Su Pangeni-ngeni sa Kakelung'u Kadenan
Su nia a Sengal na inisulat'u Daud.
141
Hu Kadenan a Mapulu, pedtawag aku sa leka 'bpangeni sa tabang, pamagayasi aku den 'gkadtag;pakikineg ka su suala ku amaika tawagen ku seka.
2 Talima ka su pangeni-ngeni ku a mana mamut a tutungen sia kanu adapan nengka,
talima aku sia kanu kapegkayang ku kanu lima ku a mana kurban sa leka sa magabi.
3 Hu Kadenan a Mapulu, di ka ipedsugut a makadtalu sa mawag su ngali ku;
tiakapi ka su dila ku sa di nin kadtalu sa kadusan.
4 Di ka ipedsugut a makagkahanda sa mawag su atay ku.
Di aku nengka mapaamung enggula sa mawag kanu manga taw a penggula sa mawag,
di aku nengka papegkan kanu manga alugan nilan.
5 Suguti ka a kasakitan aku nu matidtu a taw sa kapatidtu nin sa laki.
Di ka a benal semuguti a kabubusan sa lana nu daluaka a manga taw su ulu ku
ka lalayun ku man ibpangeni-ngeni i siksan nengka silan sabap kanu mawag a manga galebek'ilan.
6 Na amaika idtug den su 'gkangaunutan nilan lu kanu damawatu a baugan
na katuntayan nilan den ba a entu i su kangadtalu nengka na mapia.
7 Na mana bun su mangasela a watu a nangaupak a namakadsambal kanu lupa
na maitu bun ba i kadsambal'u manga suag'ilan lu kanu manga lebeng.
8 Ugaid'a saki, Hu Kadenan a Mapulu a Kadenan ku,
na pedsupeg aku sa leka 'bpangeni sa tabang sa kelungi aku;
di ka ipedsugut i matay aku nu kuntela ku.
9 Ilipuas aku nengka kanu padulat a initana nilan sa laki
enggu kanu padulat'u daluaka a manga taw.
10 Pangeni-ngenin ku i silan bun i makua nu padulat a initana nilan
enggu saki menem na makalipuas.