Su Kinaunu na Ginawa nilan kanu Kinabinasa kanu Awrusalim
137
Na kanu kabpagagayan nami lu kanu ligid'u lawas'a ig sa Babiluniana nakapaguguliang kami
guna nami magkalendem su Zion.
2 Inisangkat'ami su manga palabuni-bunian nami a kutiapi
lu kanu manga sapak'u kayu.
3 Ka su manga sinemigkem sa lekami
na papedsengalen kami nilan;
su manga 'bpelasay sa lekami na pedsugun kami nilan sa edsengal kami sa makalimpang kanilan sa nia nilan pedtalun na
“Edsengali kami nu kanu isa kanu manga sengal sa Zion!”
4 Ugaid'a panun ba man i kadsengal'ami kanu sengal kanu Kadenan a Mapulu
sia kanu kalupan a nakalapu kami?
5 Hu Awrusalim, amaika kalipatanan ku seka,
na pangeni-ngenin ku i su kawanan na lima ku na kaawan den na bagel!
6 Na su dila ku na demeket den kanu pelak ku
amaika di ku den seka magkalendem
enggu di ku den makatimbang sa san sa leka su sangat a kagalaw ku,
hu Awrusalim.
7 Hu Kadenan a Mapulu, 'gkalendem ka su pinakaidan nu manga taw a Idum
sa kanu gay a kinaagaw nu manga sundalu nu Babilunia kanu Awrusalim
sa nia nilan ibpelalis pedtalu na “Geba nu su nia! Geba nu su nia!
Geba nu taman kanu manga udsadan nin!”
8 Hu sekanu a manga taw sa Babilunia, nanget a mabinasa kanu!
Mapia den a benal kanu manga taw a minasa sa leka a suli
kanu pinakaidan nengka sa lekami!
9 Mapia den a benal kanu manga taw a kemua kanu manga wata nengka
ka itapes'ilan kanu manga watu!