Su Pangeni-ngeni kanu Kalipuas'u Inged
Sengal a inisulat'u Daud.
144
Pugin su Kadenan a Mapulu a mana masela a watu a pegkelung sa lakia pembibit kanu manga lima ku enggu kanu manga kemel ku sa kambunua.
2 Sangat i kakalimu nin sa laki enggu sekanin i mana kuta ku,
sekanin i kelung ku a 'bpagenan ku enggu 'bpelipuas sa laki,
ipapedtalaw nin sa laki su manga bangsa taman sa ipapedsakup'in sa laki.
3 Hu Kadenan a Mapulu, entain ba man su manusia a pedtiakapan nengka pan?
Entain ba man silan a 'bpagitungen nengka pan?
4 Mana bu silan sengaw na napas,
su manga gay nilan sa dunia na mana bu alung-alung a pedsagad.
5 Hu Kadenan a Mapulu, ukai ka su sulega ka pangalimbaba ka sia,
dapeneti ka su manga palaw ka enggu pedtagebel.
6 Patalas ka su kilat ka enggu mamakadtagayak su manga kuntela ku.
Ibusug'engka su busug'engka ka enggu silan mamakapalalaguy.
7 Iganat san sa sulega na ikawa nengka su lima nengka
ka ilipuas aku nengka kanu kapegkagaga nu manga kuntela ku a lapu a ebpun kanu ped a manga bangsa
a mana su mabagel a leges'u ig.
8 Na su ngali nilan na napenu na kabudtud,
su kapegkayang'ilan kanu kawanan a lima nilan sa kapedsapa nilan na kabudtud bun i pedtalun nilan.
9 Hu Kadenan, edsengalan ku seka sa bagu a sengal
enggu mapauni aku sa palabuni-bunian a alpa a aden sapulu a iket'in.
10 Seka a Kadenan i pebpanaban kanu manga datu
enggu 'bpelipuas kanu panunugun nengka a nia a si Daud.
11 Ilipuas aku kanu sundang'u manga dupang,
ilipuas aku nengka kanu lima nu manga lapu
a su ngali nilan na napenu na kabudtud.
Na su kapegkayang'ilan kanu kawanan a lima nilan sa kapedsapa na kabudtud bun i pedtalun nilan.
12 Pangeni-ngenin ku i su manga wata nami a mama
na makailing silan kanu pamumulan a mabagel i kapangengetu nin,
su manga wata nami menem a babay na makailing silan kanu manga palaus'u tulugan
a pibpandayan sa mapia.
13 Pangeni-ngenin ku i su manga kamalig'ami na mapenu
na embalang-balang a kauyagan;
su manga bili-bili nami na mangiseg i kagkadakel'in taman sa makauma sa puluan ngibu
a lu kanu manga maliwanag'ami.
14 Pangeni-ngenin ku i su manga sapi nami na embabata sa madakel.
Dala kuntela nami a lemusud kanu alad'ami ka enggu dala mabiag
taman sa dala makalalis sa lidu na ginawa sia kanu manga lalan.
15 Na mapia den a benal kanu taw a kapalihalan sa maitu ba a katamanan.
Mapia den a benal kanu taw u nia nin Kadenan na su Kadenan a Mapulu.