19
Na aden nakadtalu kani Yuab sa “Su datu na 'bpaguguliang enggu ginagawan sabap kanu kinapatay ni Absalum.” 2 Na guna makineg'u manga sundalu su entu na nasambian na kinagagaw su kapenggalaw-galaw nilan kanu kinapanaban nilan. 3 Daka mimbalingan su manga sundalu kanu siudad a dala demun inek-inek'ilan ka 'gkangayan a mana manga sundalu a namakadtatalaguy sa timpu na kinambunua.4 Na saleta mambu na dinapengan nu datu su beneng'in a 'bpaguguliang sa matanug sa nia nin ibpelalis 'bpaguliang na “Absalum a wata ku, Absalum a wata ku!” 5 Daka pibpawangan ni Yuab su datu lu kanu walay nin ka pidtaluan nin sa “Kanu nan a penggulan nengka na papegkayan nengka su manga sundalu nengka a linemipuas sa leka enggu kanu manga wata nengka a magidsan i babay-mama taman den kanu manga kaluma nengka enggu su manga kaluma nengka a panunugun. 6 Nia ku kapegkailay sa leka na ipegkalimu nengka su 'gkabensi sa leka enggu 'gkabensian nengka menem su pegkalimu sa leka. Na mapayag a benal i dikena balapantag sa leka su 'gkangaunutan nu manga sundalu nengka taman den kanu manga taw nengka. Mana nia nengka pan tinemu i sekami i matay langun kumin kani Absalum. 7 Na nia dait a enggulan nengka na liu ka saguna ka edsukul-sukuli ka su manga taw nengka ka amaika di nengka i entu enggulan na ipedsapa ku kanu Kadenan a Mapulu i kanu nia bun ba a magabi na dala masama sa leka a sundalu. Na kanu langun nu naukit-ukitan nengka iganat sa kanguda nengka na nia ba i mapasang sa langun a manggula nengka.” 8 Daka midtindeg su datu ka minayan kanu 'bpagagayanan nin kanu ligid'u bengawan nu siudad. Na guna i entu katawi nu langun nu taw lu na pibpawangan nilan su datu.
Su Kinambalingan nu Daud sa Awrusalim
Na saleta mambu na su manga sundalu a Israil a manga taw ni Absalum na namakadtatalaguy embalingan kanu manga kawalayan nilan. 9 Na su langun nu manga taw a Israil na mibpapalawa silan sa nia nilan pebpapalawan na “Inilipuas tanu nu Datu Daud kanu kapegkagaga nu manga kuntela tanu enggu kanu kapegkagaga nu manga taw a Pilistin, ugaid'a sabap kani Absalum na nakaawa sekanin kanu dalepa tanu. 10 Na su pinamili tanu a makandatu sa lekitanu a si Absalum na minatay sekanin kanu kinambunua. Na ngintu, dala isa sa lekanu i pakapagitung sa kapambalingan kanu datu?” 11-12 Na guna makineg'u Daud su entu na napapait sekanin sa katigan kanu 'bpamangurban a si Saduk enggu si Abiatar sa edtalun nilan kanu langun nu 'gkangaunutan nu manga taw a Yahuda i ngintu ka dala pamun penggulan nilan a ukit sa kambalingan nu datu nilan, inunta na su manga taw a Israil na pegkiug den sa kambalingan nu datu. Nia dait na silan pan i muna-muna a magitung sa entu kagina silan i lugu nin. 13 Na pidtalu bun nu Daud i “Edtalu nu bun kani Amasa i iganat saguna na sekanin den i pembaluyn ku a 'gkaunutan nu manga sundalu a sambi kani Yuab kagina sakalugu kami bu. Na amaika di ku i entu enggulan na siksan aku nu Kadenan sa mapasang.” 14 Na nasuatan nu manga taw a Yahuda su katigan a entu nu Daud tembu nia nilan nakapapait a katigan kanu datu na “Embalingan ka den sia apeg'u manga taw nengka.”
15 Daka mimbalingan den mambu su datu. Na guna silan makauma kanu lawas'a ig'u Jordan na inalaw silan nu manga taw a Yahuda a linemu sa dalepa a Gilgal ka pedtabangan nilan silan kanu kabpelipag'ilan kanu lawas'a ig'u Jordan. 16 Na saleta mambu na si Simi a wata a mama ni Gila a tupu nu Buniamin a ebpun sa dalepa a Bahurim na namagayas sekanin munut kanu kabpagalaw kanu datu, 17 a kaped'in su sangibu i kadakel'in a taw a ebpun bun kanu manga tupu nu taw a Buniamin. Minalaw bun si Siba a panunugun nu sakambinabatan nu Saul apeg'u sapulu enggu lima kataw a wata nin a mama enggu su duapulu kataw a manga panunugun nin. Na namagayas a benal silan kanu kabpagalaw nilan kanu datu. 18 Na linemipag silan kanu lawas'a ig'u Jordan ka enggu nilan katabangan su sakambinabatan nu datu enggu enggulan nilan su langun nu ipedsugu nu datu.
Su Dala Kaimatay nu Daud kani Simi
Na guna su 'bpelipag den su datu na sinemugiud si Simi kanu adapan nin 19 ka nia nin lun pidtalu na “Hu datu, ampun aku nengka kanu mawag a entu a pinggula ku sa leka kanu timpu nu kabpagawa nengka sa Awrusalim, na 'bpangenin ku i di ka den i entu ipedtagu sa ginawa. 20 Pedtaliman ku i nakandusa aku sa leka. Tembu saki i nauna a benal nakauma sia kanu langun nu tupu nu Yusup asal'a maalaw ku su mapulu ku a datu.” 21 Daka nia pidtalu ni Abisai a wata a mama ni Siruya na “Dikena ba nia dait na imatayan si Simi sabap kanu kinadsinta nin kanu pinamili nu Kadenan a Mapulu?” 22 Ugaid'a nia pidtalu nu Daud na “Sekanu a manga wata a mama ni Siruya na di aku nu den 'bpelusudi atawa ka di aku nu pedsungkang u ngin i kapagitungan ku sa lekanin ka saguna na saki den i datu nu Israil. Na kanu nia a gay na dait a dala imatayan a taw sia kanu lusud'u Israil.” 23 Daka nia pidtalu nu datu kani Simi na “Ipebpasad ku i di ka kaimatayan.”
Su Kinapagilaya nu Daud enggu Mirib-Baal
24 Na inalaw bun ni Mirib-Baal a apu nu Saul su datu. Na iganat kanu kinaawa nu Daud lu taman kanu kinambalingan nin na dala nin pagagasi su ay nin enggu dala nin bun patebpedi su bulungus'in enggu dala nin bun papamipi su balegkas'in. 25 Na guna sekanin makauma lu ebpun sa Awrusalim na nia pidtalu nu datu sa lekanin na “Ngintu ka dala ka unut sa laki Mirib-Baal?” 26 Na nia nin inisumpat na “Hu datu a mapulu ku, su panunugun nengka na di man pakalakaw. Na pidtaluan ku su panunugun ku sa adilen nin su kimara a kagkudan ku ka enggu aku makaunut sa leka ugaid'a pinagakalan aku nin taman sa tinagak aku nin. 27 Liu pan sa entu na tinipu aku nin sa leka. Ugaid'a seka a datu a mapulu ku na mana ka man malaikat'u Kadenan tembu enggula ka sa laki u ngin i kapegkailay nengka lun a mapia. 28 Na nia pa man dait na imatayan nu datu su langun nu tupu nu tuwa ku a si Saul, ugaid'a dala nengka i entu enggula ka makin nia nengka pinggula na inenggat aku nengka a panunugun nengka sa madtagapeda nengka keman. Tembu dala den dait a mapangeni ku pan kanu datu.” 29 Na nia inisumpat'u datu sa lekanin na “Di ta den embitialan su entu ka napagitungan ku den i embad'u den kani Siba su kalupan ni Saul.” 30 Na nia pidtalu ni Mirib-Baal kanu datu na “Inggay nengka den sa lekanin langun, ka nia man balapantag sa laki na nakambalingan ka sa mapia.”
Su Kapianan nu Daud kani Barsila
31 Na kanu kinalipag'u Daud na inunutan sekanin ni Barsila a taw a Giliad a ebpun sa dalepa a Rugilim ka tinemabang bun kanu Daud kanu kinalipag'ilan kanu lawas'a ig'u Jordan. 32 Na si Barsila a nia na matua den a benal ka nakawalupulu lagun den i umul'in. Na sekanin i nangenggay kanu Daud sa makan kanu timpu nu lu pan silan sa dalepa a Mahanaim kagina kawasa a benal sekanin. 33 Na nia pidtalu nu Daud kani Barsila na “Unut ka den sa laki lu sa Awrusalim ka saki den i mataw sa leka lu.” 34 Ugaid'a nia inisumpat'i Barsila kanu datu na “Enduken ka 'bpagunut aku pan sa leka? Dikena den man gaid mauget i umul ku sia sa dunia. 35 Ka nakawalupulu lagun aku den saguna, di ku den katawan u ngin i makagkapia sa ginawa ku. Di ku den gaid 'gkananaman sa mapia su pegken ku enggu su 'bpaginumen ku. Di ku bun den gaid 'gkakineg sa mapia su sengal'u manga pasesengal. Na amaika maitu na makalingasa aku bu sa leka. 36 Na inisigkil ku bu seka sia kanu lawas'a ig'u Jordan, di den dait a balasan aku nengka pan sa entu. 37 Na 'bpangenin ku i pauli aku den a panunugun nengka kanu dalepa ku, ka lu ku ba 'gkalinian a mauma aku na limu nu Kadenan, lu kanu linebengan kanu dua a lukes ku. Ugaid'a nia su panunugun nengka a si Kimham na sekanin den i paunut ka. Na enggula ka den sa lekanin u ngin i kapegkailay nengka lun a mapia.” 38 Na nia inisumpat'u datu na “Uway, paunuten ku sekanin enggu enggulan ku sa lekanin su ngin i kalangan nengka lun a mapia. Na enggulan ku bun su langun nu 'bpangenin nengka sa laki.” 39 Daka linemipag silan kanu lawas'a ig'u Jordan. Saleta mambu na sinium'u Daud si Barsila sia sa bias'in enggu pinalihalan nin sekanin. Entu pan ka minuli den si Barsila kanu dalepa nin.
40 Na guna silan makalipag na linemu su Daud kanu dalepa a Gilgal a kaped'in si Kimham enggu su langun nu sundalu nu taw a Yahuda apeg'u sabad kanu sundalu nu manga taw a Israil. 41 Na guna silan makauma lu na inimbitiala sekanin nu manga taw a Israil ka nia nilan lun pidtalu na “Ngintu ka dala kami patekawa nu manga taw a Yahuda kanu kinaalaw sa leka enggu kanu sakambinabatan nengka taman den kanu manga sundalu nengka lu kanu lawas'a ig'u Jordan inunta na lugu kami nengka bun?” 42 Na nia inisumpat'u manga taw a Yahuda kanu manga taw a Israil na “Pinggula nami i entu kagina sekami i masupeg a pagali nu datu. Ngintu ka ipegkalipunget'u i entu? Enduken, nia nu kataw ka nakatalima kami sa makan atawa ka pinangenggan kami nu datu?” 43 Ugaid'a nia inisumpat'u manga taw a Israil kanu manga taw a Yahuda na “Sapulu kami a tupu a ebpun kanu Israil kumin sa lekanu a saka tupu bu, tembu ba makasapulu takep i kawagib'ami kanu datu kumin sa lekanu. Na ngintu ka pinakabulugan kami nu a benal? Dikena ba sekami i nauna a nakapagitung sa pambalinganen su datu?” Ugaid'a su 'gkangadtalu nu manga taw a Yahuda na labi pan i kasakit'in kumin kanu kadtalu nu manga taw a Israil.