Kitab Istir
sia kanu Kitab Taurat
Su Kinaawa nu Kaputeli ni Basti
1
Nia ba su nanganggula paganay kanu timpu nu Sultan Ahasirus.a Sekanin i mindatu kanu dalepa a India taman sa Itupia a nia nin nasakupan na magatus enggu duapulu enggu pitu kaprubinsia.2-3 Na kanu ikatelu lagun nu kapendatu nin na su 'gkangaunutan enggu su 'gkangasaligan nin na inadilan nin sa masela a kapedsela-sela lu kanu tulugan nin sa siudad a Susa. Na nia tinemalabuk lu ba na su manga mapulu nu sundalu nu Pirsia enggu Midia enggu su manga taw a balabansa taman den kanu manga gubilnadul'u manga dalepa. 4 Na nia kinauget'u entu a kinadsela-sela na nakanem ulan kagina inipailay nu sultan kanilan su langun nu kakawasan nin enggu su lawan i kasela nin a kapegkagaga nin.
5 Na guna mapasad su entu na midsela-sela pamun su sultan sa kanu dalem'u pitu gay lu kanu pamumulanan kanu lama-lama nu tulugan nin. Na nia nin pinatalabuk na su langun nu taw sa dalepa a Susa a magidsan pan i kawasa atawa ka miskinan. 6 Na pibpalasan nilan su lama-lama nu tulugan sa manga mapia a ginis a bilu enggu maputi a pinamalumpungan sa tali a lambayung a nia nin sangkatan na pilak lu kanu manga palaus a marmul. Na su manga ayanan nin na bulawan enggu pilak a inibetad kanu embias-bias i palas'in a inilantay a marmul, nakar enggu ped pan a manga balaalaga a watu. 7-8 Na su 'bpanginemen na inibetad sa embias-bias i palas'in a bulawan a basu. Subela-subela su kadakel'u 'bpaginemen a ig'a ubas a alak sia luyud kanu kakawasan nu pendatuan nin. Inisugu nu sultan sa enggan sa 'bpanginemen a ig'a ubas a alak su langun nu manga ana sa endaw taman i kiug'ilan. 9 Na gagalu nu kapedsela-sela nu Sultan Ahasirus na midsela-sela bun mambu su kaluma nin a si Puteli Basti a kaped'in su manga babay lu kanu tulugan.
10 Na guna mauma su ikapitu gay nu kinadsela-sela a entu na 'gkapia a benal i ginawa nu sultan sa kabpaginem'in sa ig'a ubas a alak. Na inipatawag'in su pitu kataw a 'gkasaligan nin a kinapun a manga mama a si Mihuman, Bista, Halbuna, Bigta, Abagta, Sitar enggu si Karkas 11 ka pinasuguan nu sultan su Puteli Basti sa kalu nin sa lekanin a iselub'in su sansangan nin sa kaputeli nin ka enggu mailay nu manga taw nin taman kanu 'gkangasaligan nin su kanisan nu puteli ka sangat man i kanisan nin. 12 Ugaid'a guna madtalu nu manga panunugun su entu kanu puteli na dala sekanin paginugut tembu sangat a nalipunget su sultan.
13 Na mana bun kanu nalayaman a ukit'u sultan na inipatawag'in su 'gkangasaligan a mataw kanu manga adat-betad'ilan enggu manga atulan nu pendatuan nin. 14 Na nia ba a entu inipatawag na si Kalsina, Sitar, Admata, Tarsis, Miris, Marsinu enggu si Mimukan. Na silan ba a entu su pitu kataw a manga mapulu a 'gkaunutan lu kanu pendatuan nu dalepa a Pirsia enggu Midia a masupeg kanu sultan. 15 Na inidsa nin kanilan i “Sia kanu manga atulan na ngin ba i dait a pakaidan kanu Puteli Basti sa kanu dala nin kapaginugut kanu kasuguan lun nu sultan a inipasampay nin kanu manga sinaligan a manga mama a kinapun?” 16 Na nia inisumpat'i Mimukan sia kanu adapan nu sultan enggu kanu 'gkangaunutan na “Nakandusa kanu sultan su Puteli Basti taman den kanu langun nu 'gkangaunutan enggu kanu manga taw kanu manga prubinsia a 'gkasakupan nu sultan. 17 Ka su nia ba man a pinggula nu puteli na natalatantu a kasabutan nu langun nu babay kanu pendatuan. Na amaika maitu na kapamagilingan nilan su dili kapagadat kanu kaluma nilan ka nia nilan edtalun na ‘Su Puteli Basti na dala nin paginuguti su sultan kanu kinapasugu nin lun.’ 18 Na kanu nia bun ba a gay na su manga balapantag a manga babay kanu dalepa a Pirsia enggu Midia a makakineg kanu pinggula nu puteli a nia na maitu bun ba i enggulan nilan kanu kaluma nilan a 'gkangasaligan, na amaika maitu na maawa den su kapagadat tembu kalipungetan den silan nu manga kaluma nilan. 19 Hu sultan, amaika kasuatan nengka na paumbal ka sa kasuguan a di den makaubay si Puteli Basti sa kanu sultan taman sa maawa sekanin kanu kaputeli nin. Na ipaamung su entu a kasuguan kanu atulan nu dalepa a Pirsia enggu Midia ka enggu dili den madsalin-salin. Na sambian sekanin sa labi lawan pan i kapia nin kumin sa lekanin. 20 Na amaika makasampay den su entu a kasuguan nu sultan kanu lusud'u langun nu pendatuan nin na natalatantu den a pagadatan nu langun nu babay su kaluma nilan magidsan pan i balabansa a taw atawa ka dikena balabansa.”
21-22 Na nasuatan nu sultan enggu su 'gkangaunutan nin su pidtalu a entu ni Mimukan tembu inipasulat'u sultan su entu sia luyud kanu uman i basa nu taw sa kanu manga prubinsia a nasakupan nin ka inipapait'in kanilan sa nia dalem'u sulat na “Su mama i dait a kaunutan kanu sakambinabatan nin.”