Su Kadenan a Mapulu na 'Bpanabang kanu Pamakanasisita
113
Pugin su Kadenan a Mapulu!Su sekanu a panunugun nu Kadenan a Mapulu na pugi nu sekanin!
Pugi nu su ingala nu Kadenan a Mapulu.
2 Pugi nu su ingala nu Kadenan a Mapulu
iganat saguna taman sa taman.
3 Iganat sa kasebang'u senang taman sa kasedep'in
na dait a pugin su ingala nin.
4 Na su Kadenan a Mapulu na pendatu kanu langun nu bangsa,
su sigay nin na nalawanan nin pan su kapulu nu langit!
5 Dala man pagidsan nu Kadenan a Mapulu a Kadenan tanu
a 'bpagagayan kanu kulesi nin lu sa sulega.
6 Pedtulungan nin su kawang-kawangan enggu su liwawaw nu dunia.
7 Ipebpulu nin su manga miskinan ebpun kanu libubuk.
Papembangunen nin su manga pakanasisita ebpun kanu sangat a kapegkapasang kanilan.
8 Pabpagayanen nin silan kanu manga 'bpagayanan nu manga datu
a kaped'u manga datu nu manga taw nin.
9 Papembatan nin su babay a di embata.
Pagkagalawn nin sekanin sia kanu manga wata nin lu kanu walay nin.
Pugin su Kadenan a Mapulu!