Su Mangauli den a Katigan nu Daud
23
Na binaluy nu Kadenan a badtug su Daud a wata a mama ni Yisi.Sekanin i pinamili nu Kadenan a pedsimban nu Yakub a mabaluy a datu.
Sekanin bun i sinemulat kanu manga mapia a sengal kanu manga taw a Israil.
Na nia ba su manga mauli den a katigan nu Daud:
2 “Su Ruh nu Kadenan a Mapulu na midtalu sia nakanggulalan sa laki,
na su manga kadtalu a 'bpeliu kanu ngali ku na ebpun demun sa lekanin.
3 Pidtalu nu Kadenan nu manga taw a Israil
a su mana watu a pegkelung kanilan i
‘Su datu a pegkamal sa matidtu
enggu aden gilek'in kanu Kadenan
4 na mana sigay nu senang a pedsebang kanu mapita
a dala demun gabun a pakaungen lun
a pakapangetu kanu manga utan ulian nu kinaulan.’
5 Na maya ba i kapalihala nu Kadenan kanu manga tupu ku
sabap kanu kapasadan nin sa laki a dala kapegkapupus'in.
Su nia a kapasadan na mapia i kinaantang lun
enggu di den mabagu tembu 'gkatalanged ku i tatap aku nin ilipuas
enggu pambantasen kanu langun nu 'gkagkahanda ku.
6 Ugaid'a su taw a dala gilek'in kanu Kadenan na mana silan pamumulan a teneken a ibpagidtug bu.
Di silan kapakayan a punduten ka makasudang.
7 Na nasisita pan i putaw
atawa ka dilek i usalen sa kalimud lun
ka enggu magepul'a apuy.”
Su Mangategel sa Kambunua a Sundalu nu Daud
8 Na nia ba i manga ngala nu sundalu nu Daud a mangategel i kambunua nin: nia muna-muna kanilan a mategel sa langun na si Yusib-Basibit a taw sa Takimun, na isa sekanin kanu telu kataw a mangategel a benal a sundalu nu Daud na sekanin i 'bpangulu kanilan. Nakapatay sekanin sa walu gatus kataw sa nakaisa bu a kinambunua nilan a nia nin bu inusal a matalem na dilek. 9 Na nia temundug sa lekanin na si Iliasar a wata a mama ni Dudu a ebpun kanu tupu nu Ahua. Isa sekanin a kaped'u Daud kanu kinaatu nilan embunua kanu manga taw a Pilistin. Na kanu nia a timpu na namakadtatalaguy su manga taw a Israil ka tinalaw silan, 10 ugaid'a sekanin na minatu ka pinangimatayan nin su manga taw a Pilistin taman sa midtegas su lima nin kanu kabpagami nin kanu sundang'in ka sangat a nalugat. Na kanu entu ba a gay na pinapanaban sekanin nu Kadenan a Mapulu. Na guna mapasad su entu na namembalingan lu su manga taw a Israil ka pinangua nilan su manga matalem'u namamatay.
11 Na nia temundug kani Iliasar na si Sama a wata a mama ni Agi a taw sa dalepa a Harar. Na aden timpu a su manga taw a Pilistin na migkampu lu kanu dalepa a Lihi ka linusudan nilan su manga taw a Israil lu kanu pinamumulan sa gisanti. Na namakadtatalaguy su manga sundalu nu manga taw a Israil, 12 ugaid'a si Sama na migkalidtabun ka minatu sekanin ka inipaninindeg'in su entu taman sa minatay nin su manga taw a Pilistin. Na kanu entu ba a gay na pinapanaban sekanin nu Kadenan a Mapulu.
13 Na kanu timpu nu kabpeludsu 'bpagagani na linemu kanu Daud a lu kanu takub'u dalepa a Adulam su telu kataw a manga taw nin a kaped'u telupulu a mangategel a taw nin. Na kanu entu ba a timpu na su manga taw a Pilistin na lu migkampu kanu kadatalan nu dalepa a Ripaim 14 ka nasakup'ilan den su dalepa a Bitlihim. Na gagalu nu lu su Daud kanu mabagel a entu a 'bpagenan nin a takub 15 na pakainem sekanin na nia nin nadtalu na “Mapia den a benal amaika aden kemua sa laki sa ig a mainem ku lu kanu kalut a masiken kanu bengawan nu dalepa a Bitlihim.” 16 Tembu su telu kataw a entu a mangategel sa kambunua a taw nin na linemudep silan kanu kampu nu manga taw a Pilistin sa dala pasipat ka kinemua silan sa ig lu kanu kalut a entu ka inanggit'ilan kanu Daud. Ugaid'a dala nin i entu inema ka makin inibubus'in ka inigkurban nin kanu Kadenan a Mapulu. 17 Ka nia nin pidtalu na “Hu Kadenan a Mapulu, di ku i nia matika minem ka mana nia ku ininem na su lugu nu manga taw ku a inimbagi-bagi nilan i umul'ilan kanu kinakua nilan sa nia.” Na entu ba i pinggula nu telu kataw a entu a mangategel sa kambunua a taw nu Daud.
18 Na si Abisai a wata a mama ni Siruya a suled'i Yuab i 'gkaunutan nu telupulu kataw a entu a mangategel sa kambunua a taw nu Daud. Nakapatay sekanin sa telu gatus kataw a manga taw a Pilistin a nia nin bu inusal a matalem na dilek. Tembu nabadtug sekanin a mana su telu kataw a entu a mangategel sa kambunua. 19 Na sabap sa sekanin i badtug sa langun kanu telupulu kataw a entu a mangategel i kambunua nin na sekanin i binaluy a 'gkaunutan nilan, ugaid'a dikena maitu i kabadtug'in kanu telu kataw a entu a mangategel i kambunua nin.
20 Na nia pan ped kanu mangategel sa kambunua a taw nu Daud na si Binaya a wata a mama ni Yihuyada a taw sa dalepa a Kabsil. Na madakel i nabadtug a kinambunua nin apeg den nu kinaimatay nin kanu dua kataw a mangategel sa kambunua a sundalua nu dalepa a Muab. Na inimatayan nin bun su alimaw lu kanu kalut kanu timpu nu kabpagulan sa manganaut a ilu. 21 Na sekanin bun i minimatay kanu masela a mama a taw a Egypt a nia nin matalem na dilek ugaid'a sekanin na nia nin bu matalem na tungked. Na inagaw nin kanu mama a entu su dilek ka entu bun ba i inimatay nin lun. 22 Na entu ba i manga pinggula ni Binaya a wata a mama ni Yihuyada. Na nabadtug sekanin a mana bun su telu kataw a entu a mangategel sa kambunua 23 ugaid'a dikena menem maitu i kabadtug'in kanu telu kataw a entu. Na sabap sa badtug bun sekanin kanu telupulu kataw a entu a mangategel sa kambunua a taw nu Daud na binaluy sekanin nu Daud a 'gkaunutan nu manga tameng.
24 Na nia pan lusud kanu telupulu kataw a entu a mangategel sa kambunua a taw nu Daud na si Asahil a suled'i Yuab, si Ilhanan a wata a mama ni Dudu a taw sa dalepa a Bitlihim, 25 si Sama enggu si Ilika a taw sa dalepa a Harud, 26 si Hilis a taw sa dalepa a Pilit, si Ira a wata a mama ni Ikis a taw sa dalepa a Tikua, 27 si Abisir a taw sa dalepa a Anatut, si Mibunai a taw sa dalepa a Husa, 28 si Salmun a taw sa dalepa a Ahua, si Mahari a taw sa dalepa a Nitupa, 29 si Hilib a wata a mama ni Baana a taw bun sa dalepa a Nitupa, si Itai a wata a mama ni Ribai a taw sa dalepa a Gibia a sakup'u kalupan nu Buniamin, 30 si Binaya a taw sa dalepa a Piratun, si Hidai a ebpun kanu kadatalan nu lawas'a ig'u Gas, 31 si Abi-Albun a taw sa dalepa a Araba, si Asmabit a taw sa dalepa a Bahurim, 32 si Iliaba a taw sa dalepa a Saalbun, apeg'u manga wata a mama ni Yasin, si Jonatan 33 a wata a mama ni Sama a taw sa dalepa a Harar, si Ahiam a wata a mama ni Sarar a taw bun sa dalepa a Harar, 34 si Ilipilit a wata a mama ni Ahasaba a taw sa dalepa a Maaka, si Iliam a wata a mama ni Ahitupil a taw sa dalepa a Gilu, 35 si Hisra a taw sa dalepa a Karmil, si Paara a taw sa dalepa a Arab, 36 si Igal a wata a mama ni Natan a taw sa dalepa a Suba, si Bani a taw sa dalepa a Gad, 37 si Silik a taw sa dalepa a Amun, si Nahari a taw sa dalepa a Birut a sekanin i 'bpananggit kanu matalem'i Yuab a wata a mama ni Siruya, 38 si Ira enggu si Garib a manga taw sa dalepa a Yatir, 39 enggu si Uriya a taw a Hit. Na telupulu enggu pitu silan langun.