Sengal kanu Kadsukul-sukul kanu Kinapanaban
22
Na ulian nu kinalipuas'u Kadenan a Mapulu kanu Daud sa kanu kapegkagaga nu manga kuntela nin enggu kanu kapegkagaga nu Saul na midsengal sekanin kanu Kadenan a Mapulu sa2-3 “Hu Kadenan a Mapulu, mana ka watu a pegkelung sa laki,
seka i dalinding ku, seka i kuta ku a 'bpagenan ku, seka i 'bpamelipuas sa laki, inilipuas aku nengka kanu manga dupang a manga taw.
4 Hu Kadenan a Mapulu a dait a pebpugin, nangeni aku sa leka sa tabang
na inilipuas aku nengka mambu kanu manga kuntela ku.
5 Su kapatay na mana bagel a pakaled sa laki,
su kabinasan na mana mabagel a leges a pakaanud sa laki.
6 Su pakubulan na mana iket a nakapuket sa laki,
su kapatay na mana litag kanu 'bpagukitan ku.
7 Na sia kanu kamalasayan ku na tinemawag aku sa leka mangeni sa tabang, Hu Kadenan a Mapulu ku,
iganat kanu suti a 'bpagagaman sa leka na nakineg'engka su suala ku,
pinakikineg'engka su pangeni-ngeni ku.
8 Sabap kanu lipunget'engka na kinemegkel su dunia enggu lineminug,
su manga udsadan nu manga palaw na nakuyung.
9 Na 'bpeliu kanu ngilung'engka su bel,
su ngali nengka na 'bpeliuwan nu 'bpangalaw-kalaw a apuy enggu pegkaleg a waga na apuy.
10 Inukan nengka su langit ka nangalimbaba ka,
su makapal a dadtem i pendampuan nengka.
11 Nageda ka kanu malaikat a kirub,a
mindadalayug ka sa malengkas a 'gkadtatanggit'u sambel.
12 Inibaus'engka su kalibutengan kanu ginawa nengka,
nakabalibet sa leka su makapal a dadtem.
13 Na lu kanu nambetadan nengka na pedtalas su kilat,
na iganat lu ba na pakadadsang su manga pegkaleg a waga na apuy.
14 Hu Kadenan a Mapulu sa Langun, su suala nengka na mana lugung a pedsagkung kanu langit.
15 Binusug'engka su manga kuntela a punan a kinatagayak'ilan,
tinemalas su kilat a punan a dala nilan kadtutuganula.
16 Nailag su pused'u lagat ka nailatan
taman sa su udsadan nu dunia na napayangas
sabap kanu kinasapal'engka
enggu kanu sengaw bu nu napas'engka.
17 Iganat sa sulega na kinawa aku nengka,
kinua aku nengka kanu madalem a ig.
18 Inilipuas aku nengka kanu mangabagel a kuntela ku
a mawag i 'gkangguniat'in sa laki,
sangat i kabagel'ilan tembu di aku pakagaga 'bpagatu kanilan.
19 Linusudan aku nilan sa timpu na pedtala aku sa mapasang,
ugaid'a pigkadtagan aku nengka, Hu Kadenan a Mapulu.
20 Init aku nengka kanu dalepa a dala makagkaid sa laki,
inilipuas aku nengka kagina 'gkasuatan aku nengka.
21 Hu Kadenan a Mapulu, binalasan aku nengka sabap sa matidtu aku,
pinalihalan aku nengka sabap sa dala budseng'u lima ku sa mawag a galebek.
22 Na su manga kasuguan nengka na 'bpaginugutan ku,
dikena ku seka pedtaligkudanan.
23 Ipenggulalan ku su langun nu kasuguan nengka,
di ku pedsungkangen su pangitaban nengka.
24 Na dala tila ku sia kanu kaadapan nengka,
ipedtangka ku su ginawa ku kanu kabaladusan.
25 Hu Kadenan a Mapulu, tembu binalasan aku nengka sabap kanu katidtu ku,
enggu sabap sa dala budseng'u lima ku kanu kaadapan nengka.
26 Na ipebpagilay nengka su katidtu nengka kanu manga taw a 'bpaguyag-uyag sia luyud sa leka,
ipebpagilay nengka su kasuti nengka kanu manga taw a dala tila nin.
27 Ipebpagilay nengka i kaikelas'engka kanu manga taw a ikelas,
ugaid'a kanu manga taw a mawag i akal'in na ipebpagilay nengka kanilan su kategel'u akal'engka.
28 Ka ibpelipuas'engka man su manga taw a mababa i muletad'in,
ugaid'a pedsipatan nengka menem su manga taw a mapulu i muletad'in ka ipembaba nengka silan.
29 Hu Kadenan ku a Mapulu, seka i palitan ku,
seka i pakatayaw kanu malibuteng a nakabalibet sa laki.
30 Sia makanggulalan sa leka na magaga ku lemusud su lumpukan nu manga sundalu,
sia makanggulalan sa leka na magaga ku mamusug su alad'u kuta nilan.
31 Hu Kadenan a Mapulu, su ukit'engka na dala limban nin,
su pasad'engka na matuman.
Kelung ka nu langun nu lemindung sa leka.
32 Dala den man Kadenan a liu pan sa leka.
Seka i mana masela a watu a pegkelung sa lekami.
33 Inibpakut'engka sa laki su bagel'engka,
tinilak'engka su lalan a 'bpagukitan ku.
34 Pinagkabagel'engka su ay ku sa mana su ay na saladeng,
tinabangan aku nengka temakedeg kanu malambeg a palaw sa dala aku makasiud.
35 Pinapaganad'engka su lima ku sa kambunua
ka enggu makagaga minteng sa mabagel a busug.
36 Inenggay nengka sa laki su kelung'u kalipuasan,
nabaluy aku a badtug sabap sa sinawal'engka su pangeni-ngeni ku.
37 Pinagkaulad'engka su lalan a 'bpagukitan ku
ka enggu di makasiud su ay ku.
38 Sineled ku su manga kuntela ku taman sa nagkaidan ku silan,
dala aku telen taman sa da ku silan maibped matay.
39 Pinanapes ku silan mametay taman sa nangaudtang silan kanu ay ku enggu da den silan makagaga embangun.
40 Inipakut'nengka man sa laki su bagel sa kambunua
taman sa pinasugiud'engka kanu ay ku su manga kuntela ku.
41 Sabap sa leka na namakadtatalaguy su manga kuntela ku,
bininasa ku su mawag i 'gkangguniat'in sa laki.
42 Nangilay silan sa makadtabang kanilan, ugaid'a dala tinemabang kanilan,
namakapaguguliang silan mangeni sa tabang sa leka, Hu Kadenan a Mapulu, ugaid'a da nengka silan sawala.
43 Pinamadasan ku silan taman sa nalupet-lupet silan,
dinakudak ku silan a mana budta kanu manga lalan.
44 Na inilipuas aku nengka kanu manga taw ku a pedsungkang sa laki,
binaluy aku nengka a 'gkaunutan nu manga bangsa,
su manga taw a di ku katawan na penggalebek den silan saguna sa laki.
45 Su manga taw a lapu na pedsugiud den sa laki.
'Gkakineg aku nilan bu na 'bpaginugutan aku nilan den,
46 sangat a nangagilekan silan
taman sa nameliu silan kanu 'bpamagenan nilan a pegkegkel'a gilek.
47 Hu Kadenan a Mapulu a kaisa-isa nin a Barakat. Pugin ku seka a mana masela a watu a 'bpangelung sa laki,
badtugen ku seka a Kadenan ku a 'bpamelipuas sa laki.
48 Seka i sinemuli sa laki kanu manga kuntela ku,
inipatalaw nengka sa laki su manga bangsa enggu pinandatuan nengka sa laki su entu.
49 Inilipuas aku nengka kanu manga kuntela ku,
inipulu aku nengka kanilan a pedsungkang sa laki,
inilipuas aku nengka kanu manga daluaka a taw.
50 Hu Kadenan a Mapulu, na sabap kanu nia na pebpugin ku seka sia kanu manga bangsa,
enggu pedsengal aku sa pugi kanu ingala nengka.
51 Inenggan nengka su datu a pinamili nengka sa masela a kambantas,
su sangat a kakalimu nengka na inipagedam'engka kani Daud a pinamili nengka taman kanu manga muliataw nin taman sa taman.”