Su Kadenan i Pakataw kanu Langun-langun
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
139
Hu Kadenan a Mapulu na nadsima-sima aku nengka man sa mapia enggu katawan aku nengka a benal.2 'Gkatawan nengka u 'bpagagayan aku atawa ka pedtindeg aku;
'gkatawan nengka su dalem'u pamikilan ku apia lu ka pan sa mawatan.
3 'Gkailay aku nengka u endaw aku pebpawang atawa ka 'bpangintelenen;
'gkatawan nengka man su langun na penggulan ku.
4 Hu Kadenan a Mapulu, apia di pamun pakaliu kanu ngali ku su pedtalun ku
na 'gkatawan nengka den u ngin i pedtalun ku.
5 Lalayun aku nengka pedtapiden
enggu su lima nengka i pedsapipi sa laki.
6 Su kapegkakilala nengka sa laki na sangat a pakagaip sa laki
enggu di ku magaga temuntay su entu.
7 Di ku man seka kapalalaguyan,
na apia endaw aku pebpawang na lu ka bun ba
8 ka u lemu aku sa sulega na lu ka bun ba;
na amaika lemu aku menem kanu dalepa nu namamatay na lu ka bun.
9 Na apia lemedtu aku paman a mana su papanuk kanu mawatan a dalepa sa sebangan
atawa ka sa sedepan enggu lu aku endalepa kanu tedtaban nu lagat
10 na lu ka bun ba ka pedtutulun aku nengka
enggu su lima nengka na pedsapipin aku nin sa mapia.
11 Mapakay man a mapangeni ku kanu kalibutengan i bausan aku nin
atawa ka mapangeni ku kanu maliwanag kanu embala-bala ku i mapagkalibuteng
12 ugaid'a apia manggula su entu na su kalibutengan na dikena man malibuteng sa leka;
su magabi na maliwanag pan kanu kaliwanag'u malamag sa leka
ka su kalibutengan man enggu su malamag na dala kambidayan nin sa leka.
13 Ka seka man i minaden kanu langun na edsiap-siapan nu badan ku;
sia kanu wawatan nu ina ku na pinagkakapeta nengka su edsiap-siapan nu badan ku.
14 Pugin ku seka, kagina sangat man a mapia enggu makagaip su kinapangaden nengka sa laki.
Sangat a makagaip su langun nu penggulan nengka,
na sangat man a katawan ku a benal su entu.
15 Na kanu timpu na kabpamaluy sa laki kanu wawatan nu ina ku na dala isa bu a pakailay lun
ugaid'a seka na 'gkailay nengka su entu.
16 Nailay aku nengka den man apia dala aku pamun makagemaw.
Nakasulat den man kanu libelu nengka
su langun na manga gay na kapaguyag-uyag ku
unan paman nu dala aku pan mambata.
17 Hu Kadenan, di ku matengkad su kadalem'u itungan nengka!
Sangat man i kadakel'u entu!
18 Na amaika bilangen ku su entu, na minuna pan i kadakel'ilan kanu manga pedtad.
Na sia kanu kapenggedam ku na pedtapiden aku nengka bun.
19 Hu Kadenan, imatayi ka den su manga taw a dupang
enggu itangka aku nengka kanu manga taw a talibunu.
20 Pedtalu silan sa sakutu sa leka
enggu 'bpagusalen nilan su ingala nengka sa dala katagan nin!
21 Hu Kadenan a Mapulu, dait man a kabensian ku su 'gkabensi sa leka.
Dait man a pakabulugan ku su pedsungkang sa leka.
22 Sangat man a 'gkabensian ku silan,
itimbang ku silan a kuntela.
23 Hu Kadenan, edsima-sima aku nengka sa mapia ka enggu nengka katawan su dalem'u pamusungan ku;
batalu aku nengka ka enggu nengka 'gkatawan su dalem'u pamikilan ku.
24 Edsima-sima aku ka ilay ka u aden dikena mapia a ukit ku,
tutulu aku kanu lalan a ibpawang sa leka taman sa taman.