Su Kadsukul-sukul kanu Kinapagkapia kanu 'Bpamedsakit
116
Ipegkalimu ku su Kadenan a Mapulu kagina 'bpakikinegen ninsu kabpangeni ku lun sa tabang.
2 Sabap sa 'bpakikinegen aku nin,
na temawag aku mangeni-ngeni sa lekanin taman a bibiag aku pan.
3 Na su kapatay na mana iket a nakapawik sa laki,
sangat a 'gkagilekan aku kanu kapatay;
sangat a 'gkalidu i ginawa ku enggu 'gkalingasa i ginawa ku.
4 Tembu tinemawag aku kanu ingala nu Kadenan a Mapulu
sa “Hu Kadenan a Mapulu, 'bpangenin ku i ilipuas aku nengka pan!”
5 Su Kadenan a Mapulu na malimu enggu matidtu;
su Kadenan tanu na sangat a malat i nanam'in sa lekitanu.
6 Su Kadenan a Mapulu na pedtiakapan nin su manga taw a di nin pamun 'gkagaga i ginawa nin,a
na kanu kutika a pedsangul aku sa kapatay na inilipuas aku nin.
7 Nia ku nadtalu kanu ginawa ku na mapakay den a malilintad i manggiginawa ku 'bpaluman
kagina su Kadenan a Mapulu na mapia a benal su pinggula nin sa laki.
8 Kagina inilipuas aku nin kanu nanget a kapatay,
inilipuas aku nin kanu kapegkaigis'u manga lu nu mata ku
enggu kanu kapegkasiud'u manga ay ku.
9 Kagina ka maitu, na lemalakaw aku kanu adapan nu Kadenan a Mapulu
sia kanu dalepa nu manga bibiag.
10 Na apia man pedtalun ku i
“Sangat a 'gkapasangan aku,” na pedsalig aku bun sa lekanin a Kadenan a Mapulu.
11 Na sia kanu kapegkalingasa nu ginawa ku na nia ku 'gkadtalu
na “Langun nu taw na budtuden.”
12 Na ngin guna i ibalas ku kanu Kadenan a Mapulu
sa kanu langun na kapianan nin sa laki?
13 Ikayang ku su tagayan sa kadsela-sela ku kanu kalipuasan nin sa laki
enggu pugin ku su ingala nin a Kadenan a Mapulu.
14 Tumanen ku su manga inibpasad ku sa lekanin a Kadenan a Mapulu
sia kanu kaadapan nu madakel a taw nin.
15 Sangat man a ikalidu na ginawa nu Kadenan a Mapulu
su kapatay nu manga taw nin a matidtu.
16 Hu Kadenan a Mapulu, saki man na panunugun nengka
a mana bun su pinggula nu mimbata sa laki a panunugun nengka a babay.
Binekal'engka su sangkali a nakaiket sa laki.
17 Na 'gkurbanan ku seka sa kurban a tanda na kadsukul-sukul ku sa leka,
pugin ku su ingala nengka a Kadenan a Mapulu.
18 Tumanen ku su manga inibpasad ku sa leka a Kadenan a Mapulu
sia kanu kaadapan nu madakel a taw nengka,
19 sia kanu lama-lama nu walay a 'bpangadapan sa leka a Kadenan a Mapulu
sia kanu luk'u siudad a Awrusalim.
Pugin su Kadenan a Mapulu!