Su Kapianan nu Kasuguan nu Kadenan a Mapulu
119
Mapia den a benal kanu taw u maguyag-uyag sa dala tila ninenggu inggulalan nin su kasuguan nu Kadenan a Mapulu.
2 Mapia den a benal kanu taw u paginugutan nin su atulan nu Kadenan a Mapulu.
Pangilayn nin sa senep sa atay su Kadenan a Mapulu
3 enggu dili enggula sa mawag
ka maguyag-uyag sia luyud kanu kahanda nu Kadenan a Mapulu.
4 Hu Kadenan a Mapulu, inenggay nengka su kasuguan nengka sa lekami
ka enggu nami makanggulalan sa mapia.
5 Nia ba ka makapaguyag-uyag aku
sia luyud kanu pangitaban nengka!
6 Na amaika maitu na di aku makayaya
sa kapaginugut ku kanu manga kasuguan nengka.
7 Pugin ku seka sa senep sa atay
sia kanu kapedtuntay ku kanu wagib a atulan nengka.
8 Paginugutan ku su manga pangitaban nengka,
di aku nengka mapadtaday.
9 Ngin ba i ukit sa mapalalayun nu manguda a taw su kapaguyag-uyag'in sa ikelas?
Na sia makanggulalan kanu kapaginugut'in kanu manga kadtalu nengka.
10 'Bpangilayn ku man seka sa senep sa atay,
di ka pedsuguti sa makasibay aku kanu manga kasuguan nengka.
11 Su kadtalu nengka na ipedtagu ku kanu pamusungan ku
ka enggu aku di makandusa sa leka.
12 Hu Kadenan a Mapulu na pebpugin ku seka.
Pamandu aku nengka kanu manga pangitaban nengka.
13 Ipebpayag'u ngali ku
su langun na atulan nengka a inenggay nengka.
14 Na 'gkalilinian ku a benal su kapenggulalan ku kanu manga atulan nengka,
minuna pan i kalilini ku lun sa kanu langun nu kakawasan.
15 Na 'bpamikilen ku a benal su manga atulan nengka
enggu 'bpagitungen ku a benal su manga ukit'engka.
16 Na 'gkalilinian ku a benal su kapenggulalan ku kanu manga atulan nengka,
su manga kadtalu nengka na di ku a benal kalipatanan.
17 Ipagedam'engka su kapianan nengka kanu panunugun nengka
ka enggu aku makapaguyag-uyag enggu makanggulalan su kadtalu nengka.
18 Ukai ka su mata ku ka enggu ku mailay
su manga makagaip a nakadalem kanu kasuguan nengka.
19 Pendales aku bu sia sa dunia
tembu di ka ibpagena sa laki su maena nu manga kasuguan nengka.
20 Sangat a 'gkapaginagkay a benal'u ginawa ku kanu langun na kutika
su katuntay kanu manga atulan nengka.
21 Pendawayn nengka su manga taw a mapulu i kapegkailay nilan sa ginawa nilan,
pedtiuban nengka su manga taw a pedtaligkud kanu manga kasuguan nengka.
22 Itangka aku nengka kanu kasudi nilan enggu kapapegkaya nilan
kagina 'bpaginugutan ku su manga atulan nengka.
23 Na apia pegkahandan aku pan sa mawag'u manga datu,
na saki a panunugun nengka na papanalusen ku bun mamikil su manga pangitaban nengka.
24 Su manga kasuguan nengka na pakagkagalaw sa laki
enggu pakapangindaw sa laki.
25 Mana su matay aku den
tembu imbalingan nengka pan sa laki su bagel ku sia luyud kanu kadtalu nengka.
26 Na guna ku panudtula sa leka su manga ukit ku na pinakikineg aku nengka,
ipamandu nengka sa laki su manga pangitaban nengka.
27 Na patuntayi ka sa laki su dalem'u manga atulan nengka
ka pamikilen ku su manga makagaip a pinggula nengka.
28 Mana aku 'gkalunguk sabap kanu lidu na ginawa ku,
pagkabagel aku pan sia luyud kanu kadtalu nengka.
29 Itangka aku nengka kanu kapamagakal
enggu sia luyud kanu limu nengka na ipamandu nengka sa laki su kasuguan nengka.
30 Na pinamili ku su lalan a matidtu;
initagu ku kanu atay ku su kapaginugut kanu manga atulan nengka.
31 Hu Kadenan a Mapulu, ipenggulalan ku sa mapia su manga atulan nengka
tembu di ka ipedsugut a makayaya aku.
32 'Bpagapasen ku a benal penggulalan su manga kasuguan nengka
kagina pinagkaulad'engka su katuntay ku.
33 Hu Kadenan a Mapulu, ipamandu nengka sa laki su katuntay kanu manga pangitaban nengka
ka paginugutan ku taman sa kapupusan.
34 Enggi aku nengka sa katuntay ka enggu ku makanggulalan su kasuguan nengka
enggu paginugutan ku sa senep sa atay.
35 Itutulu nengka sa laki su lalan kanu kapaginugut ku kanu manga kasuguan nengka
kagina nia ba i sangat a 'gkalilinian ku.
36 Nia nengka ipamula kanu atay ku na su kakiug sa kapaginugut kanu atulan nengka,
dikena su subela a kakiug sa kuleta.
37 Di ka ipedsugut a mapaginagkay nu ginawa ku su manga dala katagan nin;
nia nengka isugut na makapaguyag-uyag aku sa mauget sia luyud kanu inibpasad'engka.
38 Tuman ka su inibpasad'engka kanu panunugun nengka
a mana su inibpasad'engka kanu entain i magilek sa leka.
39 Itangka aku nengka kanu manga ipegkagilek ku a kayayan
kagina su manga atulan nengka na mapia.
40 Ilay ka, sangat a 'gkalilinian ku penggulalan su manga kasuguan nengka.
Na sabap kanu katidtu nengka na papaguyag-uyag aku sa mauget.
41 Hu Kadenan a Mapulu, isugut'engka a matalima ku su sangat a kakalimu nengka
enggu ilipuas aku nengka sia luyud kanu inibpasad'engka.
42 Ka amaika maitu na aden makasawal ku kanu entain i 'bpagumpak sa laki
kagina pedsaligan ku man su kadtalu nengka.
43 Suguti ka a lalayun ku madtalu su kabantang'engka,
ka nia ku man inam na su manga atulan nengka.
44 Lalayun ku man paginugutan su manga kasuguan nengka
taman sa taman.
45 Maguyag-uyag aku sa aden baya-baya nin
kagina nia ku 'bpaginapasen na su kanggulalan ku kanu manga kasuguan nengka.
46 Ipayag ku su manga atulan nengka sia kanu kaadapan nu manga datu,
na di aku man makayaya sa entu.
47 Sangat a 'gkalilinian ku su kapenggulalan ku kanu manga kasuguan nengka
kagina sangat man a 'gkasuatan ku su manga entu.
48 Na 'bpagadatan ku su manga kasuguan nengka enggu sangat a 'gkasuatan ku su entu;
pebpapamikilen ku sa mapia su manga pangitaban nengka.
49 'Gkakalendem ka su inibpasad'engka kanu panunugun nengka
ka entu ba man i inenggay nengka sa laki a inam ku.
50 Entu ba i pakalimpang sa laki kanu kapegkapasang sa laki.
Entu bun ba i pakaenggay sa laki sa bagel.
51 Na su manga taw a mangasandag na pedsudian aku nilan
ugaid'a di aku bun pedtaligkud kanu kasuguan nengka.
52 Hu Kadenan a Mapulu, uman ku 'gkapamikil su danden a manga atulan nengka
na entu ba i pakalimpang sa laki.
53 Sangat man a 'gkasakit i ginawa ku kanu manga taw a dupang
a pedtaligkud kanu manga kasuguan nengka.
54 Na su manga pangitaban nengka na nabaluy a manga sengal ku
sa apia endaw aku pakagkaleben.
55 Hu Kadenan a Mapulu, sia kanu magabi na pegkakalendemen ku su ingala nengka
enggu 'bpaginugutan ku su manga kasuguan nengka.
56 Na 'gkanggula i nia nu ginawa ku
kagina 'bpaginugutan ku su manga kasuguan nengka.
57 Hu Kadenan a Mapulu, seka bu man i nasisita ku,
ibpasad ku i paginugutan ku su manga kadtalu nengka.
58 Na senep sa atay su kabpangeni ku sa leka sa tabang,
lati aku sa nanam sia luyud kanu inibpasad'engka.
59 Kanu kabpamikil ku kanu manga ukit'u kapaguyag-uyag ku
na nia ku napagitungan na embalingan aku kanu manga atulan nengka.
60 Na dala aku den pagangga
sa kinapaginugut ku kanu manga kasuguan nengka.
61 Na apia mana aku man iniketan nu manga dupang a taw
na di ku bun lipatanan su kasuguan nengka.
62 Apia luk i gay na pembangun aku ka pebpugi aku sa leka
sabap kanu matidtu a manga atulan nengka.
63 Kaped aku nu langun nu magilek sa leka
enggu su 'bpaginugut kanu manga kasuguan nengka.
64 Hu Kadenan a Mapulu, 'bpamelapay man kanu dunia su sangat a kakalimu nengka,
ipamandu nengka sa laki su manga atulan nengka.
65 Hu Kadenan a Mapulu, na sangat man i kapia nin su pinakaidan nengka kanu panunugun nengka
sia luyud kanu inibpasad'engka.
66 Ipamandu nengka sa laki su mapia a kapamikil enggu su mapia a katuntay
kagina pedsaligan ku man su manga kasuguan nengka.
67 Na kanu dala aku nengka pan masiksa sa kinapatidtu nengka sa laki na nakasibay aku man sa leka
ugaid'a saguna na 'bpaginugutan ku den su kadtalu nengka.
68 Na sangat man i kapia nengka enggu mapia a benal su manga penggulan nengka,
na ipamandu nengka sa laki su manga pangitaban nengka.
69 Na su 'bpemamasela a taw na pedtalu sa kabudtud pantag sa laki
ugaid'a apia ka maitu na senep bun sa atay su kabpaginugut ku kanu manga atulan nengka.
70 Na su pamusungan nu entu a manga taw na naawan den na katuntay
ugaid'a saki na 'gkalilinian ku su kasuguan nengka.
71 Nakagkapia sa laki su kinasiksa nengka sa kinapatidtu nengka sa laki
ka natuntayan ku su manga pangitaban nengka.
72 Su kasuguan nengka na sangat i kabalapantag'in sa laki
ka minuna pan i kabalapantag'in sa ngibu-ngibuan i kadakel'in a bulawan enggu pilak.
73 Seka i minaden enggu linemimbag sa laki
tembu enggi aku nengka sa katuntay ka enggu ku katuntayan su manga kasuguan nengka.
74 Na su magilek sa leka na edsisigalaw silan amaika mailay aku nilan
kagina aden inam ku kanu manga inibpasad'engka.
75 Hu Kadenan a Mapulu, katawan ku man i su kukuman nengka na wagib,
na sia kanu katidtu nengka na siniksa aku nengka sa kinapatidtu nengka sa laki.
76 Isugut'engka a malimpang aku nu sangat a kakalimu nengka
sia luyud kanu inibpasad'engka kanu panunugun nengka.
77 Lati aku nengka sa nanam ka enggu aku makapaguyag-uyag
ka su kasuguan nengka man i pakagkagalaw sa laki.
78 Isugut'engka a makayaya su manga masandag a taw
sabap kanu kapendalat'ilan sa laki
ugaid'a saki na pamikilen ku su manga kasuguan nengka.
79 Isugut'engka a embalingan sa laki su apia entain a magilek sa leka
ka enggu nilan katawan su manga atulan nengka.
80 Pangeni-ngenin ku i kapaginugutan ku su manga pangitaban nengka sa dala kulang'in
ka enggu aku di makayaya.
81 'Gkalugat aku den sa kabpagingapa ku kanu kalipuas'engka sa laki
ugaid'a su kadtalu nengka i inam ku.
82 Su mata ku na pegkalebug den i kapegkailay nin sa kabpagingapa nin kanu inibpasad'engka,
na nia ku pakaidsa na “Kanu pan basi i kalimpang'engka sa laki?”
83 Ka mana aku den man labing a upis'a binatang a 'bpanaguan sa ig a da den katagan nin
ugaid'a apia ka maitu na di ku bun 'gkalipatanan su manga pangitaban nengka.
84 Ngin guna i kauget'a katigkel'u panunugun nengka?
Kanu pan guna i kasiksa nengka kanu manga 'bpamungkaid sa laki?
85 Na su manga masandag a taw a di 'bpaginugut kanu kasuguan nengka
na kinemalut silan sa madalem a padulat a kaulugan ku.
86 Su langun man na kasuguan nengka na kasaligan,
na 'bpangenin ku i tabangi aku pan kanu kabpamungkaid'ilan sa laki sa dala sabap'in.
87 Na paidusama nilan man matebped su umul ku sia sa dunia
ugaid'a apia ka maitu na di ku bun 'bpelipatanan su manga kasuguan nengka.
88 Sia luyud kanu sangat a kakalimu nengka na papanalus ka su kabpaguyag-uyag ku
ka enggu ku makanggulalan su atulan nengka.
89 Hu Kadenan a Mapulu, su kadtalu nengka na taman sa taman;
su kadtalu nengka na dala man kapegkadala nin lu sa sulega.
90 Su katidtu nengka na taman pan kanu langun nu mamakatundug a manga muliataw.
Pinangaden nengka sa mabagel su dunia tembu mapalalayun su entu.
91 Sia makanggulalan kanu kasuguan nengka
na 'bpananalusan su langun-langun,
ka langun man nu entu na 'bpaginugut sa leka.
92 Na amaika su kasuguan nengka ka dala bu makasuat sa laki
na nadala aku den sabap kanu mapait a natala ku.
93 Di ku man a benal kalipatanan su manga kasuguan nengka
kagina sabap kanu manga kasuguan nengka na pegkalendu su umul ku.
94 Na lusud aku man sa leka, ilipuas aku nengka pan
kagina 'bpaginapasen ku penggulalan su manga kasuguan nengka.
95 Su manga dupang a taw na nia nilan bu 'bpagingapan na timpu na kaimatay nilan sa laki
ugaid'a su manga atulan nengka i 'bpamikilen ku.
96 Apia man su langun nu nadtalu a dala kulang'in na aden bun edtamanan nin
ugaid'a su manga kasuguan nengka na dala kapedtaman nin.
97 Na 'gkalilinian ku man a benal su manga kasuguan nengka!
Lalayun ku 'bpamikilen su entu kanu kagagabian.
98 Su kasuguan nengka na pakapambalaitungan sa laki kumin kanu manga kuntela ku
kagina lalayun i entu sia kanu pamusungan ku.
99 Saki pan i madakel i natuntayan nin kumin kanu manga gulu ku
kagina su manga atulan nengka i lalayun ku 'bpamikilen.
100 Labi pan i kadakel a natuntayan ku kumin kanu manga kalukesan
kagina 'bpaginugutan ku su manga kasuguan nengka.
101 Pedsanggilan ku su langun nu dikena mapia a manga ukit
ka enggu ku kapaginugutan su manga kadtalu nengka.
102 Da ku man taligkudani su manga kasuguan nengka
kagina seka man i namandu sa laki.
103 Ngin den i kamis'u kangadtalu nengka sia kanu dila ku,
mamis pan kumin kanu teneb!
104 Su manga kasuguan nengka na pakapagkaulad kanu katuntay ku
tembu di ku a benal 'gkalilinian su langun na galebek a mawag.
105 Su kadtalu nengka na mana palitan
a pakatayaw kanu 'bpagukitan ku.
106 Na midsapa aku enggu inilutan ku pan 'bpasad su entu
sa paginugutan ku su manga matidtu a kasuguan nengka.
107 Hu Kadenan a Mapulu, sangat den i kapegkalasay ku,
pagkalendu ka pan su umul ku sia luyud kanu inibpasad'engka.
108 Hu Kadenan a Mapulu, talima ka pan su mana kurban a kapebpugi ku sa leka,
ipamandu nengka pan sa laki su manga atulan nengka.
109 Na apia tatap 'gkapaidusaman su umul ku
na di ku bun 'bpelipatanan su manga kasuguan nengka.
110 Su dupang a manga taw na 'bpelitagan aku nilan
ugaid'a di aku bun pebpitas kanu manga kasuguan nengka.
111 Su manga atulan nengka i mabpusaka ku taman sa taman
ka pakagalaw man su entu kanu pamusungan ku.
112 Nia kahanda nu ginawa ku na su kanggulalan kanu manga pangitaban nengka
taman sa taman.
113 Di ku 'gkalilinian su taw a pendua-dua i itungan nin sa kapaginugut'in sa leka
ugaid'a su manga kasuguan nengka na 'gkalilinian ku a benal.
114 Seka i dalinding ku enggu seka i kelung ku;
su kadtalu nengka i inam ku.
115 Na sekanu a manga dupang a taw na tangkai aku nu
ka enggu ku kapaginugutan su manga kasuguan nu Kadenan ku.
116 Tiakapi aku sia luyud kanu inibpasad'engka ka enggu aku makapaguyag-uyag
enggu di ka ipedsugut a makagkaya aku sia kanu inam ku sa leka.
117 Tabangi aku nengka pan asal'a malipuas aku
ka enggu ku lalayun mapamikil su manga pangitaban nengka.
118 Inikias'engka su langun nu tinemaligkud kanu manga pangitaban nengka
ka su kabpamagakal'ilan man na dala bun katagan nin.
119 Na su langun na dupang a taw kanu lusud'u dunia na initimbang'engka silan sa mana manga puput
tembu su manga kasuguan nengka na 'gkalilinian ku a benal.
120 Na pegkegkel aku na gilek sa leka
ka ipegkagilek ku su manga kukuman nengka.
121 Pinggula ku den su ngin i matidtu enggu wagib
tembu di aku nengka papedtaday kanu manga taw a 'bpagumis sa laki.
122 'Bpangenin ku i ibpasad'engka i palihalan aku nengka a panunugun nengka,
di ka ipedsugut a umisen aku nu di 'bpamaginugut sa leka.
123 Su mata ku na pegkalebug den i kapegkailay nin sa kabpagingapa nin kanu kabpelipuas'engka
enggu su katuman kanu matidtu a pasad'engka.
124 Enggula ka sa laki a panunugun nengka su ngin i dait sia luyud kanu sangat a kakalimu nengka;
ipamandu nengka sa laki su manga pangitaban nengka.
125 Saki a panunugun nengka na enggi aku pan sa katuntay
ka enggu ku kasabutan su manga atulan nengka.
126 Hu Kadenan a Mapulu, nia ba i kutika a kadtabed'engka
ka su kasuguan nengka na pedsungkangen nu manga taw.
127 Saben-sabenal a 'gkalilinian ku su manga kasuguan nengka;
minuna pan i kapegkalilini ku lun sa bulawan, apia nia pan bulawan i dala simbul'in.
128 Na saben-sabenal man a 'bpaginugutan ku su langun nu kasuguan nengka
tembu 'gkabensian ku su langun na mawag a galebek.
129 Sangat a makagaip su manga atulan nengka
tembu 'bpaginugutan ku su entu sa senep sa atay.
130 Na su panduan kanu manga kadtalu nengka na pakagkalinawag a mana palitan
enggu pakaenggay sa sabut kanu da pan sabut'in.
131 Na su kapegkiug ku pedtuntay kanu manga kasuguan nengka
na mana su taw a 'gkamalan a pakainem a benal.
132 Pakikineg aku pan, lati aku pan sa nanam
a mana su katatapan a penggulan nengka kanu apia entain a pegkalimu kanu ingala nengka.
133 Tiakapi aku nengka sia luyud kanu inibpasad'engka,
di ka ipedsugut a kandatuan aku nu kabaladusan.
134 Ilipuas aku nengka kanu 'bpangumis a manga taw
ka enggu ku kapaginugutan su manga kasuguan nengka.
135 Ipagedam'engka pan su sigay nengka kanu panunugun nengka
enggu ipamandu nengka sa laki su manga pangitaban nengka.
136 Su lu nu mata ku na mana den ulan a pedtagatak
kagina dili 'bpaginugutan nu manga taw su kasuguan nengka.
137 Hu Kadenan a Mapulu, matidtu ka man;
su kukuman nengka na wagib.
138 Su inenggay nengka a manga atulan na sangat i katidtu nin
enggu sangat a kasaligan.
139 Mana apuy a pakatutung su lipunget ku kanu kuntela ku
kagina dala papedtagan nilan kanu manga kadtalu nengka.
140 Batalu man a kasaligan su pasad'engka
tembu 'gkalilinian nu panunugun nengka su entu.
141 Na apia dikena aku balapantag a taw enggu papegkabulugan aku
na di ku bun 'gkalipatanan su manga kasuguan nengka.
142 Su katidtu nengka na taman sa taman
enggu su kasuguan nengka na bantang.
143 Na uman makatingguma sa laki su kasimuketan enggu su kamalasayan
na su manga kasuguan nengka i pakagkagalaw sa laki.
144 Su manga atulan nengka na wagib taman sa taman,
na enggi aku sa katuntay ka enggu aku makapaguyag-uyag.
145 Hu Kadenan a Mapulu, senep sa atay su kapedtawag ku 'bpangeni sa leka sa tabang.
Sawal aku nengka pan
ka enggu ku kapaginugutan su manga pangitaban nengka.
146 Pedtawag aku 'bpangeni sa leka sa tabang;
ilipuas aku nengka pan
ka enggu ku kapaginugutan su manga atulan nengka.
147 Na 'gkatibuas pan na penggedam aku den ka 'bpangeni aku sa leka sa tabang,
su inam ku na sia kanu manga kadtalu nengka.
148 Na kanu kalalamagan na di aku pedtulug
ka 'gkapamikil ku su manga pasad'engka.
149 Hu Kadenan a Mapulu, pakikineg ka su suala ku sia luyud kanu sangat a kakalimu nengka.
Papanalus ka su kapaguyag-uyag ku sia luyud kanu manga wagib a kukuman nengka.
150 Na pedsupeg-pedsupeg bun su manga dupang a taw a 'bpamungkaid sa laki;
silan su manga taw a matangka kanu kasuguan nengka.
151 Hu Kadenan a Mapulu na apia ka maitu na masupeg ka sa laki
enggu bantang man su langun nu kasuguan nengka.
152 Na nauget ku man natawan i su manga atulan nengka a inaden nengka
na dala kapegkapupus'in.
153 Edsusuliman ka su kamalasayan ku, ka ilipuas aku nengka pan
ka di ku man 'gkalipatanan su kasuguan nengka.
154 Ipaninindeg aku nengka enggu ilipuas aku nengka.
Papanalus ka su uyag-uyag ku sia luyud kanu pasad'engka.
155 Su kalipuasan na mawatan kanu manga dupang a taw
ka di nilan ibpamamantag su manga pangitaban nengka.
156 Hu Kadenan a Mapulu, masela man i lat a nanam'engka kanu manga taw.
Pagkalendu ka pan su umul ku sia luyud kanu kawagib'engka.
157 Madakel i manga kuntela ku a 'bpamungkaid sa laki
ugaid'a apia ka maitu na di ku pedtaligkudanan su manga atulan nengka.
158 Na amaika 'gkailay ku su manga taw a di 'bpaginugut sa leka na 'gkasakit a benal i ginawa ku kanilan
kagina di nilan 'bpaginugutan su manga kasuguan nengka.
159 Hu Kadenan a Mapulu, 'gkalilinian ku man a benal su manga kasuguan nengka.
Pagkalendu ka pan su umul ku sia luyud kanu sangat a kakalimu nengka.
160 Nia a benal unud'u manga kadtalu nengka na kabantang
enggu su langun nu kasuguan nengka na matidtu enggu dala kapegkapupus'in.
161 Na su 'gkangaunutan na 'bpamungkaidan aku nilan sa dala sabap'in
ugaid'a sia kanu manga kadtalu nengka na pegkegkel'a gilek su pamusungan ku.
162 Sangat man a 'gkagalaw aku kanu manga kadtalu nengka
a mana su taw a nakatun sa madakel a kakawasan.
163 Sangat man a 'gkabensian ku su kabudtud
ugaid'a su kasuguan nengka na 'gkalilinian ku.
164 Na uman gay na pakapitu aku pebpugi sa leka
kagina matidtu man su manga kasuguan nengka.
165 Na sangat a makalilintad su apia entain a malilini kanu kasuguan nengka;
dala mamakauma a sabapan nu kagebpa nilan.
166 Hu Kadenan a Mapulu, 'gkapangingalap ku a benal su kabpelipuas'engka sa laki
enggu ipenggulalan ku mambu su manga kasuguan nengka.
167 'Bpaginugutan ku su manga atulan nengka
ka sangat man a 'gkasuatan ku su langun nu entu.
168 'Bpaginugutan ku su manga atulan nengka enggu su manga kasuguan nengka
kagina 'gkailay nengka man su langun nu penggulan ku.
169 Hu Kadenan a Mapulu, pakikineg ka pan su kabpaguguliang ku 'bpangeni sa leka sa tabang;
enggi aku sa katuntay sia luyud kanu kadtalu nengka.
170 Pakikineg ka pan su pangeni-ngeni ku;
ilipuas aku nengka sia luyud kanu inibpasad'engka.
171 Lalayun aku mugi sa leka
sabap sa ibpamandu nengka man sa laki su manga pangitaban nengka.
172 Su ngali ku na edsengal pantag kanu pasad'engka
ka su langun man nu kasuguan nengka na wagib.
173 Adil ka pan su lima nengka sa kadtabang'engka sa laki
kagina nia ku pinamili na su manga kasuguan nengka.
174 Hu Kadenan a Mapulu na 'gkapangingalap ku a benal su kabpelipuas'engka sa laki;
su kasuguan nengka man i pakagkagalaw sa laki.
175 Pagkalendu ka pan su umul ku ka enggu ku seka mapugi;
isugut'engka a kadtabangan aku nu manga atulan nengka.
176 Ka mana aku man nakasibay enggu natadin a bili-bili;
na pangilay ka pan su panunugun nengka
ka di ku man 'gkalipatanan su manga kasuguan nengka.