Su Pangeni-ngeni sa Kalipuas sia kanu 'Bpamungkaid
Su pangeni-ngeni nu Daud kanu sia sekanin kanu takub.
142
Hu Kadenan a Mapulu, 'bpaguguliang aku pedtawag sa leka sa tabang,sia makanggulalan kanu suala ku na 'bpangeni aku sa leka sa tabang.
2 Ipendedsa ku sa leka su langun na lidu na ginawa ku
enggu su kasimuketan nu ginawa ku.
3 Na amaika 'gkaawan aku den na inam
na pedtutulun aku nengka u ngin i 'bpagukitan ku.
Na sia kanu lalan a 'bpagukitan ku
na tinanan aku sa padulat'u manga kuntela ku.
4 Na nangingilay aku kanu embala-bala ku
na apia sakataw na dala demun pegkenu sa laki;
dala demun pegkelung sa laki;
dala demun pedtiakap kanu ngin i 'gkanggula ku.
5 Hu Kadenan a Mapulu, 'bpaguguliang aku pedtawag sa leka,
nia ku pedtalun na “Seka i kelung ku,
seka bu i nasisita ku sia sa dunia taman sa bibiag aku pan.”
6 Pakikineg ka pan su kabpaguguliang ku 'bpangeni sa leka sa tabang
kagina sangat a pegkalubay aku den.
Ilipuas aku nengka kanu manga 'bpamungkaid sa laki
kagina sangat i kabagel'ilan kumin sa laki.
7 Iliu aku nengka kanu mana a nia nabilangguan ku
ka enggu aku makadsukul-sukul kanu ingala nengka.
Na su manga taw a matidtu na mamakabalibet sa laki
a pebpugi sabap kanu sangat a kapianan nengka sa laki.