Su Kinabadtug'u Sultan kani Murdikay
6
Na kanu entu bun ba a magabi na dili pakatulug su sultan, na inipakua nin su libelu a 'bpanulatan kanu balapantag a 'gkanggula sia kanu kapendatu nin. Na inipabatia nin ka pinakikineg'in su entu. 2 Na nabatia su makapantag kanu kinatekaw ni Murdikay kanu kahanda sa kaimatay nu pinangapun a mama a si Bigtana enggu Tiris kanu sultan a kanu entu ba na silan i 'gkasaligan a pedtameng kanu bengawan nu bilik'u sultan. 3 Daka inidsa nu sultan i “Ngin i nakaenggay a kabadtugan kani Murdikay kanu kapianan a entu a nanggula nin sa laki?” Na nia inisumpat'u manga panunugun a pedtuludu sa lekanin na “Dala nakaenggay lun.” 4 Na saleta na nakaidsa nu sultan i “Entain i entu kanu lama-lama?” Na si Haman mambu na nakauma kanu lama-lama nu tulugan ka pedtalun nin den kanu sultan su kahanda nin a kaimatay kani Murdikay lu kanu inipaumbal'in a kayu a pembitinan. 5 Na nia inisumpat'u manga panunugun nin na “Hu sultan, si Haman i entu.” Na nia pidtalu nu sultan na “Patalus ka sekanin sia.”6 Na tinemalus mambu si Haman, na inidsa nu sultan sa lekanin i “Ngin i dait a pakaidan kanu taw a pegkiugan 'bpagenggan nu sultan sa kabadtugan?” Na nia natagu sa ginawa ni Haman na “Saki i entu ba, ka dala den man ped a badtugen nu sultan a liu pan sa laki.” 7 Na nia nin inisumpat na “Hu sultan, nia ka pakaidi lun na 8 ipakua nengka su isa kanu lambung'engka sa kasultan a nausal'engka den. Ipakua nengka bun su kuda a nagkudan nengka den a betadan sa sansangan 9 entu pan ka isugu nengka kanu mapulu sa langun nu 'gkangasaligan nengka i ipaselub'in su entu lu kanu mama a 'bpagenggan nengka sa kabadtugan enggu pagkudan nin kanu kuda entu pan ka tundanen nin ka ilibet'in kanu plasa nu siudad a ipananawag'in i ‘Maya ba i 'gkanggula nu taw a inenggan nu sultan sa kabadtugan.’ ” 10 Na daka nia pidtalu nu sultan kani Haman na “Pamagayasi ka kemua su lambung ku enggu su kuda ku ka enggula ka kani Murdikay a taw a Yahudi su langun nu pidtalu nengka a nan a entu sekanin 'bpagagayan kanu bengawan nu tulugan ku.”
11 Na kinua den mambu ni Haman su lambung'u sultan ka iniselub'in kani Murdikay enggu pinagkuda nin ka inilibet'in kanu plasa enggu inipananawag'in i “Maya ba i 'gkanggula nu taw a inenggan nu sultan sa kabadtugan.”
12 Na guna maipus su entu na mimbalingan si Murdikay lu kanu bengawan nu tulugan nu sultan. Ugaid'a si Haman na nakapamagayas a benal muli a nakadtalikumbung a 'gkalidu a benal i ginawa nin. 13 Na kanu kinauma nin lu kanu walay nin na pinanudtul'in kanu kaluma nin a si Siris enggu kanu manga pakat'in su langun nu entu a nanggula. Na nia nilan inisumpat sa lekanin na “Amaika si Murdikay ka taw a Yahudi na nan den ba i punan a kalusak'engka. Dili nengka sekanin makapalusak ka seka i makapalusak'in.”
14 Na gagalu nu kapembitiala nilan na nakauma mambu su manga panunugun nu sultan a pinangapun a mama ka pinaunut'ilan mamagayas si Haman lu kanu kapedsela-sela a inadil'u Puteli Istir.