Su Kinabaluy ni Istir a Puteli
2
Na guna maipus su entu a nanganggula na naawa den su lipunget'u Sultan Ahasirus. Na 'gkagkalendem'in bun si Basti enggu su pinggula nin sa lekanin taman den kanu atulan a inumbal'in sabap kanu pinggula ni Basti. 2 Na guna su maitu na nia pidtalu nu 'gkangasaligan kanu sultan na “Nia mapia na pangilayan nami sa manga manisan a laga su sultan. 3 Na mamili su sultan sa kangasaligan sa kanu uman i prubinsia a nasakupan nu pendatuan nin a makapangilay sa manga manisan a laga ka edtapiken nilan kanu pegkalebenan nu manga babay kanu siudad a Susa. Ipatuludu silan nu sultan kani Higay a kinapun a mama a 'gkasaligan kanu manga babay nu sultan. Sekanin bu i mataw menggay kanilan sa manga nasisita nilan sa kadtinilakan. 4 Na apia entain kanilan i kasuatan nu sultan na entu ba i makasambi kani Basti a mabaluy a puteli.” Na nasuatan nu sultan su entu. Na pinggula nin den mambu su entu.5 Na kanu entu ba a timpu na aden isa a Yahudi a bedtuan sa Murdikay a lu pegkaleben sa siudad a Susa. Si Murdikay a nia na wata ni Yahir a apu ni Simi, si Simi menem na muliataw ni Kis a ebpun kanu tupu nu Buniamin. 6 Na si Kis ba a nia na nadtatanggit sa Babilunia a ebpun sa Awrusalim a kaped kanu madakel a nasigkem'u Sultan Nibukadnisar apeg den nu Sultan Yikunias sa dalepa a Yahuda. 7 Na saleta mambu na si Murdikay na aden wata magali nin a laga a mapia i kanggulawas'in enggu manisan a nia nin ngala na Hadasa a bedtuan bun sa Istir. Na guna matay su manga lukes'in na si Murdikay den i nakatuludu sa lekanin taman sa initimbang'in sa wata nin demun. 8 Na guna den makasampay su kasuguan nu sultan pantag kanu kabpangilay sa manganisan a manguda a laga na madakel a manganguda a laga i linimud lu kanu pegkalebenan nu manga babay sa siudad'u Susa, na isa kanilan si Istir. Na si Higay i pedtuludu kanu langun nu manga babay a entu. 9 Na sangat a nasuatan ni Higay si Istir taman sa pebpia-pianan nin a benal enggu pinangenggan nin mamagayas sa makan enggu manga mausal'in sa kadtanusan. Na inenggan nin bun sa pitu kataw a manguda a manga babay a ebpun kanu tulugan nu sultan a makapananabangan sa lekanin enggu inenggan nin bun sa mapia a bilik.
10 Na saleta mambu na si Istir na dala nin a benal edtalua i nia nin nabpunan na su manga taw a Yahudi enggu dala nin bun edtalua u entain i manga pagali nin kagina pinadtakena sa lekanin i entu ni Murdikay. 11 Na uman-uman gay na 'bpelu si Murdikay kanu padsudan nu pegkalebenan nu manga babay ka enggu nin 'gkatawan u ngin i 'gkambebetad'i Istir enggu ngin den i 'gkanggula nin.
12 Na saleta mambu na nauma su timpu a kapangadap'u uman i isa a manga laga kanu sultan ulian na kinadtanusan nilan kanu dalem'u salagun sia luyud kanu atulan nu kauget'u kadtanusan nu manga laga a nem ulan na nanidsing bu silan sa lana a mira enggu su nem ulan menem na nanidsing bu silan sa kamutan enggu ped pan a pakagkanisan. 13 Na sia kanu kapangadap'u uman i laga kanu sultan na ibpagenggay kanu laga su apia ngin a pegkiugan nin a mapananggit'in sa kapangadap'in kanu sultan. 14 Na timpu na magabi i kabpangadap'ilan kanu sultan ugaid'a na nia nin kagkapita na pananggiten silan lu kanu pegkalebenan nu manga kaluma nu sultan a nia 'gkasaligan lun na su mama a kinapun a bedtuan sa Sagas. Na dala isa bu a makambalingan lu kanu sultan nia tabia na nasuatan sekanin enggu ipatawag'in 'bpaluman.
15 Na si Istir a nia a wata ni Abihail a nia napagkasela lun na su wata magali nin a si Murdikay na guna mauma su timpu a kapangadap'in kanu sultan na dala ped a pinangeni nin nia tabia na su ngin bu i pidtalu sa lekanin ni Higay a 'gkasaligan kanu manga babay. Na sangat a 'gkasuatan sekanin nu apia entain a pakailay lun. 16 Na nia natabuan nu kinapangadap'i Istir na ikasapulu a ulan-ulan a bedtuan sa Tibit a ikapitu lagun kanu kapendatu nu Sultan Ahasirus. 17 Nalilinian enggu nasuatan nu sultan si Istir kumin kanu langun nu manga babay a laga a nangadap sa lekanin, tembu inisangan nin kani Istir su sansangan sa kaputeli ka sekanin i nabaluy a nakasambi kani Basti. 18 Daka nangaden su sultan sa masela a kinadsela-sela kani Istir. Na tinemalabuk su langun nu 'gkangasaligan nin enggu 'gkangaunutan. Na inisugu nin kanu entu ba a gay i dala enggalebek kanu langun nu prubinsia ka edsela-sela silan taman sa nangenggay su sultan kanu manga taw sia luyud kanu kakawasan nu pendatuan nin.
Inilipuas'i Murdikay su Sultan
19 Na linimud menem su manga babay a laga, saleta mambu na si Murdikay na lu kanu bengawan nu tulugan. 20 Dala bun edtalua ni Istir i nia nin nabpunan na manga taw a Yahudi enggu dala nin bun edtalua u entain i manga pagali nin a mana bun su pinadtakena sa lekanin ni Murdikay ka pinaginugutan nin su entu sa mana bun su timpu a kapedtuludu nin pan sa lekanin. 21 Aden timpu a gagalu nu kabpamagagayan ni Murdikay lu kanu bengawan nu tulugan, na su dua kataw a manga mama a kinapun a pedtameng kanu bilik'u sultan a bedtuan sa Bigtana enggu Tiris na 'gkasakitan nilan sa ginawa su sultan taman sa napagayunan nilan i kaimatay nilan lun. 22 Na natawan i entu ni Murdikay tembu pidtalu nin i entu kani Puteli Istir. Na inilakit menem ni Puteli Istir kanu sultan su entu ba a pidtalu ni Murdikay enggu pidtalu nin bun i si Murdikay i nakakineg sa entu. 23 Na inipaamad'u sultan su entu taman sa naamad'in i benal su pidtalu ni Murdikay. Daka inipabitin si Bigtana enggu si Tiris lu kanu pinatindeg a kayu. Na inipasulat'u sultan sia kanu adapan nin su nia ba a nanggula lu kanu libelu a 'bpanulatan kanu napagukit-ukitan sia kanu kapendatu nin.