Su Kinapanaban nu manga Taw a Yahudi
9
Na kanu ikasapulu enggu telu gay kanu ikasapulu enggu dua a ulan-ulan a su ulan-ulan a Adar na nia den ba su gay a kapenggulalan kanu kasuguan nu sultan. Na kanu entu ba a gay na nia 'gkatagu sa ginawa nu manga kuntela nu manga taw a Yahudi na tabanan nilan silan ugaid'a nakadsaliu su nanggula ka silan i tinabanan. 2 Mindidilimudan su langun nu manga taw a Yahudi kanu uman i siudad kanu langun nu prubinsia a pendatuan nu Sultan Ahasirus ka enggu nilan kaatuan i apia entain i lemusud kanilan sa kapamungkaid. Na apia sakataw na dala pakagaga kanilan 'bpagatu sabap sa gilek'ilan kanu manga taw a Yahudi. 3 Na su langun nu 'gkangaunutan nu manga prubinsia enggu su 'gkangasaligan taman den kanu manga gubilnadul, apeg den nu 'gkangasaligan kanu tulugan nu sultan na midtabang kanilan kagina 'gkagilekan silan kani Murdikay. 4 Kagina si Murdikay na nasanganan den sekanin sa masela a kapegkagaga kanu tulugan nu sultan enggu 'gkabadtug den su entu kanu langun nu pendatuan nu sultan taman sa 'bpangiseg bun su kabagel'u kapegkagaga nin.5 Na kanu entu ba a gay na pinangimatayan nu manga taw a Yahudi kanu manga sundang'ilan su manga kuntela nilan a 'gkangabensi kanilan sa apia ngin a ukit a pakasuat kanu ginawa nilan. 6 Na lu bu kanu lusud'u Susa na lima gatus kataw den a manga mama i minatay nilan. 7 Na pinangimatayan nilan bun si Parsandata, si Dalpun, si Aspata, 8 si Purata, si Adalia, si Aridata, 9 si Parmasta, si Arisay, si Ariday enggu si Baisata. 10 Na silan ba a nia su sapulu kataw a wata a mama ni Haman a kuntela nu manga taw a Yahudi a wata ni Hamidata. Ugaid'a dala panguaya nu manga taw a Yahudi su kaaden nu manga kuntela nilan a entu.
11 Na kanu entu bun ba a gay na nakauma sa pakinegan nu sultan su kadakel'u minatay kanu lusud'u Susa. 12 Na nia pidtalu nu sultan kanu Puteli Istir na “Lima gatus kataw i minatay nu manga taw a Yahudi sia sa lusud'u Susa, liu pan su sapulu kataw a wata a mama ni Haman. Na dili ta pan katawan u ngin i nanganggula kanu manga ped a prubinsia. Na aden pamun 'gkalinian nengka 'bpangeni sa laki? Ka inggay ku bun sa leka.” 13 Na nia inisumpat'i Istir na “Hu sultan, amaika makasuat pamun sa leka na suguti ka pamun su manga taw a Yahudi kanu lusud'u Susa sa kapaninindeg'ilan kanu ginawa nilan namag a entu a mana bun su inisugu nengka. Na suguti ka bun sa ibitin kanu kayu su bangkay nu sapulu kataw a wata a mama ni Haman.” 14 Daka inisugu nu sultan i kanggulalan kanu pinangeni a entu ni Puteli Istir. Na guna su maitu na inipasampay su entu a kasuguan kanu lusud'u Susa taman sa inipabitin kanu kayu su sapulu kataw a bangkay nu manga wata a mama ni Haman. 15 Na kanu temundug a gay kanu ikasapulu enggu pat gay kanu ulan-ulan nu Adar na mindidilimudan menem su manga taw a Yahudi kanu lusud'u Susa, na nia menem kadakel'u minatay nilan na telu gatus kataw a manga mama. Ugaid'a dala nilan bun panguaya su manga kaaden nu manga kuntela nilan a entu.
16-17 Na saleta mambu na kanu entu ba a gay a ikasapulu enggu telu gay kanu ulan-ulan nu Adar na su manga taw a Yahudi kanu manga prubinsia na mindidilimudan bun silan ka inipaninindeg'ilan bun i ginawa nilan kanu manga kuntela nilan. Na tinabanan nilan su manga kuntela nilan taman sa nakasaut sa pitupulu enggu lima ngibu i minatay nilan kanu entu bu ba a gay. Ugaid'a dala nilan panguaya su manga kaaden nu kuntela nilan a entu. Na kanu temundug a gay kanu ikasapulu enggu pat gay kanu ulan-ulan nu Adar na nangintelenen silan enggu midsela-sela silan a 'gkangapia a benal i ginawa nilan.
18 Na su manga taw a Yahudi kanu lusud'u Susa na kanu ikasapulu enggu lima gay pan kanu entu bun ba a ulan-ulan i kinapangintelenen nilan enggu kinadsela-sela nilan ulian nu kinapangimatay nilan kanu manga kuntela nilan kanu naipus a nakadua gay. 19 Na nia ba i sabap'in i su manga taw a Yahudi kanu embala-bala a prubinsia na inisenggay nilan den su ikasapulu enggu pat gay kanu ulan-ulan nu Adar sa kadsela-sela nilan enggu kabpamagenggaya nilan sa makan.
20 Na inisulat'i Murdikay su langun nu entu a nanganggula ka inilapat'in kanu manga taw a Yahudi kanu embala-bala a prubinsia a nasakupan nu Sultan Ahasirus magidsan pan i mawatan enggu masiken. 21-22 Na nia nakadalem kanu sulat a entu na “Uman ikasapulu enggu pat gay enggu ikasapulu enggu lima gay kanu ulan-ulan nu Adar a su manga gay a kinapanaban tanu kanu manga kuntela tanu taman sa nakapangintelenen tanu na dait a isenggay tanu enggu idsela-sela tanu su entu ba a ulan-ulan, na su lidu nu ginawa tanu na nasambian na kapia na ginawa enggu su kinagagaw sa lekitanu na nasambian na kapedsela-sela. Nia ba su manga gay a kanggalaw-galaw tanu enggu kapamagenggaya tanu sa makan enggu kadtabang tanu kanu manga miskinan.”
23 Daka pinaginugutan mambu nu manga taw a Yahudi su inisugu a entu ni Murdikay taman sa initalus'ilan enggulalan su entu uman lagun.
Su Sabapan a Kapedsela-sela kanu manga Gay a Bedtuan sa Purim
24 Na kanu kinagkahanda ni Haman a wata ni Hamidata a taw a Agag a kuntela nu manga taw a Yahudi sa kaimatay nin kanu langun nu manga taw a Yahudi na nia nin inusal sa kataw nin sa kanu i kanggula nin sa entu na sa ukit'a kinambunuta a bedtuan sa Pur. 25 Ugaid'a nangadap su Puteli Istir kanu sultan tembu napaumbal su sultan sa kasuguan sa su mawag a entu a kahanda ni Haman na entu ba i pakaidan sa lekanin. Tembu si Haman enggu su manga wata nin a mama na inipabitin nin lu kanu kayu. 26 Na entu bun ba i sabapan a kinabedtu kanu entu ba a manga gay sa Purim a ebpun kanu kadtalu a Pur. Na sabap kanu sulat'i Murdikay a entu enggu su napagukit-ukitan nilan 27 na napamagayunan nu manga taw a Yahudi su kadsela-sela nilan kanu dua gay a entu a inisenggay uman lagun. Na inggulalan i entu nu langun nu muliataw nilan taman den kanu apia entain i munut kanu agama nu Yahudi a mana bun su inisugu kanilan. 28 Na kanu uman i prubinsia enggu siudad na idsela-sela nilan su entu ba a manga gay taman den kanu manga muliataw nilan. Na su nia ba a gay a bedtuan sa Purim na dili lipatanan enggu dili telenan sa kanggulalan lun taman den kanu manga temundug pan a muliataw nilan.
29 Na saleta mambu na sinemulat pamun si Puteli Istir a wata ni Abihail makapantag kanu entu ba a manga gay a bedtuan sa Purim kaped'i Murdikay ka enggu 'gkailutan pamun su makapantag kanu entu ba. 30 Na inipayapat su entu kanu manga taw a Yahudi kanu magatus enggu duapulu enggu pitu kaprubinsia kanu pendatuan nu Sultan Ahasirus. Su nia ba a sulat na nakadtatanggit sa kalilintad kanu manga taw a Yahudi enggu makatabang i entu kanilan 31 a minilut sa kanu kasuguan sa kanggulalan nilan kanu kadsela-sela kanu manga gay a bedtuan sa Purim uman mauma su timpu nin. Na inggulalan nilan su entu sia luyud kanu ngin i inisugu ni Murdikay enggu Puteli Istir a mana bun su kapenggulalan kanu kasuguan a dili kapegkan enggu kabpaginem sabap kanu kapegkalidu na ginawa. 32 Na su kasuguan a entu a inumbal'u Puteli Istir i minilut kanu kanggulalan kanu manga gay a bedtuan sa Purim na iniamung i entu semulat kanu 'bpanulatan kanu manga atulan.