Su Kapugi kanu Kadenan a Mapulu sabap kanu manga Makagaip a Penggalebeken nin
111
Pugin su Kadenan a Mapulu!Edsukul-sukulan ku su Kadenan a Mapulu sa senep sa atay
a kaped'u manga taw a matidtu a pendidilimudan sa kasimba sa lekanin.
2 Sangat man i kapia nin su penggalebeken nu Kadenan a Mapulu,
na su langun nu 'gkasuat kanu entu na 'bpamikilen nilan su entu sa mapia.
3 Su langun na penggalebeken nin na pakapailay kanu kabarakat'in enggu kabadtugan nin,
su katidtu nin na taman sa taman.
4 Minadil sekanin sa manga patadem kanu manga makagaip a pinggula nin;
su Kadenan a Mapulu na sangat man a malimu enggu aden lat a nanam'in kanu manga taw.
5 'Bpangadenan nin sa makan su apia entain a magilek sa lekanin,
di nin man kalipatanan su kapasadan nin.
6 Inipailay nin kanu manga taw nin su kabarakat'u manga galebekan nin
sa ukit'a kinapusaka nin kanilan kanu kalupan nu ped a manga bangsa.
7 Su manga galebekan nin na matidtu enggu wagib,
kasaligan su langun nu kasuguan nin.
8 Na inaden nin su entu taman sa taman
asal'a makanggulalan i entu nu manga taw a kasaligan enggu matidtu.
9 Inilipuas'in su manga taw nin
enggu minaden sa kapasadan a dala kapedtaman nin.
Suti man enggu makagaip su ingala nin.
10 Na su senep sa atay a gilek kanu Kadenan a Mapulu na ludsuan nu ilemu.
Na su langun nu enggulalan kanu kasuguan nin na aden kanilan su mapia a katuntay.
Pugin su Kadenan a Mapulu taman sa taman.