Su Kinapaninindeg'u Puteli Istir kanu Pagidsan nin a manga Taw a Yahudi
8
Na kanu entu bun ba a gay na inenggay nu Sultan Ahasirus kani Puteli Istir su langun nu kaaden ni Haman a kuntela nu manga taw a Yahudi. Na pidtalu ni Puteli Istir kanu sultan i 'bpagalia silan kani Murdikay tembu nangadap si Murdikay kanu sultan. 2 Na pinukas'u sultan su sising'in a ibpaniap a kinua nin kanu lima ni Haman ka inenggay nin kani Murdikay. Sekanin bun i sinaligan nu Puteli Istir kanu langun nu kaaden ni Haman.3 Na nangadap menem 'bpaluman su Puteli Istir kanu Sultan Ahasirus. Sinemugiud sekanin a 'bpaguguliang kanu adapan nin ka napakalimu-limu sa lekanin sa matebped su mawag a kahanda ni Haman a taw a Agag kanu manga taw a Yahudi. 4 Na tinendu mambu nu sultan kanu bulawan a tungked'in si Istir. Na daka midtindeg mambu si Istir ka nia nin pidtalu kanu sultan na 5 “Amaika miug su sultan enggu 'gkasuatan aku nin taman sa wagib sa lekanin su nia na 'bpangenin ku lun i mumbal sa kasuguan a makatebped kanu inumbal'i Haman a taw a Agag a wata ni Hamidata a kasuguan a su kaimatay kanu langun nu taw a Yahudi sia kanu langun nu 'gkasakupan nu sultan. 6 Ka dili ku man magaga edtulik i kaibped matay nu manga pagidsan ku sa tribu.”
7 Na nia pidtalu nu Sultan Ahasirus kanu Puteli Istir enggu kani Murdikay a taw a Yahudi na “Sabap kanu mawag a entu a kahanda ni Haman kanu manga taw a Yahudi na pinaimatayan ku sekanin enggu inenggay ku den kani Puteli Istir su langun nu kaaden ni Haman. 8 Tembu saguna na umbal kanu sa kasuguan sia kanu ingala nu sultan a nia nu lun idalem na u ngin i kapegkailay nu a makagkapia kanu manga taw a Yahudi, entu pan ka tiapi nu kanu sising ku. Ka apia ngin i nakasulat a natiapan kanu sising'u sultan na dili mapakay a masalin.”
9 Na kanu ikaduapulu enggu telu gay kanu ikatelu a ulan-ulan kanu lagun a su ulan-ulan nu Siban na inipatawag su langun nu pasusulat'u sultan ka inipasulat kanilan su ngin i edtalun ni Murdikay makapantag kanu manga taw a Yahudi. Na lu i entu pakatumpa kanu manga taw a Yahudi, kanu manga gubilnadul enggu kanu 'gkangasaligan nu sultan kanu magatus enggu duapulu enggu pitu a prubinsia a pendatuan nin iganat sa dalepa a India taman sa dalepa a Itupia. Na inisulat su entu sia luyud kanu basa enggu ukit'a kapedsulat'u uman i bangsa apeg den nu manga taw a Yahudi kanu langun nu prubinsia. 10 Na inipasulat'i Murdikay su entu sia kanu ingala nu sultan, entu pan ka tiniapan kanu sising a 'bpaniap'u sultan ka ipasigkil su entu kanu manga taw a 'bpamanigkil sa sulat a migkukuda sa kuda a nia nin sempu na ebpun kanu kuda nu sultan a manga malengkas i kapalalaguy nin. 11 Nia nakadalem sa kanu entu ba a sulat na sinugutan den nu Sultan Ahasirus i makandidilimudan su langun nu manga taw a Yahudi enggu makapaninindeg'ilan su ginawa nilan sa ukit a kaimatay nilan atawa ka kabinasa nilan kanu apia entain a lemusud kanilan apia manga wata enggu babay a ebpun kanu manga prubinsia atawa ka bangsa. Na sinugutan bun silan sa kakua nilan kanu langun nu kaaden nu manga taw a katabanan nilan kanu entu a gay. 12 Na su entu ba a gay na kanu ikasapulu enggu telu gay a ikasapulu enggu dua a ulan-ulan nu lagun a bedtuan sa Adar. 13 Na unan nu entu ba a gay na nakalapat den su entu a kasuguan kanu langun nu prubinsia a 'gkasakupan nu sultan taman den kanu langun nu manga taw ka nasisita i katuntayan nu manga taw a Yahudi su entu ka enggu silan makapagadil kanu kapaninindeg'ilan kanu ginawa nilan sa kanu gay a kapembunu kanilan. 14 Tembu su manga panunugun a 'bpamanigkil sa sulat na namagayas silan 'gkukuda kanu manga malengkas a entu a kuda ka inipanigkil'ilan su entu ba a kasuguan a mana bun su inisugu nu sultan kanilan. Na inipayapat bun su entu a kasuguan kanu lusud'u siudad a Susa.
15 Na saleta mambu na kanu kinaliu ni Murdikay kanu kinapangadap'in kanu sultan na nakasangan nin den su lambung'u sultan a nia nin suga na maputi enggu bilu a ebpun sa mapia a ginis a nakadsansangan sekanin sa bulawan enggu aden mapia a ginis a nia nin suga na lambayung a inibetad sia kanu taligkudan nin. Na su manga taw mambu sa siudad a Susa na 'bpamelalis sa kapegkapia na ginawa nilan. 16 Na sangat a nangapia i ginawa nu manga taw a Yahudi lu enggu nia nilan 'gkanggiginawa na kabadtugan nilan su entu enggu nakasengaw den i manggiginawa nilan. 17 Na sangat a nangapia bun i ginawa nu manga taw a Yahudi a pegkaleben kanu uman i prubinsia enggu siudad a nauma nu entu a kasuguan nu sultan taman sa midsela-sela silan enggu dala minggalebek sa kanilan. Na madakel i minunut kanu agama nu Yahudi kanu entu a dalepa sabap kanu gilek'ilan kanu manga taw a Yahudi.