Su Kinapangeni ni Murdikay sa Tabang
4
Na guna katawi ni Murdikay su langun nu kahanda ni Haman kanilan na kinisi nin su balegkas'in ka mimbalegkas sa saku enggu pinametadan nin sa aw su ulu nin.a Na linemalakaw sekanin lu kanu siudad a 'bpaguguliang sa matanug 2 taman sa nakauma sekanin lu kanu bengawan nu tulugan nu sultan ugaid'a lu bu ba sekanin nataman ka dili pedsugutan a makaludep lu su apia entain a mimbalegkas sa saku. 3 Na guna makauma su entu a kasuguan nu sultan kanu manga prubinsia a nalapatan nu manga taw a Yahudi na sangat a nalidu i ginawa nilan. Dala silan pamegkan enggu namanguliang silan sa matanug. Na kadakelan kanilan na namangiga den a mimbabalegkas sa saku a pinametadan nilan sa aw su manga ulu nilan.4 Na guna mapanudtul kanu Puteli Istir nu 'bpananabangan sa lekanin a manga babay apeg'u pinangapun a 'gkasaligan a mama su pinggula ni Murdikay na sangat a nalidu i ginawa nin. Daka pinapaitan nin sa balegkas a makasambi kanu pimbalegkas'in a saku ugaid'a dala i entu talima ni Murdikay. 5 Na inipatawag'i Puteli Istir su pedtuludu lun a si Hatak a isa bun kanu kinapun a 'gkasaligan nu sultan. Pinalu nin si Hatak kani Murdikay ka enggu nin katawan u ngintu ka pinggula nin su entu. 6 Guna su maitu na pibpawangan ni Hatak si Murdikay lu kanu plasa kanu kasangulan nu bengawan nu tulugan nu sultan. 7 Na pinanudtul'i Murdikay kani Hatak su langun nu nanggula enggu su kasela na inibpasad'i Haman a inggay nin kanu sultan a makauman kanu kakawasan nu dalepa a pendatuan nin asal'a maibped matay su manga taw a Yahudi. 8 Na inenggay ni Murdikay kani Hatak su pagidsan nu sulat a entu a kasuguan nu sultan sa kaimatay kanu langun nu manga taw a Yahudi a ibpelapat kanu langun nu taw sa Susa. Na pinangeni nin i ipailay nin su entu kani Puteli Istir enggu edsinantalen nin sa lekanin su tidtu-tidtu a 'gkanganggula nilan taman sa mangeni su Puteli Istir sa tabang kanu sultan enggu ipamagayuk'in lun i latan sa nanam su manga pagidsan nin a Yahudi.
9 Na guna makambalingan si Hatak lu kani Puteli Istir na pinanudtul'in den lun su ngin i pidtalu ni Murdikay sa lekanin. 10 Na pinambalingan menem ni Puteli Istir si Hatak lu kani Murdikay ka inipadtalu nin lun i 11 “Katawan nu langun nu 'gkangasaligan nu sultan taman den kanu langun nu taw kanu lusud'u pendatuan nin su atulan sa apia entain i semupeg kanu sultan lu kanu ludep'u lama-lama nin magidsan pan i mama atawa ka babay sa dala nin ipatawag na natalatantu a matay nia tabia na tendun nu sultan kanu bulawan a tungked'in. Na apia saki na namakasaulan den samaya i dala nin kapatawag sa laki.”
12 Na guna makineg'i Murdikay su katigan a entu ni Puteli Istir 13 na nia nin menem inipasampay kani Puteli Istir na “Apia nan ka kanu tulugan nu sultan na di ka 'bpagitunga i di ka malalagit matay kanu manga ped'engka a Yahudi. 14 Ka amaika lemenek ka bu kanu nia ba a 'gkanganggula na apia ngin bun man na aden edtabang kanu manga taw a Yahudi sa kalipuas'ilan ugaid'a seka taman kanu sakambinabatan nengka na maibped den matay. Na aden a entu na entu ba i sabap'in i kinabaluy nengka a puteli sa kanu nia ba a manga timpu.” 15 Na guna su maitu na inipasampay menem'u Puteli Istir lu kani Murdikay i 16 “Limud ka su langun nu manga taw a Yahudi sia sa lusud'a Susa ka edtalu ka sa kanilan i dili silan keman enggu minem kanu dalem'u telu gay sabap sa laki. Na maitu bun ba i enggulan ku apeg'u manga panunugun ku a manga babay. Na u maipus su entu na entu pan ka mangadap aku kanu sultan apia sungkang i nia kanu atulan sia kanu pendatuan nin. Na amaika nia nin manggula i matay aku na maitu den ba.” 17 Na ginemanat den mambu si Murdikay enggu pinggula nin su langun nu pidtalu ni Puteli Istir sa lekanin.