Su Kinapabilang'u Daud kanu manga Taw a Israil
24
Na nalipunget menem su Kadenan a Mapulu kanu manga tupu nu Israil. Na nia inusal'u Kadenan a Mapulu sa entu na su Daud sa nia nin lun pidtalu na “Bilang ka su manga tupu nu Israil taman den kanu manga tupu nu Yahuda.”a 2 Daka nia pidtalu nu Daud kani Yuab enggu kanu manga ped'in a 'gkangaunutan nu manga sundalu na “'Bpawangi nu su langun nu tupu nu Israil ka bilang'u silan iganat kanu dalepa a Dan taman kanu dalepa a Birsiba ka enggu ku 'gkatawan i kadakel'ilan.” 3 Ugaid'a nia pidtalu ni Yuab kanu datu na “Pangeni-ngenin ta kanu Kadenan a Mapulu i pagkadakelen nin pan su manga taw nengka sa takepen nin sa magatus takep enggu pangeni-ngenin ta bun i magaus'u umul'engka pamun su entu. Na hu datu, nia ku makaidsa sa leka na ngintu ka nasisita nengka pan a enggulan i nia?” 4 Ugaid'a inipeges bun nu datu kani Yuab enggu kanu manga sundalu nin su entu. Tembu ginemanat mambu si Yuab enggu su manga ped'in a 'gkangaunutan nu manga sundalu ka enggu nilan mabilang su manga taw a Israil. 5 Na linemipag silan lu kanu lawas'a ig'u Jordan. Na lu silan linemudsu milang kanu dalepa a Arur a lu kanu laya nu siudad a lu kanu luk'u kadatalan taman kanu dalepa a Gad enggu kanu dalepa a Yasir a sakup bun nu dalepa a Gad. 6 Na linemu bun silan kanu kasakupan nu dalepa a Giliad taman kanu dalepa a Kadis a kalupan nu manga taw a Hit. Iganat kanu dalepa a Dan na linemibet silan 'bpawang kanu dalepa a Sidun, 7 entu pan ka linemu silan kanu siudad a Tair a nabalibet'a malambeg a alad taman den kanu manga siudad'u manga taw a Hib enggu kanu manga taw a Kanaan. Na nia den mauli a pibpawangan nilan na su dalepa a Birsiba a lu sa Nigib a sakup'u dalepa a Yahuda. 8 Na guna nilan mapasad su entu na mimbalingan silan lu sa Awrusalim. Na nakasiyaw ulan enggu duapulu gay i kinanggula nilan sa entu. 9 Na pidtalu den ni Yuab kanu Daud su kadakel'u manga mama a makagaga den embunua. Na manga walu gatus ngibu i kadakel'in i ebpun kanu manga taw a Israil enggu lima gatus ngibu menem i kadakel'in i ebpun kanu manga tupu nu Yahuda.10 Ugaid'a guna mapasad su entu na nakadsendit su Daud kanu kinapanggula nin sa entu kanu manga taw nin taman sa nia nin nadtalu kanu Kadenan a Mapulu na “Nakandusa aku sa masela kanu nia a pinggula ku. Hu Kadenan a Mapulu, ampun aku nengka kanu kababalan a nia a pinggula ku.” 11 Na dala pamun makambangun su Daud kanu mapita na sinugu den nu Kadenan a Mapulu su nabi a bedtuan sa Gad a tatap pedsampay kanu kadtalu nu Kadenan lu kanu Daud. 12 Nia inisugu nu Kadenan kani Gad na “Lu ka kani Daud ka isampay nengka su nia sa lekanin sa ‘Nia ba i katigan nu Kadenan a Mapulu sa leka. Pamili ka kanu telu timan a nia a tiuba u endaw i kiugan nengka a itingguma ku sa leka.’ ” 13 Daka linemu den mambu si Gad kanu Daud ka nia nin lun pidtalu na “Endaw sa telu timan a nia i pamilin nengka? Telu lagun a kanggutem'u dalepa? Atawa ka telu ulan a edsaluban kanu bu nu manga kuntela nu, atawa ka telu gay a mapasang a tiuba kanu dalepa nu? Pagitung ka sa mapia u endaw i pamilin nengka ka enggu ku makasampay kanu Kadenan a Mapulu a sinemugu sa laki.” 14 Na nia inisumpat'u Daud kani Gad na “Mapasang a benal sa laki su kapamili ku sa nan. Nia ku tinemu i su Kadenan a Mapulu demun i temiuba sa lekitanu kumin kanu manga kuntela ku ka katawan ku i sangat man i kakalimu nu Kadenan.”
15 Daka napatingguma su Kadenan a Mapulu sa tiuba kanu manga taw a Israil iganat kanu entu ba a mapita taman kanu gay a initandu nu Kadenan. Na pitupulu ngibu i minatay a taw iganat kanu dalepa a Dan taman den kanu dalepa a Birsiba. 16 Na guna su ipegkayang den nu malaikat'u Kadenan su lima nin ka enggu nin kaimatayan su manga taw sa Awrusalim na sinapalan sekanin nu Kadenan a Mapulu kagina nalat i nanam'in kanu manga taw sa nia nin pidtalu na “Di ka den ipedtalus.” Na kanu entu ba a timpu na su malaikat'u Kadenan a Mapulu na lu pedtindeg kanu tagikan ni Arauna a taw a Hibus.
17 Na guna mailay nu Daud su malaikat a pedtiuba kanu manga taw na nia nin nadtalu kanu Kadenan a Mapulu na “Saki man i nakandusa, dikena su manga taw a nia a dala pinggula nin a mawag, na nia dait na saki taman kanu sakambinabatan ku i patala ka kanu tiuba nengka.” 18 Na kanu entu bun ba a gay na pibpawangan nu Nabi Gad su Daud ka inisampay nin lun su inisugu nu Kadenan a Mapulu a “Lu ka kanu tagikan ni Arauna a taw a Hibus ka umbal ka lu ba sa pegkurbanan kanu Kadenan a Mapulu.” 19 Na linemu den mambu su Daud sia luyud kanu inisugu nu Kadenan a Mapulu sia nakanggulalan kani Gad. 20 Na guna mailay ni Arauna a pakauma su Daud apeg'u manga taw nin na sinemupeg sekanin ka sinemugiud kanu adapan nu Daud 21 ka nia nin lun nakaidsa na “Hu mapulu ku a datu, ngintu ka sinemia ka?” Na nia inisumpat'u Daud na “Sinemia ku ka 'bpamasan ku su tagikan nengka ka 'bpagumbalan ku sa pegkurbanan su Kadenan a Mapulu ka enggu maawa den su tiuba a nia.” 22 Na nia pidtalu ni Arauna kanu datu na “Hu datu, di ka den 'bpamasa ka kua ka den ka enggu nengka mausal kanu kagkurban nengka. Kua ka bun i manga tudu a nia a sapi ka enggu nengka makagkurban a kurban a pedtutungen langun. Na iunut'engka den i manga guyudan a nia a 'bpagusalen sa kapenggik apeg'u manga ingkul ka enggu makalaleg. 23 Na su langun nu nia na ibpagenggay ku den sa leka. Pangeni-ngenin ta i taliman nu Kadenan a Mapulu a Kadenan nengka su nia a kurban nengka.” 24 Ugaid'a nia inisumpat'u datu na “Di mapakay a di ku seka bayadan ka di aku 'gkurban kanu Kadenan ku a Mapulu sa dala 'gkaawa sa laki.” Daka binayadan nu Daud su tagikan ni Arauna apeg'u manga tudu nin a sapi sa lima-wati a pilak. 25 Entu pan ka minumbal sekanin lu sa pegkurbanan kanu Kadenan a Mapulu ka migkurban sa manga kurban a pedtutungen langun enggu kurban a tanda sa kinaisa sia kanu Kadenan. Na sinawal mambu nu Kadenan a Mapulu su pangeni-ngeni a entu nu Daud kanu manga taw a Israil taman sa naawa mambu su mapasang a entu a tiuba kanu manga taw a Israil.
Wassalam