia inisumpat'u taw a Kus na “Pangeni-ngenin ta i manggula nu langun nu pedsungkang kanu datu su mawag a nanggula nu manguda a entu a mama.”

33 Na guna makineg'u Daud i entu na sangat a nalidu i ginawa nin. Na minanik sekanin kanu bilik a lu kanu pulu nu bengawan nu siudad ka naguguliang sekanin. Na gagalu nu kapebpanik'in na nia nin 'gkadtalu na “Hu wata ku! Hu wata ku a Absalum! Nia pan tinemu i saki den i minatay kumin sa leka, wata ku a Absalum!”