Su Kinapagadil'u Puteli Istir sa Kadsela-sela kanu Sultan
5
Na guna mauma su ikatelu gay nu dili nilan kabpaginum enggu kapegkan na iniselub'i Puteli Istir su balegkas'in kanu kapuputeli nin ka linemu sekanin kanu lama-lama nu bilik'u kulesi nu sultan kanu kasultan nin. Na saleta mambu na 'bpagagayan su sultan lu kanu kulesi nin a lu pedsangul kanu bengawan. 2 Na endaw i kinailay nu sultan kanu Puteli Istir na sangat a napia i ginawa nin tembu natendu nin kanu bulawan a tungked'in. Na minubay mambu su Puteli Istir ka kinembil'in su pusan nu bulawan a tungked'u sultan. 3 Na inidsan sekanin nu sultan sa “Puteli Istir, ngin i nasisita nengka? Edtalu ka sa laki ka apia nia nengka pan pangenin i sabad kanu pendatuan ku na inggay ku sa leka.” 4 Na nia inisumpat'i Puteli Istir na “Hu sultan, amaika makasuat sa leka na 'bpagenggaten ku seka enggu si Haman kanu kapedsela-sela a 'bpagadilen ku sa leka amay-amay.” 5 Daka inipatawag mamagayas'u sultan si Haman kanu manga panunugun nin sa nia nin pidtalu na “Pasia nu mamagayas si Haman ka enggu nami kaunutan su 'bpangenin nu Puteli Istir.” Na guna su maitu na tinemalabuk den mambu su sultan enggu si Haman kanu entu a kapedsela-sela a inadil'u Puteli Istir. 6 Na gagalu nu kabpaginem'ilan sa ig'a ubas a alak na inidsan nu sultan su Puteli Istir sa “Ngin i pegkiugan nengka a entu 'bpangeni? Edtalu ka sa laki ka inggay ku sa leka apia sabad pan kanu pendatuan ku.” 7 Na nia inisumpat'u Puteli Istir na “Hu sultan, nia ku 'bpangenin na 8 amaika tidtu-tidtu a 'gkasuatan aku nu sultan enggu inggay nin su ngin i 'bpangenin ku na 'bpangenin ku i talabuk ka pamun 'bpaluman enggu si Haman kanu kapedsela-sela a pagadilen ku namag. Ka lu ku den ba edtalun sa leka su 'bpangenin ku.”Su Kinapagitung'i Haman sa Kaimatay nin kani Murdikay
9 Kanu entu bun ba a gay na ginemanat si Haman lu a 'gkagalaw a benal. Ugaid'a guna nin mailay si Murdikay lu kanu bengawan nu tulugan nu sultan a dala demun pailay sa adat enggu gilek sa lekanin ka apia nin kinadtindeg na sangat a nalipunget si Haman. 10 Ugaid'a apia ka maitu na tinemigkel sekanin enggu tinemalus bun sekanin muli. Na nia nin kinauma lu sa walay na inipatawag'in su manga pakat'in enggu su kaluma nin a si Siris 11 ka inimbabadtug'in kanilan su kakawasan nin, kadakel'u wata nin enggu su kapembadtug'u sultan sa lekanin apeg den su kinaenggay sa lekanin sa mapulu sa langun a pangkatan nu galebekan nu langun nu 'gkaunutan nu sultan enggu kanu ped pan a panunugun nu sultan. 12 Na nia nin pan pidtalu na “Liu pan sa entu, na saki bu i inenggat'u Puteli Istir a madtagapeda nu sultan kanu inadil'in a kapedsela-sela. Na namag menem a entu na papedtalabuken aku nin pamun a kaped'u sultan kanu 'bpagadilen nin pebpaluman a kapedsela-sela. 13 Ugaid'a su langun nu nia ba na dili pamun makasukul sa laki taman sa mailay ku pan si Murdikay a taw a Yahudi a 'bpagagayan lu kanu bengawan nu tulugan nu sultan.”
14 Na nia pidtalu sa lekanin nu kaluma nin enggu su manga pakat'in na “Enduken man ka dili ka 'bpapagumbal sa kayu a pembitinan lun a manga duapulu enggu dua kamitru i kalendu nin ka pangeni ka kanu sultan i bitinen lu ba si Murdikay asal'a kanu kambalingan nengka a kaped'u sultan lu kanu inadil a entu a kapedsela-sela na mapia den i ginawa nengka.” Na nalilinian ni Haman su pidtalu nilan a entu tembu inipaumbal'in su entu.