Su Kapegkahanda ni Haman kanu Kaibped'in Mimatay kanu manga Taw a Yahudi
3
Na guna maipus su manga timpu na inipangkat'u Sultan Ahasirus sa galebekan si Haman a wata ni Hamidata a tupu nu Agag. Sekanin den i mapulu sa langun kanu 'gkangasaligan nu sultan. 2 Na langun nu 'gkasaligan nu sultan a lu kanu bengawan nu tulugan na pedsugiud kani Haman kagina entu ba i kasuguan nu sultan. Ugaid'a si Murdikay na dili sekanin pedsugiud atawa ka 'bpagadat kani Haman. 3 Na inidsan sekanin nu manga 'gkasaligan nu sultan sa “Ngintu ka dili nengka 'bpaginugutan su kasuguan nu sultan?” 4 Na nia inisumpat'i Murdikay na “Yahudi aku man.” Na uman-uman gay na pedtaluan nilan bu sekanin pantag kanu entu ba ugaid'a dili bun sekanin 'bpakikineg, tembu inibpanun nilan kani Haman su pantag sa entu ba ka 'bpagilayanan nilan u padtadayn ni Haman sekanin sa entu sabap kanu pidtalu nin. 5 Na guna mailay ni Haman i dili sekanin pedsugiudan ni Murdikay na sangat a nalipunget sekanin. 6 Na natawan ni Haman i Yahudi si Murdikay tembu nia nin napagitung na dikena bu si Murdikay i dait a imatayan nin ka langun den nu manga pagidsan nin a taw a Yahudi kanu langun nu 'gkasakupan ni Sultan Ahasirus.7 Na kanu muna-muna a ulan-ulan nu lagun a ulan-ulan a Nisan a ikasapulu enggu dua lagun kanu kapendatu ni Sultan Ahasirus na inisugu ni Haman i kambunuta ka enggu nin kasabutan u kanu i mapia a gay enggu ulan-ulan kanu kanggulalan nin kanu kahanda nin. Na nia nabunut na su ikasapulu enggu telu gay kanu ikasapulu enggu dua a ulan-ulan nu lagun a bedtuan sa Adar.
8 Na pidtalu ni Haman su entu kanu Sultan Ahasirus sa nia nin pidtalu na “Hu sultan, aden manga taw a lu pegkaleben kanu embala-bala a prubinsia nu 'gkasakupan nengka a salakaw i kasuguan nilan kumin kanu ped a taw enggu dili nilan 'bpaginugutan su manga kasuguan nengka. Na dili i nia makagkapia kanu kapendatu nengka amaika padtadayn nengka silan. 9 Na amaika kasuatan nengka na umbal ka sa kasuguan sa imatayan silan langun. Na amaika maitu na menggay aku sa telu gatus enggu limapulu kakilu a pilak kanu 'gkangasaligan nengka ka enggu nilan makabetad lu kanu kakawasan nu pendatuan nengka.”
10 Guna su maitu na inenggay nu sultan kani Haman a kuntela nu manga taw a Yahudi su sising'in a ibpaniap'in. 11 Na pidtalu bun nu sultan kani Haman i “Na seka den i mataw kanu kaaden nengka enggu kanu manga taw a nan. Enggula ka den u ngin i dait a pakaidan nengka kanilan.”
12 Na kanu ikasapulu enggu telu gay kanu muna-muna a ulan-ulan nu lagun na inipatawag'i Haman su langun nu pasusulat'u sultan ka napaumbal sekanin sa sulat a sia luyud kanu basa nu uman i isa a lu pakatumpa kanu 'gkangasaligan nu dalepa, kanu gubilnadul'u manga prubinsia enggu kanu 'gkangaunutan nu embalang-balang a manga taw. Na su nia ba a sulat na inumbal kanu ingala nu sultan enggu tiniapan kanu sising'in. 13 Na su entu a sulat na ipapait kanu langun nu prubinsia a nasakupan nu pendatuan nin a nia nakadalem lun na su kasuguan a ibpeden mimatay su langun nu taw a Yahudi magidsan pan i wata, matua, babay enggu mama. Na su langun nu kaaden nilan na inggay kanu manga taw a mimatay kanilan. Na inggulalan nilan su nia sia kanu ikasapulu enggu telu gay kanu ikasapulu enggu dua a ulan-ulan nu lagun a bedtuan sa Adar. 14 Na ipapait su entu a kasuguan kanu uman i prubinsia asal'a makapagadil silan sa kanggulalan nilan kanu entu amaika mauma den su entu ba a gay. 15 Na malengkas i kinapasampay nu sinugu kanu entu a kasuguan apeg den kanu lusud'u Susa. Na saleta mambu na gagalu nu kabpamagagayan nu sultan enggu si Haman a 'bpaginem sa ig'a ubas a alak lu kanu tulugan na su manga taw sa Susa na 'gkangabulibug sabap sa kanu entu a kasuguan.