Su Kasalig kanu Kaisa-isa nin a Tidtu a Kadenan
115
Hu Kadenan a Mapulu, dikena sekami i dait a pebpugin ka su ingala nengka i dait a pebpuginsabap sa sangat i kakalimu nengka enggu katidtu nengka.
2 Ngintu guna ka 'gkanggubasa sa lekami nu manga bangsa i
“Endaw den guna i Kadenan nilan?”
3 Su Kadenan nami na lu sa sulega,
penggulan nin u ngin i pegkiugan nin penggula.
4 Su manga pegkakadenanen nu manga bangsa a entu
na ebpun sa pilak enggu bulawan a inumbal bu nu manusia.
5 Aden manga ngali nilan ugaid'a di silan pakadtalu;
aden manga mata nilan ugaid'a di silan pakailay.
6 Aden manga tangila nilan ugaid'a di silan pakakineg;
aden manga ngilung'ilan ugaid'a di silan pakabaw.
7 Aden manga lima nilan ugaid'a di silan pakaami;
aden manga ay nilan ugaid'a di silan pakalakaw,
dala makineg'engka a uni a makabpun kanu bakelengan nin.
8 Na su namangumbal kanu entu
enggu su langun nu pedsalig lun na makailing bun silan sa entu.
9 Hu sekanu a manga taw a Israil, salig kanu kanu Kadenan a Mapulu!
Sekanin man i pedtabang sa lekanu enggu pegkelung sa lekanu.
10 Hu sekanu a manga tupu nu Harun, salig kanu kanu Kadenan a Mapulu!
Sekanin man i pedtabang sa lekanu enggu pegkelung sa lekanu.
11 Hu sekanu a aden gilek'in kanu Kadenan a Mapulu, salig kanu sa lekanin!
Sekanin man i pedtabang sa lekanu enggu pegkelung sa lekanu.
12 Su Kadenan man a Mapulu na da tanu nin kalipatani enggu palihalan tanu nin;
palihalan nin su tupu nu Israil;
palihalan nin su tupu nu Harun a tupu bun nu Israil,
13 palihalan nin su manga taw a magilek sa lekanin a Kadenan a Mapulu,
magidsan pan i aden 'gkagaga nin enggu dala 'gkagaga nin a taw.
14 Pangeni-ngenin ku i pagkadakelen kanu nu Kadenan a Mapulu
taman den kanu manga muliataw nu.
15 Pangeni-ngenin ku i palihalan kanu nu Kadenan a Mapulu
a minaden kanu sulega enggu dunia.
16 Su sulega na kanu Kadenan a Mapulu
ugaid'a su dunia na inenggay nin kanu manusia.
17 Su namamatay na di den makapugi kanu Kadenan a Mapulu
atawa ka su manga taw a namakalenek den.
18 Ugaid'a su sekitanu a manga bibiag na pugin tanu su Kadenan a Mapulu taman sa taman.
Pugin su Kadenan a Mapulu!