Su Kadsukul-sukul enggu su Kapugi
Sengal'u Daud.
138
Hu Kadenan a Mapulu, edsukul-sukul aku sa leka sa senep kanu atay ku.Hu Kadenan a Mapulu, edsengalan ku seka apia sia kanu kaadapan nu manga pegkakadenanen.
2 Semugiud aku a semangul kanu Suti a 'Bpagagaman sa leka
ka edsukul-sukul aku kanu ingala nengka sabap kanu sangat a kakalimu nengka enggu katidtu nengka;
inipulu nengka man su ingala nengka enggu su kadtalu nengka
sa mapulu pan kanu langun-langun.
3 Na kanu timpu a pedtawag aku sa leka na sinawal aku nengka
taman sa pinagkabagel aku nengka.
4 Hu Kadenan a Mapulu, su langun nu datu sa dunia na mugi sa leka
kagina nakineg'ilan su manga kadtalu nengka.
5 Edsengal silan pantag kanu pinggula nengka a Kadenan a Mapulu
ka sangat man i kabarakat'engka a Kadenan a Mapulu.
6 Hu Kadenan a Mapulu, apia seka man i mapulu sa langun na pedtiakapan nengka su manga taw a da 'gkagaga nin.
Ugaid'a su manga taw menem a masandag na 'gkatawan nengka i penggulan nilan apia matangka pan silan.
7 Na apia sia aku paman 'bpelalakaw kanu luk'u kasimuketan
na pendalindingan aku nengka kanu lipunget'u manga kuntela ku;
sia kanu kapegkagaga nengka na ibpelipuas aku nengka.
8 Hu Kadenan a Mapulu, tumanen nengka man su kahanda nengka sa laki,
su sangat a kakalimu nengka na taman sa taman.
Di ka papedtaday su pinangaden nu manga lima nengka.