Su Kapianan nu Kadenan
Su Sengal sa kapugi a inisulat'u Daud.
145
Hu Kadenan a Datu ku, pebpugin ku seka,pugin ku su ingala nengka taman sa taman.
2 Uman-uman gay na pebpugin ku seka,
pebpugin ku su ingala nengka taman sa taman.
3 Hu Kadenan a Mapulu, sangat i kabarakat'engka enggu sangat a pebpugin ka,
su kabarakat'engka na di matengkad.
4 Na apu mangapu na manudtul pantag kanu kabarakatan a pinggula nengka;
ipayag'ilan kanu manga muliataw nilan su sangat a makagaip a manga pinggalebek'engka.
5 Na 'bpamikilen ku su dala idsan nin a kabadtugan nengka
enggu su makagaip a manga galebek'engka.
6 Ipayag su kabarakat'engka enggu su manga makagaip a pinggula nengka,
ipayag ku su kapegkagaga nengka.
7 Idsela-sela nu taw su sangat a kapianan nengka
enggu idsengal'ilan sa matanug su katidtu nengka.
8 Hu Kadenan a Mapulu, malimu ka enggu aden lat a nanam'engka kanu taw;
di ka malemu malipunget enggu su sangat a kakalimu nengka na di embagu.
9 Hu Kadenan a Mapulu, sangat i kapia nengka kanu langun nu taw;
su lat a nanam'engka na kanu langun nu inaden nengka.
10 Hu Kadenan a Mapulu, su langun nu inaden nengka na edsukul-sukul sa leka
enggu su langun nu taw nengka a matidtu na mugi sa leka.
11 Imbabadtug'ilan su kabadtugan nengka sia kanu kapendatu nengka
enggu su kapegkagaga nengka
12 asal'a katawan nu langun nu taw su makagaip a pinggula nengka
enggu su kabadtugan nengka kanu kapendatu nengka.
13 Su kapendatu nengka na dala kapedtaman nin;
su kapendatu nengka kanu langun nu taw na taman den kanu manga temundug pan a muliataw.
Hu Kadenan a Mapulu, kasaligan su langun nu kadtalu nengka;
su langun nu penggulan nengka na penggulan nengka sa aden kakalimu nin.
14 Hu Kadenan a Mapulu, papembangunen nengka su entain i pakagebpa;
papembetelen nengka su entain i 'gkabekut den sa kapegkapasang lun.
15 Na su langun nu inaden nengka na 'bpagingapa sa leka
sa kaenggay nengka kanilan sa makan sia kanu timpu a nasisita nilan.
16 Ipembelat'engka su lima nengka ka ibpagenggay nengka su langun na nasisita nilan taman sa sangat a pakasukul kanilan su entu.
17 Hu Kadenan a Mapulu, matidtu ka kanu langun na ukit'engka;
su langun na penggulan nengka na penggulan nengka sa aden kakalimu nin.
18 Hu Kadenan a Mapulu, masupeg ka kanu langun nu pedtawag sa leka,
masupeg ka kanu langun nu pedtawag sa leka sa senep sa atay.
19 Pedtumanen nengka su 'gkagkahanda nu langun nu aden gilek'in sa leka;
'bpakikinegen nengka su kabpaguguliang'ilan 'bpangeni sa leka sa tabang taman sa ibpelipuas'engka silan.
20 Hu Kadenan a Mapulu, pedtiakapan nengka su langun nu malimu sa leka
ugaid'a pembinasan nengka su langun nu taw a dupang.
21 Su ngali ku na mugi sa leka a Kadenan a Mapulu.
Su langun nu balangiawa na mugi kanu suti a ingala nengka taman sa taman.