Su Pangeni-ngeni sa Kalipuas kanu manga Kuntela
Su nia a Sengal na inisulat'u Daud.
143
Hu Kadenan a Mapulu, pakikineg ka su pangeni-ngeni ku.Sia luyud kanu katidtu enggu kaikelas'engka
na pakikineg ka su kabpaguguliang ku 'bpangeni sa leka sa tabang.
2 Di ka pedsugat sa kawagib su panunugun nengka a nia
ka apia man sakataw na dala matidtu kanu adapan nengka.
3 Su manga kuntela ku na pinaneled aku nilan taman sa tinalaw aku nilan.
Sia aku nilan inibetad kanu kalibutengan a mana aku minatay sa nauget den a gay.
4 Tembu naawan aku den na inam,
sangat den a nalidu i ginawa ku.
5 'Gkagkalendem ku su nanganggula kanu sinemagad a manga timpu.
'Bpamikilen ku su langun nu mangapia a pinggalebek'engka enggu su manga kagaipan a pinggula nengka.
6 Ipebpulu ku su lima ku sia kanu kabpangeni-ngeni ku.
'Gkapangingalap ku a benal seka a mana su lupa a sangat a pakanasisita sa ulan.
7 Hu Kadenan a Mapulu, sawal ka mangagan su pangeni-ngeni ku
ka 'gkaawan aku den na inam.
Di aku nengka pedtaligkudani
ka makailing aku kanu manga taw a lu den kanu ludep'u pakubulan.
8 Uman mapita na ipagkalendem'engka sa laki
su sangat a kakalimu nengka
ka pedsalig aku man sa leka.
Tutulu aku nengka kanu lalan a dait a ukitan ku
ka san aku man 'bpangeni-ngeni sa leka.
9 Hu Kadenan a Mapulu, ilipuas aku kanu manga kuntela ku
ka san aku papegkelung sa leka.
10 Pamandu aku sa kanggula ku kanu kahanda nengka
kagina seka man i Kadenan ku.
Isugut'engka a agaken aku nu sangat i kapia nin a Ruh nengka
kanu lalan a di aku kagkaidan.
11 Hu Kadenan a Mapulu, ilipuas aku nengka ka enggu ku mapugi su ingala nengka.
Sia luyud kanu katidtu nengka na ilipuas aku kanu kasimuketan.
12 Sia luyud kanu sangat a kakalimu nengka na binasa ka su langun na kuntela ku kagina saki na panunugun nengka.