Su Pangeni-ngeni pantag sa Kakelung'u Kadenan
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
140
Hu Kadenan a Mapulu, ilipuas aku nengka kanu manga daluaka a taw;dalindingi aku kanu manga taw a mawag i ukit'in.
2 Lalayun silan pegkahanda sa kanggula sa mawag
enggu lalayun nilan ipedsundul su manga taw sa kangalimbul'ilan.
3 Su dila nilan na mana dila na nipay
enggu su ngali nilan na mana bisa na nipay.
4 Hu Kadenan a Mapulu, kelungi aku kanu bagel'u dupang a manga taw;
dalindingi aku kanu manga taw a mawag i ukit'in
a pegkahanda sa kalusak ku.
5 Tinanan aku sa padulat'u manga masandag a taw,
tinanan aku nilan sa puket asal'a mapuket aku,
na sia kanu 'bpagukitan ku na tinanan aku nilan sa padulat asal'a masigkem aku nilan.
6 Hu Kadenan a Mapulu, ipebpayag ku sa leka i “Seka i Kadenan ku,
pakikineg ka su kabpaguguliang ku 'bpangeni sa leka sa tabang.”
7 Hu Kadenan a Mapulu a Kadenan ku a su mabagel a 'bpamelipuas sa laki,
pegkelungan nengka su ulu ku sia kanu timpu na kapembunua.
8 Hu Kadenan a Mapulu, di ka ipedsugut a manggula su kahanda nu manga taw a dupang;
di ka ipedsugut a embantas su manga kahanda nilan a mawag.
9 Di ka ipedsugut a matalaw aku nu manga kuntela ku a nakabalibet sa laki.
Pangeni-ngenin ku i su mawag a kadtalu nilan sa laki na lu muli kanilan!
10 Pangeni-ngenin ku i kadadsangan silan na 'bpangalaw-kalaw a baga na apuy!
Isugut'engka a makaidtug silan kanu madalem a kalut a di den silan mamakaawa lu!
11 Di ka ipedsugut a makadtindeg kanu kalupan su manga taw a edtetebu sa pagidsan nin.
Pangeni-ngenin ku i makatingguma den su kabinasan kanu manga taw a mawag i ukit'in!
12 Hu Kadenan a Mapulu, katawan ku i pedtiakapan nengka sa mapia su kawagib'u manga taw a dala 'gkagaga nin
enggu ipenggulalan nengka su kawagib'u miskinan.
13 Natalatantu a su matidtu a manga taw na pugin nilan su ingala nengka
enggu maguyag-uyag silan sia kanu kaadapan nengka.