Su Sengal sa Kinambantas
118
Edsukul-sukul kanu, kanu Kadenan a Mapulu, ka sekanin na sangat i kapia nin;su sangat a kakalimu nin na taman sa taman!
2 Su manga taw a Israil, na dait a ipayag'ilan
i su sangat a kakalimu nu Kadenan a Mapulu na taman sa taman.
3 Su manga muliataw nu Harun na dait a ipayag'ilan
i su sangat a kakalimu nu Kadenan a Mapulu na taman sa taman.
4 Su manga taw a aden gilek'in kanu Kadenan a Mapulu na dait a ipayag'ilan
i su sangat a kakalimu nin na taman sa taman.
5 Sia kanu kamalasayan ku na tinemawag aku kanu Kadenan a Mapulu,
na sinawal aku nin mambu enggu inilipuas aku nin.
6 Pedtapiden aku nu Kadenan a Mapulu tembu di aku 'gkagilekan.
Ngin pan ba i manggula nu manusia sa laki?
7 Su Kadenan a Mapulu na pedtapiden aku nin, sekanin i pedtabang sa laki;
na mailay ku su kataban kanu 'gkangabensi sa laki.
8 Labi i kapia nin su kapalindung kanu Kadenan a Mapulu
kumin kanu kasalig kanu manusia.
9 Labi i kapia nin su kapalindung kanu Kadenan a Mapulu
kumin kanu kasalig kanu manga datu.
10 Su langun na bangsa na nakalibet sa laki
ugaid'a sia kanu ingala nu Kadenan a Mapulu na natalaw ku silan.
11 Nakabalibet silan sa laki sa biwang kawanan, taligkudan kasangulan
ugaid'a sia kanu ingala nu Kadenan a Mapulu na natalaw ku silan.
12 Nabalibet aku nilan a mana manga batiukan
ugaid'a natutung silan semambut a mana su kapegkatutung'u manga teneken a kayu
ka sia kanu ingala nu Kadenan a Mapulu na natalaw ku silan.
13 Na su manga kuntela ku na pinagapas'ilan a benal i kabunu nilan sa laki
ugaid'a su Kadenan a Mapulu i tinemabang sa laki.
14 Su Kadenan a Mapulu i bagel ku enggu sekanin i sabapan a pakadsengal aku,
sekanin i kalipuasan ku.
15 Aden 'gkakineg a magalaw a sengal sa kinapanaban, lu kanu manga balung-balung'u manga taw a matidtu. Na maya ba i pedsengalen nilan
“Su kawanan a lima nu Kadenan a Mapulu na tinalaw nin su manga kuntela ku;
16 su kawanan a lima nu Kadenan a Mapulu na inikayang'in;
su kawanan a lima nin i tinemalaw kanilan.”
17 Na dili aku matay sa pembunuan ka nia pan mula na makapaguyag-uyag aku pamun
ka enggu ku makapayag su manga pinggula nu Kadenan a Mapulu.
18 Su Kadenan a Mapulu na siniksa aku nin sa mapasang
ugaid'a da nin isugut a matay aku.
19 Ukai nu pan sa laki su manga bengawan nu 'bpangadapan nu manga taw a ikelas
asal'a makaludep aku
ka enggu aku makadsukul-sukul kanu Kadenan a Mapulu.
20 Nia ba su bengawan nu Kadenan a Mapulu
na sia ba makaludep su manga taw a ikelas.
21 Pedsukul-sukul aku sa leka ka sinawal aku nengka
enggu inilipuas aku nengka.
22 Na su watu a inendan nu manga panday
na entu bun ba i nabaluy a balapantag kanu langun nu watu nu walay.
23 Su Kadenan a Mapulu i migkahanda sa entu a nanggula.
Sangat a makagaip-gaip kanu mata tanu su entu a kahanda nu Kadenan.
24 Nia ba su gay a inaden nu Kadenan a Mapulu
tembu enggalaw-galaw tanu enggu edsela-sela tanu.
25 Hu Kadenan a Mapulu, 'bpangenin nami sa leka i papanalus ka su kalipuas'engka sa lekami!
Hu Kadenan a Mapulu, 'bpangenin nami sa leka i pambantas kami nengka!
26 Palihalan su sekanin a pakaumaa sia kanu ingala nu Kadenan a Mapulu.
Iganat sia kanu walay a 'bpangadapan sa lekanin na 'bpangenin nami i kapalihalan kanu langun.
27 Su Kadenan a Mapulu na sekanin su Kadenan,
sekanin i tinemayaw sa lekitanu.
Sia kanu kapedsela-sela tanu na mananggit tanu sa manga sapak a kayu sia kanu kapegkuyug-kuyug tanu 'bpawang kanu 'bpangadapan kanu Kadenan,
lu kanu mana manga sidung a lu kanu pegkurbanan.b
28 Seka su Kadenan ku, edsukul-sukul aku sa leka;
seka su Kadenan ku, pebpugin ku seka.
29 Edsukul-sukul kanu kanu Kadenan a Mapulu ka sekanin na sangat i kapia nin,
su sangat a kakalimu nin na taman sa taman!