Su Kinasungkang'i Siba kanu Daud
20
Na aden dupang a mama a ebpun kanu tupu nu Buniamin a bedtuan sa Siba a wata a mama ni Bikri.a Na pinauni nin su tambuli, entu pan ka inilalis'in edtalu i “Hu manga taw a Israil, muli tanu den ka dala bun maalap tanu a mapia kani Daud a wata a mama ni Yisi.” 2 Daka tinagak'u manga taw a Israil su Daud ka minunut silan kani Siba, ugaid'a su manga taw a Yahuda na migkalidtabun silan kanu datu enggu inunutan nilan sekanin iganat kanu lawas'a ig'u Jordan taman sa Awrusalim. 3 Na guna makauma su Daud sa Awrusalim na inipakua nin su sapulu kataw a kaluma nin a manga panunugun a initabun nin lu a makatuludu kanu tulugan nin ka inisenggay nin sa walay a aden pedtameng lun. Na inenggay nin kanilan su langun nu nasisita nilan, ugaid'a dala nin den silan duluga. Na lu den ba silan naguyag-uyag a mana manga balu taman sa kinapatay nilan.4 Na guna su maitu na nia pidtalu nu Daud kani Amasa na “Ipatawag'engka su langun nu manga mama a taw nu Yahuda ka limud ka silan ka sia kanu sa laki namisendaw.” 5 Daka pinggula den mambu ni Amasa su entu ugaid'a dala nin magaga, tembu dala sekanin makambalingan kanu gay a initandu nu datu sa lekanin. 6 Na sabap sa entu na nia nadtalu nu Daud kani Abisai na “Minuna pan i kabinasan ni Siba a wata a mama ni Bikri sa lekitanu kumin kani Absalum, tembu paunut ka su manga panunugun ku a datu nengka ka seled'u sekanin, ka aden a entu na makaludep sekanin kanu manga siudad a mabagel i alad'in na di tanu den sekanin masigkem.” 7 Daka ginemanat den mambu si Abisai lu sa Awrusalim a kaped'in si Yuab enggu su manga taw nin apeg'u manga taw a Kirit enggu su manga taw a Pilit taman kanu langun nu manga sundalu a pabubunua ka sineled'ilan si Siba a wata a mama ni Bikri. 8 Na guna silan makauma lu kanu masela a watu kanu dalepa a Gibiun, na sinumbak silan ni Amasa. Saleta mambu na si Yuab na nakambalegkas sa balegkas sa kambunua enggu nakatagkip su gelat'in kanu sabitan nin. Na gagalu nu kapedsupeg'in kani Amasa na binindas'in su gelat'in sa dala pasipat. 9 Daka sinalam'in si Amasa sa nia nin pidtalu na “Ngin i betad'engka, suled ku?” Entu pan ka inami nin kanu kawanan a lima nin su bulungus'i Amasa ka sinium'in. 10 Ugaid'a a dala kasipati ni Amasa su gelat kanu sabala a lima ni Yuab. Na sinandak'in sia sa tian taman sa nakabudsayak su tinay nin kanu lupa. Na minatay sekanin tembu dala nin den 'bpalumani semandak. Na guna su maitu na tinemalus si Yuab enggu Abisai kanu kabpaneled'ilan kani Siba a wata a mama ni Bikri.
11 Na isa kanu manga taw ni Yuab i midtindeg kanu ubay nu bangkay ni Amasa ka nia nin pidtalu na “Apia entain i pedtampil kani Yuab enggu Daud na munut kani Yuab.” 12 Na saleta mambu na si Amasa na nabpaigu nin i lugu nin a nakaiga kanu luk'u lalan. Na apia entain i 'bpagukit lu na pakabpelen ka 'bpagilayn nilan su bangkay ni Amasa. Na guna i entu madsima nu isa kanu manga taw ni Yuab na ginuyud'in su bangkay ni Amasa lu kanu 'bpangangawidan ka tinangguban nin sa ginis. 13 Na guna su naawa den su bangkay ni Amasa kanu luk'u lalan na minunut su langun nu manga taw lu kani Yuab kanu kabpaneled'ilan kani Siba a wata a mama ni Bikri.
14 Na saleta mambu na si Siba na pibpawangan nin su langun nu dalepa nu tupu nu Israil taman sa nakauma sekanin kanu dalepa a Abil Bit-Maaka. Na su langun nu pagali ni Bikri kanu entu ba a manga dalepa na minunut kani Siba kanu kinaludep'ilan kanu dalepa a Abil Bit-Maaka. 15 Na guna i entu katawi ni Yuab enggu su manga taw nin na pibpawangan nilan su dalepa a Abil Bit-Maaka ka linibet'ilan. Na tinemambak silan sa budta lu kanu ligid'u alad asal'a kadtimpawan nilan ka pidtatagituan nilan gemeba su alad. 16 Daka aden babay a balaitungan kanu entu ba a siudad i linemalis edtalu sa “Pakikineg kanu pan! Pakikineg kanu pan! Edtalu nu pan kani Yuab i semia sekanin sa laki ka pegkiugan ku pembitiala.” 17 Daka sinemupeg si Yuab sa lekanin enggu nia nin lun inidsa na “Seka ba si Yuab?” Na nia nin inisumpat na “Uway saki ba.” Daka nia pidtalu nu babay sa lekanin na “Pakikineg ka pan su pedtalun nu panunugun nengka a nia.” Nia nin inisumpat na “Uway pakikinegen ku.” 18 Na nia pidtalu nu babay na “Kanu paganay na aden palibasan, a amaika pegkiugan nu a masawal su kamutuan nu na ‘Pangeni kanu sa panduan kanu siudad'u Abil.’ 19 Na sia kanu lusud'u Israil na su dalepa nami i isa kanu matidtu enggu malilintad a dalepa a mana ina nu Israil. Ugaid'a ngintu ka pegkiugan nu pembinasa su dalepa a pusaka nu Kadenan a Mapulu?” 20 Na nia inisumpat'i Yuab na “Di nami pegkiugan penggula su entu enggu di nami bun pegkiugan pembinasa su siudad'u. 21 Ka nia nami bu man kahanda kanu kinasia nami na 'bpangilayn nami si Siba a wata a mama ni Bikri a lu pegkaleben kanu bakulud'u dalepa a Ipraim ka sinungkang'in su Datu Daud. Na ipalad'u sekanin sa lekami ka enggu kami pakaawa den kanu siudad'u.” Na nia inisumpat'u babay kani Yuab na “Putukan nami sekanin sa ulu ka idtug'ami sa lekanu san kanu bala nu alad.” 22 Daka pibpawangan nu babay su langun nu manga taw lu ka pidtalu nin kanilan su mapia a entu a napagitung'in. Tembu pinutukan nilan sa ulu si Siba ka inidtug'ilan lu sa liu nu alad, lu kani Yuab. Daka pinauni ni Yuab su tambuli, entu pan ka namangawa kanu siudad su manga taw nin ka namanguli kanu kawalayan nilan. Na saleta mambu na si Yuab na mimbalingan lu sa Awrusalim, lu kanu datu.
23 Na si Yuab na sekanin bun i nabaluy a 'gkaunutan nu langun nu sundalu nu taw a Israil. Na si Binaya menem a wata a mama ni Yihuyada na sekanin i 'gkaunutan nu manga taw a Kirit enggu manga taw a Pilit. 24 Si Adulam menem i pegkakataw kanu manga ulipen a papenggalebeken sa peges, si Yusapat menem a wata a mama ni Ahilud i 'bpanulat kanu ngin i 'gkanganggula enggu papedsampay kanu manga taw kanu ngin i katigan nu datu. 25 Si Siwa menem i 'bpanulat kanu ngin i katigan nu datu, si Saduk enggu Abiatar menem i 'bpangurban, 26 si Ira a taw sa Yahir na sekanin i pedtabangb kanu Daud.