Su Kinaimatay kanu Manga Tupu nu Saul
21
Na kanu timpu nu kinandatu nu Daud na minggutem kanu dalem'u nakatelu lagun. Na sabap sa entu na nangadap sekanin kanu Kadenan a Mapulu, na nia mambu pidtalu nu Kadenan a Mapulu sa lekanin na “Su kapenggutem a nia na sabap kanu kinapangimatay ni Saul kanu manga taw a Gibiun, na sekanin taman kanu sakambinabatan nin na nawagiban man silan sa kinapangimatay.” 2 Su manga taw a nia a Gibiun na dikena silan ebpun kanu tupu nu Israil ka silan su nangasama kanu tupu nu manga taw a Amur a pibpasadan sa di pangimatayan nu manga taw a Israil. Ugaid'a apia ka maitu na pinagitung bun nu Saul i kaimatay nin kanilan sabap sa nia nin bu 'gkalinian lu na su manga taw bu a Yahuda enggu manga taw a Israil. Daka inipatawag'u Daud su manga taw a Gibiun 3 ka nia nin pidtalu kanilan na “Ngin i dait a enggulan ku asal'a kabayadan su kadusan nu Saul sa lekanu ka enggu nu mapangeni i kapalihalan nu Kadenan a Mapulu su sekami a manga taw nin?” 4 Na nia inisumpat'u manga taw a Gibiun na “Su lipunget'ami kani Saul enggu kanu sakambinabatan nin na di kabayadan na pilak atawa ka bulawan. Ugaid'a dala menem kawagib'ami sa kaimatay kanu apia entain kanu taw a Israil.” Daka nia pidtalu nu Daud sa kanilan na “Amaika maitu na edtalu nu u ngin i dait a enggulan ku sa lekanu.” 5 Na nia nilan inisumpat kanu datu na “Pigkahanda ni Saul i ibpeden kami nin mimatay asal'a dala masama sa lekami sia kanu lusud'u Israil. 6 Tembu ipalad'engka sa lekami su pitu kataw a mama a ebpun kanu tupu ni Saul ka enggu nami kaimatayan lu kanu adapan nu Kadenan a Mapulu kanu dalepa a Gibia a dalepa ni Saul a pinamili nu Kadenan a datu.” Na nia inisumpat'u datu na “Uway ipalad ku silan sa lekanu.”7 Ugaid'a sabap kanu kapasadan nilan kani Jonatan kanu adapan nu Kadenan na dala nin inggay kanilan si Mirib-Baal a wata a mama ni Jonatan a apu nu Saul. 8-9 Ka nia nin inipalad kanilan na su wata a mama nu Saul a si Armun enggu su bedtuan bun sa Mirib-Baal a nia nilan ina na si Rispa a wata ni Aya. Inenggay nin bun su lima kataw a manga wata a mama ni Mirab. Si Mirab na wata a babay nu Saul enggu kaluma ni Adril a wata ni Barsila a taw sa dalepa a Mihula. Daka pinangimatayan den mambu nu manga taw a Gibiun su pitu kataw a entu lu kanu bakulud kanu adapan nu Kadenan a Mapulu. Na pinggula nilan su kinapangimatay a entu kanu timpu nu kabpeludsu 'bpagagani sa bantad a barli.
10 Na si Rispa a wata a babay ni Aya na kinemua sa saku ka inibelat'in kanu lakungan ka lu ba miniga ka tinamengan nin su manga bangkay a entu sa magabi sa malamag asal'a di makan nu manga papanuk enggu manga talaw a binatang. Na nauget i kinatameng'in lu ka iganat kanu timpu nu kabpeludsu 'bpagagani taman kanu timpu nu kabpeludsu 'bpagugulan. 11 Na guna katawi nu Daud su pinggula a entu ni Rispa a kaluma nu Saul a panunugun nin a wata ni Aya, 12 na linemu su Daud kanu dalepa a Yabis a sakup'u dalepa a Giliad ka kinua nin su manga tulan nu Saul enggu Jonatan. Na su manga taw ba a nia a Yabis i kinemua kanu manga bangkay nu Saul enggu kanu wata nin a si Jonatan kanu dalepa a Bit-San a lu ba inibitin nu manga taw a Pilistin kanu kinaimatay nilan lun lu kanu palaw a Gilbua. 13 Na kinua nu Daud su manga tulan nu Saul enggu su manga tulan ni Jonatan apeg'u manga tulan nu pitu kataw a entu a pinangimatayan nu manga taw a Gibiun. 14 Daka inipalebeng'u Daud su entu lu kanu ubay nu linebengan kanu ama nu Saul a si Kis kanu kalupan nu manga taw a Buniamin kanu dalepa a Sila. Na su langun nu inisugu nu datu na natuman enggu iganat sa entu na pinakikineg den nu Kadenan su pangeni-ngeni nilan sa kanu dalepa nilan.
Su Kinataban kanu Mangasela a Mama a Taw a Pilistin
15 Na nauma menem su timpu a mimbunua menem su manga taw a Pilistin enggu su manga taw a Israil. Na minamung embunua su Daud taman sa nalugat a benal sekanin. 16 Na aden taw a Pilistin a bedtuan sa Isbi-Binub a ebpun kanu tupu nu Rapa a mangasela a mama na 'bpagimatayan nin su Daud. Na nia matalem'u masela a entu a mama na bagu a sundang enggu su dilek'in na nia nin galangan na galang a nia nin kaugat na manga pat kakilu. 17 Ugaid'a nagkadtagan sekanin ni Abisai a wata a mama ni Siruya ka inimatayan nin su taw a entu a Pilistin. Na iganat sa entu ba na inidsapa nilan i di nilan den paunuten 'bpaluman su Daud kanu kambunua sa nia nilan pidtalu lun na “Di nami kalinian a madala ka, ka seka man su sigay nu Israil.”
18 Na ulian nu entu na mimbunua menem su manga taw a Pilistin enggu su manga taw a Israil lu sa dalepa a Gub. Na kanu nia a kinambunua nilan na minatay ni Sibikai a taw a Husa su mama a bedtuan sa Sap a tupu bun nu Rapa a mangasela a mama. 19 Na guna su mimbunua menem silan 'bpaluman kanu entu bun ba a dalepa na minatay menem ni Ilhanan a wata a mama ni Yari-Urigim a taw sa dalepa a Bitlihim su bedtuan bun sa Gulayata a taw a Git a su sungan nu dilek'in na maugat a benal enggu masela. 20 Na mimbunua menem 'bpaluman su manga taw a Pilistin enggu su manga taw a Israil lu sa dalepa a Gat. Na kanu nia a kinambunua nilan na aden menem nagkuntela nilan a sangat i kasela nin a mama ka su lima nin enggu su ay nin na enggaga nem timan i kemel'in a ebpun bun sekanin kanu tupu nu Rapa a mangasela a mama. 21 Na guna nin edsudi su manga taw a Israil na inimatayan sekanin ni Jonatan a wata nu suled'u Daud a si Sama. 22 Na su pat kataw a entu a pinangimatayan nu Daud apeg'u manga taw nin na ebpun sa tupu nu Rapa a mangasela a mama sa dalepa a Gat.