Su Kinaimatay kani Haman
7
1-2 Na tinemalabuk menem su Sultan Ahasirus enggu si Haman kanu kapedsela-sela a inadil'u Puteli Istir kanu temundug a gay. Na gagalu nu kabpaginem'ilan sa ig'a ubas a alak na inidsa menem 'bpaluman nu sultan kanu Puteli Istir i “Ngin besen i entu ba a 'bpangenin nengka Puteli Istir? Edtalu ka, ka inggay ku sa leka apia sabad pan kanu pendatuan ku.” 3 Na nia inisumpat'u puteli na “Hu sultan, amaika 'gkasuatan aku nengka enggu miug ka na 'bpangenin ku sa leka i ilipuas aku nengka enggu su manga taw a pagidsan ku sa tribu kanu natatalanged a kapatay. 4 Ka nabpasa kami man ka enggu kami maibped matay. Ka mana bu man ka pibpasa kami asal'a mapangungulipen na di ku den imbuku sa leka kagina dikena bun gaid dait a ilingasa ku pan i entu sa leka.”5 Na inidsa nu sultan kanu puteli i “Entain ba i pakatika a entu penggula sa lekanu sa maitu ba enggu endaw sekanin?” 6 Na nia inisumpat'u puteli na “Namba si Haman a nan i dupang a pegkuntela sa lekami!” Na saleta mambu na si Haman na lu kanu adapan nu sultan enggu puteli a sangat a 'gkagilekan.
7 Na nakadtindeg su sultan ka sangat a nalipunget taman sa nakalu sekanin kanu pamumulanan kanu lama-lama nu tulugan. Saleta mambu na si Haman na minubay kanu puteli ka napakalimu-limu sa lekanin kagina katawan nin den i natalatantu a imatayan sekanin nu sultan.
8 Na guna embalingan su sultan ebpun kanu lama-lama na nauman nin a pedsugiud si Haman lu kanu ayanan a 'bpagagayanan nu puteli. Na nia nadtalu nu sultan na “Nginan ka mana su pegkiugan nengka pan pendupang su puteli a nan sia kanu adapan ku enggu sia pan kanu tulugan?” Na endaw i kinadtalu nu sultan sa entu na sinigkem'u manga tameng a kinapun si Haman a sinukub'ilan i ulu nin. 9 Na isa kanu manga tameng'u sultan a si Harbuna i midtalu sa “Napaumbal den si Haman sa kayu a pembitinan nin kani Murdikay a linemipuas sa leka a nia nin kalendu na duapulu enggu dua kamitru a lu kanu ubay nu walay nin.” Na nia inisumpat'u sultan na “Bitin nu lu ba si Haman!”
10 Na binitin nilan den mambu si Haman kanu kayu a inadil'in kani Murdikay. Guna su maitu na naawa den su lipunget'u sultan.